აშშ-ში ნეონაცისტების ქართველი ლიდერი დააკავეს, რომელიც ებრაელი ბავშვების მკვლელობას გეგმავდა
აშშ-ში ნეონაცისტების ქართველი ლიდერი დააკავეს
აშშ-ს გენერალური პროკურორის თანაშემწის, მეთიუ ოლსენის განცხადებით, აშშ-ში ნეონაცისტების ქართველი ლიდერი, 21 წლის მიხაილ ჩხიკვიშვილი დააკავეს, რომელიც ებრაელი ბავშვების მკვლელობას გეგმავდა.
დაკავებულს ბრალად ედება შეთქმულების მოწყობა, რომლის თანახმადაც სანტა კლაუსის ფორმაში გამოწყობილ მის თანამოაზრეს ნიუ-იორკში ებრაელი ბავშვებისთვის მოწამლული კანფეტები უნდა დაერიგებინა და ამით ტერორი დაეთესა.
აშშ-ის საგამოძიებო უწყების ცნობით, ჩხიკვიშვილს განზრახული ჰქონდა, რომ დაგეგმილი თავდასხმა ყოფილიყო იმაზე დიდი, ვიდრე 2011 წელს ნორვეგიაში ანდერს ბრეივიკის მიერ მოწყობილი მასობრივი მკვლელობა, რომელსაც 77 ადამიანი შეეწირა.
პროკურატურის ინფორმაციით, ჩხიკვიშვილს, რომელსაც რამდენიმე მეტსახელი აქვს, მათ შორის “მეთაური ყასაბი” – “მანიაკ მკვლელთა კულტის” ლიდერია. ეს დაჯგუფება საერთაშორისო ექსტრემისტული დაჯგუფებების სიაშია, რომელიც ნეონაცისტური იდეოლოგიას მისდევს, პროპაგანდას უწევს ძალადობას რასობრივი უმცირესობების და ებრაელების მიმართ.
გამოცემა The Guardian აშშ-ის პროკურატურაზე დაყრდნობით წერს, რომ დაჯგუფების მიზანია საზოგადოებრივი წესრიგის დარღვევა ტერორიზმისა და ძალადობის საშუალებით. სასამართლო დოკუმენტაციის თანახმად, ჩხიკვიშვილი მას შემდეგ დააკავეს, რაც ის ფარული აგენტის გადაბირებას ცდილობდა, რათა მას ძალადობრივი ქმედებები ჩაედინა.
პროკურორების ცნობით, ნოემბერში ჩხიკვიშვილმა ახალი წლისთვის “მასობრივი მკვლელობის ღონისძიების” დაგეგმვა დაიწყო:
“სქემაში მონაწილეობდა ადამიანი, რომელსაც სანტა კლაუსის ფორმა უნდა გადაეცვა და ბრუკლინის სკოლებში მოწამლული კანფეტები რასობრივი უმცირესობებსა და ებრაელი ბავშვებისთვის უნდა დაერიგებინა.”
აღსანიშნავია, რომ 2021 წლიდან ჩხიკვიშვილი ავრცელებს მანიფესტს “Hater’s Handbook”, რომელშიც ის აცხადებს, რომ “თეთრი რასისთვის მოუკლავს” და სხვებსაც მოუწოდებს, რომ მოკლან. ოფიციალური პირების ინფორმაციით, ჩხიკვიშვილი სულ მცირე ორჯერ იმყოფებოდა ნიუ-იორკში 2022 წელს და ბრუკლინში მამის მხრიდან ბებიის სახლში რჩებოდა.
მას ბრალდების დამტკიცების შემთხვევაში 50 წლამდე პატიმრობა ელის: 20 წლით თავისუფლების აღკვეთა ემუქრება ძალადობისკენ მოწოდებისთვის, 5 წელი – ძალადობისკენ მოწოდების შეთქმულებისთვის, 20 წელი – ინფორმაციის გავრცელებისთვის, რომელიც ასაფეთქებელი მოწყობილობების დამზადებასა და გამოყენებას ეხება და 5 წელი – მუქარის შემცველი გზავნილების გავრცელებისთვის.
