აფხაზეთის ახალმა ე.წ. პრეზიდენტმა, ბადრა გუნბამ, ინაუგურაციის ცერემონიაზე პარლამენტის დეპუტატებისა და საკონსტიტუციო სასამართლოს მოსამართლეების თანდასწრებით ფიცი დადო.
საზეიმო ცერემონიაზე გუნბამ აფხაზეთის მოსახლეობას პირობა მისცა, რომ “ცოდნასა და ძალისხმევას მათი კეთილდღეობის, მშვიდობისა და სტაბილურობის უზრუნველსაყოფად მიმართავს“. მან ასევე დაიფიცა, რომ მკაცრად დაიცავს კონსტიტუციას, იქნება მისი განუხრელი აღსრულების გარანტი და უზრუნველყოფს მოქალაქეთა უფლებებისა და თავისუფლებების დაცვას.
ინაუგურაციას ესწრებოდა რუსეთის პრეზიდენტის ადმინისტრაციის უფროსის პირველი მოადგილე, სერგეი კირიენკო, რომელიც 2025 წლის იანვრიდან კრემლში აფხაზეთის საკითხებს კურირებს.
გუნბას არჩევა მისი საქმიანობის პირველ მნიშვნელოვან შედეგად შეიძლება ჩაითვალოს – კირიენკომ და მთლიანად კრემლმა ყველაფერი გააკეთეს, რათა მხარი დაეჭირათ თავიანთი ფავორიტისთვის. თუმცა, ამ მხარდაჭერის მიუხედავად, გუნბამ გამარჯვება მხოლოდ მეორე ტურში შეძლო.
ინაუგურაციას ესწრებოდა ე.წ. ყოფილი პრეზიდენტი ასლან ბჟანია, რომელიც 2024 წლის ნოემბერში “მცირე” სახელმწიფო გადატრიალების შედეგად გადადგა. ბადრა გუნბა მისი მოკავშირე და, ფაქტობრივად, მემკვიდრეა.
ინაუგურაციაზე არ გამოჩენილა ყოფილი პრემიერ-მინისტრი ალექსანდრ ანქვაბი, რომელიც გუნბას საარჩევნო შტაბს ხელმძღვანელობდა და მის “მენტორადაც“ ითვლებოდა. თუმცა ეს სიურპრიზი არ ყოფილა – მთელი გასული კვირის განმავლობაში პრო-სამთავრობო ტელეგრამ-არხები იუწყებოდნენ, რომ ანქვაბი და მისი გუნდის რამდენიმე გავლენიანი ფიგურა ახალ მთავრობაში ადგილს ვერ მოიპოვებდნენ, რადგან ისინი საზოგადოებაში უკიდურესად არაპოპულარულებად ითვლებიან.
ოპოზიციური მედიის შეფასებით, ანქვაბისა და მისი მხარდამჭერების ჩამოშორება ხელისუფლებიდან არა გუნბას დამოუკიდებელი გადაწყვეტილებაა, არამედ მოსკოვის მოთხოვნაა.
უკვე ხვალ ბადრა გუნბა პრემიერ-მინისტრის კანდიდატურას დაასახელებს. სავარაუდოდ, ეს პოსტი ფინანსთა სამინისტროს ყოფილ ხელმძღვანელს, ვლადიმირ დელბას ჩაბარდება, რომელიც შემდეგ ახალ მთავრობას ჩამოაყალიბებს.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო