არასამთავრობოები სახალხო დამცველის პოსტზე ლევან იოსელიანის არჩევის პროცესს არ ეთანხმებიან

ლევან იოსელიანის არჩევის პროცესი

არასამთავრობო ორგანიზაციები სახალხო დამცველის პოსტზე ლევან იოსელიანის შესაძლო არჩევას არ ეთანხმებიან. მათ გაავრცელეს განცხადება და აღნიშნეს, რომ პარლამენტის ვიცე-სპიკერის, ლევან იოსელიანის სახალხო დამცველად შესაძლო არჩევის პროცესი შეუსაბამოა ევროკავშირის მე-12 რეკომენდაციასთან, არღვევს გაეროს მიერ მიღებულ “პარიზის პრინციპებს” და არ იწვევს საზოგადოებრივ ნდობას. 

“გამჭვირვალე კონკურსისა და ინკლუზიური ჩართულობის შედეგად, სამოქალაქო საზოგადოებამ დაასახელა ომბუდსმენობის კანდიდატები, რომლებმაც პარლამენტს წარუდგინეს დეტალური ხედვა და საჯაროდ უპასუხეს დეპუტატებისა თუ დაინტერესებული ჯგუფების შეკითხვებს. ამ კანდიდატების დაუსაბუთებლად უკუგდება, ახალი კანდიდატის შერჩევის პროცესის დახურულ კარს მიღმა წარმართვა და ქვეყნის მთავარ უფლებადამცველ პოზიციაზე პოლიტიკოსის არჩევა სრულად ეწინააღმდეგება როგორც ევროკავშირის, ისე ­— გაეროს (GANHRI) რეკომენდაციებს.

მაშინ როდესაც, საქართველოს პარლამენტში განიხილება სამოქალაქო საზოგადოების საწინააღმდეგო რუსული კანონპროექტები, რაც ცხადად გვაშორებს ევროპულ პერსპექტივას და   საზოგადოების დაყოფას იწვევს, მიგვაჩნია, რომ ყველა პოლიტიკოსის მიზანი უნდა იყოს ამ კანონპროექტის მიღების ხელშეშლა, ხოლო სახალხო დამცველად დამოუკიდებელი, მიუკერძოებელი და სამოქალაქო საზოგადოების ლეგიტიმაციის მქონე პირის არჩევა”, – აღნიშნულია არასამთავრობო ორგანიზაციების საერთო განცხადებაში. 

განცხადებას ხელს აწერენ: 

1. საქართველოს ღია საზოგადოების ფონდი (OSGF)
2. საქართველოს რეფორმების ასოციაცია (GRASS)
3. დემოკრატიის მცველები (DemDef)
4. ქალთა ინიციატივების მხარდამჭერი ჯგუფი (WISG)
5. მწვანე ალტერნატივა (Green Alternative)
6. საერთაშორისო გამჭვირვალობა – საქართველო (TI-Georgia)
7. უფლებები საქართველო (Rights Georgia)
8. სოციალური სამართლიანობის ცენტრი (Social Justice Center)
9. სამართლიანი არჩევნებისა და დემოკრატიის საერთაშორისო საზოგადოება (ISFED)
10. საბჭოთა წარსულის კვლევის ლაბორატორია (Sovlab)
11. საქართველოს დემოკრატიული ინიციატივა (GDI)
12. საქართველოს ახალგაზრდა იურისტთა ასოციაცია (GYLA)
13. წამების მსხვერპლთა ფსიქოსოციალური და სამედიცინო რეაბილიტაციის ცენტრი (GCRT)
14. საფარი (Sapari)
15. თბილისი პრაიდი (Tbilisi Pride)
16. ადამიანის უფლებების ცენტრი (HRC)

საქართველოს პარლამენტმა პარტია “მოქალაქეების” წევრი ლევან იოსელიანი სახალხო დამცველად აირჩია. 96 მომხრე, 0 წინააღმდეგი – ასეთია ხმების რაოდენობა. კენჭისყრისთვის რეგისტრაცია 99-მა დეპუტატმა გაიარა. სახალხო დამცველს პარლამენტი 6 წლის ვადით ირჩევს.