"ანტიეკლესიური ძალების მიერ დაგეგმილი შეთქმულება ვერ შედგა" - ღარიბაშვილი გადადგომას არ აპირებს
საქართველოს პრემიერმინისტრმა ირაკლი ღარიბაშვილმა დღეს მთავრობის სხდომაზე სპეციალური განცხადება გააკეთა და ჟურნალისტების მოთხოვნას გამოეხმაურა, რომლებიც მის გადადგომას ითხოვენ.
ღარიბაშვილის თქმით, ტვ პირველის ოპერატორის გარდაცვალების გამო გამართული მასშტაბური აქცია არის “წარუმატებელი შეთქმულება სახელმწიფოს წინააღმდეგ” და ის თანამდებობის დატოვებას არ აპირებს.
“ანტისახელმწიფოებრივი და ანტიეკლესიური ძალების მიერ დაგეგმილი შეთქმულება ვერ შედგა და ვერასდროს ვერ შედგება ჩვენს ქვეყანაში. ამ ადამიანის ტრაგედიის გამოყენება სცადეს საკუთარი პოლიტიკური მიზნების მისაღწევად”, – თქვა ღარიბაშვილმა.
მისივე განცხადებით, 5 ივლისს, თბილისის ქუჩებში ჰომოფობიური ჯგუფების მიერ განხორციელებული ძალადობა მეორე დილითვე დავგმო, პოლიციამ კი მეორე დღესვე მოახდინა ამის თაობაზე რეაგირება:
“რა თქმა უნდა, მნიშვნელობა არ აქვს, რა მიზეზით დაიღუპა ბატონი ალექსანდრე ლაშქარავა, ყველა მოძალადე იქნება აბსოლუტურად მთელი სიმკაცრით დასჯილი, პოლიციამ უკვე დააკავა 4 პირი, რომელიც ჩართული იყო აღნიშნული პირის ცემის საქმეში.
კიდევ ერთხელ მსურს განვაცხადო, რომ ნებისმიერი ძალადობა არის მიუღებელი, ჩვენ ვგმობთ, ყოველთვის დავგმობთ და ხელს შევუშლით ნებისმიერ ძალადობას ქვეყანაში, ჩვენ არ დავუშვებთ ძალადობას ჩვენს სახელმწიფოში.”
პრემიერის თქმით, ხელისუფლებამ წინასწარ უთხრა ლგბტ საზოგადოებას, რომ პრაიდის ჩატარება იყო დაუშვებელი – “ჩვენ რისკები ჩვენს ქვეყანაში წინასწარ შევაფასეთ.” ასევე, მისი განმარტებით, მათი [“ღირსების მარშის” ორგანიზატორების] მიზანი იყო, შსს-ს გამოეყენებინა ძალა, მაგრამ ხელისუფლებამ ეს არ დაუშვა.
დღევანდელ ბრიფინგზე ღარიბაშვილმა უშუალოდ სიტყვა “აღლუმის” შესახებაც ისაუბრა:
“ჯერ ერთი, აღლუმი რა სახელია, მე ვიცი ერთი აღლუმი, ეს არის ჩვენი ჯარის აღლუმი, რომელიც ჩვენს ქვეყანაში ჩატარდება.
სხვა ღონისძიებები, რომელიც, შესაძლოა, ჩატარდეს განსხვავებული აზრის გამოსახატავად, ამისთვის არსებობს ნებისმიერი სხვა ლოკაცია, რომელიც პოლიციამ შესთავაზა LGBT თემს, მანამდე, სამი დღის განმავლობაში, აბსოლუტურად ყოველგვარი შეფერხების გარეშე, არავითარი აგრესია არ ყოფილა, პოლიციამ მოახდინა ყველაფრის პრევენცია.”
მისივე თქმით, როცა მოსახლეობის 95% წინააღმდეგია პროპაგანდისტული მარშის, უნდა დავემორჩილოთ.
“ეს არის ჩვენი მოსახლეობის აბსოლუტური უმრავლესობის აზრი, ჩვენ ვართ ხალხის მიერ არჩეული ხელისუფლება და ვართ იძულებული, რომ ამას ანგარიში გავუწიოთ”, – აღნიშნა ღარიბაშვილმა.
