ბიძინა ივანიშვილი, ვახტანგ გომელაური, ვაჟა სირაძე, ხარება და სხვები - გამოქვეყნდა ბალტიის ქვეყნების მიერ სანქცირებულთა სია
ბალტიის ქვეყნების მიერ სანქცირებულთა სია
ბიძინა ივანიშვილი, ვახტანგ გომელაური, ვაჟა სირაძე, ხარება და სხვები – ლიეტუვის საგარეო საქმეთა მინისტრმა გაბრიელიუს ლანდესბერგისმა სოციალურ ქსელ X-ში, “ქართული ოცნების” მაღალჩინოსნებისა და რეჟიმის სამართალდამცავების სია გამოაქვეყნა, რომელთაც ადამიანის უფლებების დარღვევის გამო ლიეტუვაში, ლატვიაში და ესტონეთში შესვლა აეკრძალათ – ამ ქვეყნებში ისინი პერსონა ნონ გრანტად გამოცხადდნენ. რაც შეეხება სხვა შეზღუდვებს, მათ შორის ფინანსურს, ამაზე ინფორმაცია ჯერ-ჯერობით არ ვრცელდება.
სანქცირებულთა სია ასე გამოიყურება:
● ბიძინა ივანიშვილი – “ქართული ოცნების” საპატიო თავმჯდომარე;
● ვახტანგ გომელაური – საქართველოს შინაგან საქმეთა მინისტრი;
● შალვა ბედოიძე – შინაგან საქმეთა მინისტრის მოადგილე;
● იოსებ ჭელიძე – შინაგან საქმეთა მინისტრის მოადგილე;
● ალექსანდრე დარახველიძე – შინაგან საქმეთა მინისტრის მოადგილე;
● გიორგი ბუთხუზი – შინაგან საქმეთა მინისტრის მოადგილე;
● ზვიად ხარაზიშვილი – იგივე “ხარება”, განსაკუთრებულ დავალებათა დეპარტამენტის ხელმძღვანელი;
● მილერი ლაგაზაური – განსაკუთრებულ დავალებათა დეპარტამენტის ხელმძღვანელის მოადგილე;
● მირზა კეზევაძე – განსაკუთრებულ დავალებათა დეპარტამენტის ხელმძღვანელის მოადგილე;
● ვაჟა სირაძე – საპატრულო პოლიციის დეპარტამენტის ხელმძღვანელი;
● თეიმურაზ კუპატაძე – საქართველოს შინაგან საქმეთა სამინისტროს ცენტრალური კრიმინალური პოლიციის დეპარტამენტის დირექტორი.
1 დეკემბერს ბალტიის სამი სახელმწიფო – ლიეტუვა, ლატვია და ესტონეთი – საქართველოში “ლეგიტიმური პროტესტის ჩამხშობების” წინააღმდეგ სანქციებზე შეთანხმდა. ამის შესახებ ლიეტუვის საგარეო საქმეთა მინისტრი გაბრიელიუს ლანდსბერგისი და ლატვიის საგარეო საქმეთა მინისტრი, ბაიბა ბრაჟე პლატფორმა X-ზე წერენ.
“ბალტიის სამი სახელმწიფო – ლიეტუვა, ლატვია, ესტონეთი ერთობლივად შეთანხმდნენ სანქციების დაწესებაზე მათ წინააღმდეგ, ვინც ახშობს საქართველოში ლეგიტიმურ პროტესტს. დემოკრატიისა და ადამიანის უფლებების დამრღვევებს ჩვენს ქვეყნებში არ მივესალმებით.” – წერენ მინისტრები.
აშშ-ს სახაზინო დეპარტამენტმა ძალოვნები, ზვიად ხარაზიშვილი, იგივე ხარება და მისი მოადგილე მილერი ლაგაზაური, ასევე პრორუსული “კონსერვატიული მოძრაობის” ლიდერები, კოკა მორგოშია და ზურა მახარაძე 16 სექტემბერს დაასანქცირა.
ასევე, სახელმწიფო დეპარტამენტმა საქართველოს მთავრობისა და პარლამენტის 60-ზე მეტ წევრს, მათ შორის მათ ოჯახის წევრებს “დემოკრატიის ხელყოფისთვის” სავიზო შეზღუდვები დაუწესა. აღსანიშნავია, რომ “ხარებას” მსგავსად მისი მარჯვენა ხელიც ე.წ. მაგნიტსკის სიაში დაამატეს. ორივე მაღალჩინოსნის სახელი რუსული კანონის მოწინააღმდეგეების მიმართ ჩადენილ ძალადობას უკავშირდება.
ამერიკის შეერთებული შტატების ხაზინის დეპარტამენტში აცხადებენ, რომ დაიბლოკება აღნიშნული პირების ყველა საკუთრება და აქტივები, რომელიც აშშ-ში აქვთ, ან ფლობენ მათ ისეთ ქვეყნებში, რომელიც აშშ-ის იურისდიქციის ქვეშ ექცევა.
მანამდე სახელმწიფო დეპარტამენტმა სანქციების პაკეტი გამოაცხადა 6 ივნისს, რომელიც გულისხმობს სავიზო შეზღუდვებს და პირველ ეტაპზე მოიცავდა დაახლოებით 30 ადამიანს.
