აშშ-ის სახელმწიფო დეპარტამენტის 2025 წლის ბიუჯეტის პროექტის თანახმად, საქართველოსთვის გათვალისწინებული საგარეო დახმარება, 80 მილიონი დოლარით არის გათვალისწინებული, რაც 8 მილიონი დოლარით ნაკლებია 2024 წლის დახმარებასთან შედარებით. პროექტი კონგრესს განსახილველად 11 მარტს გაეგზავნა.
შედარებისთვის: 2022, 2023 და 2024 წლების საბიუჯეტო მოთხოვნებში, აშშ-ის სახელმწიფო დეპარტამენტი კონგრესს საქართველოსთვის 88 მილიონი დოლარის გამოყოფის თხოვნით მიმართავდა.
იმავე წლებში, ბიუჯეტის პროექტებში, საგარეო დახმარების დანიშნულებასა და მიზნებზე საუბრისას, ასევე იყო ნახსენები რუსეთის მავნე ზეგავლენა, როგორც საფრთხე ქვეყნის ენერგო უსაფრთხოებისა და ეკონომიკური შესაძლებლობებისთვის.
2025 წლის საბიუჯეტო პროექტში, საქართველოსთან მიმართებაში, ჩანაწერი რუსეთზე, როგორც საფრთხეზე, აღარ იძებნება.
საქართველოს პრემიერმინისტრი ირაკლი კობახიძე ვარაუდობს, რომ აშშ-ის სახელმწიფო დეპარტამენტის მხრიდან საგარეო დახმარების შემცირება შესაძლოა არასამთავრობო ორგანიზაციებს უკავშირდებოდეს.
“ამ საკითხებზე გადაწყვეტილებას იღებს აშშ. თქვენ იცით, რომ ამ დაფინანსების ძალიან დიდი ნაწილი მიემართება არასამთავრობო ორგანიზაციებზე. არასამთავრობო ორგანიზაციებმა იმედები გაუცრუეს აშშ-ს შარშან, შარშანწინ. შეიძლება, ეს გახდა დაფინანსების შემცირების მიზეზი.” – განაცხადა კობახიძემ.
რა წერია დოკუმენტში
სახელმწიფო დეპარტამენტის მიერ გამოქვეყნებულ დოკუმენტში წერია, რომ ამერიკელი ხალხის დახმარება ხელს შეუწყობს საქართველოს დემოკრატიულ და ეკონომიკურ განვითარებას, ასევე დაეხმარება ქვეყანას ევროატლანტიკური ინტეგრაციის პროცესში.
ბიუჯეტის ახალ პროექტში პროექტში ასევე აღნიშნულია, რომ საგარეო დაფინანსება ხელს შეუწყობს საქართველოში კანონის უზენაესობის, ინსტიტუციური კონტროლის, ანტიკორუფციული ინიციატივებისა და “მთავრობის ყველა დონეზე”, საჯარო ანგარიშვალდებულების, შიდა კონტროლისა და ზედამხედველობის გაძლიერებას.
დოკუმენტში ნახსენებია საქართველოში მედია გარემო და ნათქვამია, რომ საგარეო დახმარება “ხელს შეუწყობს” ქვეყანაში სანდო, დამოუკიდებელი და დაბალანსებული მედია გარემოს შექმნას.
