აშშ-ს ნაჩუქარი Pfizer-ის ნახევარი მილიონი დოზა საქართველოშია
ამერიკის მთავრობისა და უშუალოდ პრეზიდენტ ჯო ბაიდენის გადაწყვეტილებით, საქართველოსთვის საჩუქრად გადმოცემული Pfizer-ის ვაქცინის ნახევარი მილიონი დოზა საქართველოშია. დახვედრის ცერემონიას ჯანდაცვის მინისტრი ეკატერინე ტიკარაძე და აშშ-ს ელჩი, კელი დეგნანი დაესწრნენ.
“ძალიან მოხარულები ვართ, გადმოგცეთ ეს სიცოცხლის გადამრჩენელი ვაქცინა, როგორც ნაწილი ჩვენი სტრატეგიული პარტნიორობისა”, – განაცხადა კელი დეგნანმა.
“ფაიზერზე” რეგისტრაცია დღეს დაიწყო და პირველ 2 საათში 107 157 მოქალაქე დარეგისტრირდა. ჯანდაცვის მინისტრის მოადგილის, თამარ გაბუნიას თქმით, რეგისტრაციის ვებგვერდი პირველი რამდენიმე წუთის განმავლობაში შეფერხებით მუშაობდა, თუმცა დაახლოებით ნახევარ საათში პრობლემა მოიხსნა.
მისივე განმარტებით, ფაიზერზე მოსახლეობის აქტიურობა მოსალოდნელი იყო, რადგანაც წინასწარი რეგისტრაციის დროს დიდმა ნაწილმა სწორედ ამ ვაქცინას მიანიჭა უპირატესობა.
“მინდა ხაზი გავუსვა, რომ აქტივობა არის სინოფარმის, სინოავკის და ასტრაზენეკას ვაქცინებზეც მზარდი”, – განაცხადა გაბუნიამ.
მინისტრის მოადგილემ ისაუბრა მოზარდების ვაქცინაციაზეც. გაბუნიას თქმით, 16-დან 18 წლამდე პირებს ასაცრელად დასჭირდებათ მშობლის ან მეურვის ინფორმირებული თანხმობა.
გაბუნიამ აღნიშნა ისიც, რომ კლინიკებსა და COVID-სასტუმროებში ადგილები დაემატა და ამჟამად 6 000-ზე მეტი ადგილია ჰოსპიტლებში:
“ბოლო ორი დღის განმავლობაში, დაახლოებით, 1 000-მდე საწოლი COVID-სასტუმროებში დაემატა და კიდევ აქტიურად მიმდინარეობს სასტუმროების მობილიზება.”
ფაიზერზე ვაქცინაცია ამჟამად საქართველოს 37 კლინიკაშია შესაძლებელი. გაბუნიას განმარტებით, მომდევნო კვირიდან ნებისმიერ მოქალაქეს შეეძლება პირდაპირ მივიდეს კლინიკაში და აიცრას.
“თუ ვინმემ რაიმე მიზეზით ვერ მოახერხა რეგისტრაცია პორტალზე ან ტელეფონით, ამ შემთხვევაში, 37-ვე დაწესებულება უკვე მომდევნო კვირის ბოლოდან, როდესაც გაივლის რეგისტრაციის პირველი ტალღა, იქნება მობილიზებული იმისთვის, რომ ადგილზე მიიღონ მოქალაქეები, რომლებიც დაწესებულების ცხელ ხაზზე დარეკავს და ჩაეწერება ვიზიტისთვის, ან, შეიძლება, პირდაპირ მივიდეს და ჩაიტაროს ვაქცინაცია. ეს ყველა ვაქცინას შეეხება, ეს რეჟიმი უკვე მოქმედებს Sinopharm-ის და Sinovac-ის ვაქცინებზე”, – თქვა გაბუნიამ.
დღეს დილით ცნობილი გახდა ისიც, რომ საქართველოს კიდევ ერთმა მეგობარმა ქვეყანამ, ლიეტუვამ, ქვეყანას 15 ათასი დოზა “ასტრაზენეკას” ვაქცინა გადასცა.
ლიეტუვის მთავრობის გადაწყვეტილებით, კოვიდის საწინააღმდეგო ვაქცინები აღმოსავლეთ პარტნიორობის სამი წევრი სახელმწიფოსთვის – საქართველოს, უკრაინასა და მოლდოვისთვის იქნა გამოყოფილი.
“უღრმესი მადლობა ჩემს კოლეგას, გაბრიელიუს ლანდსბერგისს და თითოეულ იმ ადამიანს, რომელიც ჩართული იყო ამ პროცესში მტკიცე მხარდაჭერისა და დროული დახმარებისთვის!” – წერს ტვიტერზე საქართველოს საგარეო საქმეთა მინისტრი, დავით ზალკალიანი.
___________________________________________________
● 2616 ახალი შემთხვევა და გარდაცვლილი 26 პაციენტი – საქართველო პანდემიის მეოთხე ტალღაში შედის
● ევროკავშირმა სომხეთი და აზერბაიჯანი Covid-უსაფრთხო ქვეყნების სიაში შეიყვანა, საქართველო – არა
● საქართველოში ინფიცირების სწრაფი მატება, შესაძლოა კავშირში იყოს „დელტა“ შტამის გავრცელებასთან
______________________________________________________
ივლისის დასაწყისში ჯანდაცვის მინისტრის მოადგილემ თქვა, რომ საქართველო შესაძლოა კორონავირუსის პანდემიის მძიმე მეოთხე ტალღაში შევიდეს. ასევე, ქვეყანაში იზრდება ინფიცირებული ბავშვების რაოდენობა – თბილისში მობილიზებული 200-მდე პედიატრიული საწოლი, რომელიც ეპიდემიის მეორე და მესამე ტალღის დროს პრაქტიკულად დაუტვირთავი იყო, უკვე გადატვირთულია. ინფიცირებული ბავშვების რაოდენობამ უკვე გადააჭარბა სამასს.
ტელეკომპანია “რუსთავი 2”- ის ეთერში დაავადებათა კონტროლის ეროვნული ცენტრის დირექტორმა, ამირან გამყრელიძემ განაცხადა, რომ საქართველოში 20-30% დელტა შტამი ცირკულირებს, რაც კიდევ უფრო მოიმატებს.
საქართველოში ვაქცინაციის პროცესი 15 მარტიდან დაიწყო და ნელი ტემპით მიმდინარეობს. 23 ივლისის მონაცემებით, საქართველოში ჯამურად ჩატარდა 391 781 აცრა. სრულად ვაქცინირებულია 136 734 ადამიანი.
ბოლო 24 საათში საქართველოში კორონავირუსის 2 460 შემთხვევა გამოვლინდა და 20 ადამიანი გარდაიცვალა.
ქვეყანაში ამ დრომდე ოთხი ვაქცინაა შემოტანილი – გერმანულ-ამერიკული “ფაიზერი”, ბრიტანული “ასტრაზენეკა”, ჩინური “სინოფარმი” (პეკინი) და ჩინური “სინოვაკი”.