საქართველოს პრემიერმა მიმართა მედიასაც. მისი თქმით, ყველა დაისჯება უმკაცრესად, ვინც გასცდება კანონის ფარგლებს. მისივე განმარტებით, ისე აღარ იქნება, როცა უმცირესობა წყვეტდა ყოველთვის უმრავლესობის ბედს, “როცა მათი ძალადობრივი ხელწერით ნებისმიერ გადაწყვეტილებას ღებულობდნენ საქართველოში.”
_________________________________________________
● პრემიერის განცხადების შემდეგ ჰომოფობიურმა ჯგუფებმა ოპოზიციის კარვები დაარბიეს
● “პრემიერი უნდა გადადგეს” – აქცია საქართველოს პარლამენტთან
● რატომ ვერ ჩატარდა ღირსების მარში – რა აჩვენა ამ დღემ?
● ნადირობა მედიაზე. პრაიდის საწინააღმდეგო აქციაზე ოცზე მეტი რეპორტიორი მძიმედ დაშავდა
● ჰომოფობების ცეკვა პარლამენტთან. ფოტორეპორტაჟი
____________________________________________________
5 ივლისს, თბილისში, Tbilisi Pride-ის კვირეულის ფარგლებში ღირსების მარში უნდა გამართულიყო. მსვლელობა რუსთაველის მეტროსთან 18:00 საათზე დაიგეგმა.
საპატრიარქომ მალევე დააანონსა მარშის საწინააღმდეგო აქცია. იგი თავის მხარდამჭერებს ქუჩაში გამოსვლისკენ და ქვეყნის “გაუკუღმართებული ცხოვრების წესისგან” დაცვისკენ მოუწოდებდა.
5 ივლისს ჰომოფობიურად განწყობილი ჯგუფები დილიდან გამოვიდნენ პარლამენტთან. მათ ჯერ პარლამენტთან თვეების განმავლობაში მდგარი ოპოზიციური კარვები დაარბიეს, ხოლო შემდეგ ამ ამბის გასაშუქებლად მისულ ჟურნალისტებს დაერივნენ.
ამ დღეს თბილისში ნამდვილი ნადირობა მოეწყო ჟურნალისტებზე – რადიკალები 53 ჟურნალისტს დაესხნენ თავს.
შეკრებილ ჯგუფებს ძალადობისკენ მოუწოდებდნენ სასულიერო პირები – “არა ძალადობას კი არა, ვალდებულები ხართ, იძალადოთ სამშობლოსთვის” – ასე მიმართა შეკრებილებს დეკანოზმა სპირიდონმა.
როგორც დამკვირვებლები აღნიშნავენ, მოძალადეთა ქმედებები წააქეზა პრემიერ ღარიბაშვილის მიერ 5 ივლისს გაკეთებულმა განცხადებამ. ღარიბაშვილმა ვითარების შესაძლო გართულებაზე პასუხისმგებლობა დააკისრა არა ძალადობრივი აქციის წევრებს, არამედ “ღირსების მარშის“” ორგანიზატორებს და მოუწოდა მათ, არ ჩაეტარებინათ მსვლელობა რუსთაველის გამზირზე. ღარიბაშვილმა განაცხადა, რომ დაგეგმილი “ღირსების მარში” მისთვის “მიზანშეუწონელი” და საფრთხის შემცველი იყო. ასევე მან თქვა, რომ ღირსების მარშის მიღმა ოპოზიცია დგას.
“ღირსების მარში” გაუქმდა, თუმცა, რუსთაველის გამზირზე ძალადობა კიდევ რამდენიმე საათს გაგრძელდა.
როგორც ჟურნალისტები ამბობდნენ, მთელი დღის განმავლობაში ადგილზე მობილიზებული არასაკმარისი პოლიციელი. ამაზე შს მინისტრმა განაცხადა, რომ იმდენი სამართალდამცველი იქნა მობილიზებული, “რისი საშუალებაც იყო”.
როგორც მედიის წარმომადგენლები აღნიშნავდნენ, ჰომოფობები მათ მიზანმიმართულად დასდევდნენ. ზოგ ჟურნალისტს ქირურგიული ოპერაცია და სერიოზული სამედიცინო ჩარევა დასჭირდა.
მათ შორის იყო ლექსო ლაშქარავა, ტვ პირველის ოპერატორი. ძალადობრივმა ჯგუფები ლაშქარავას და მის კოლეგას, ტვ პირველის ჟურნალისტს, მირანდა ბაღათურიას თავს დაესხნენ ორგანიზაციის “სირცხვილიას” ოფისში. როგორც ბაღათურია ამბობს, ლაშქარავას 20 ადამიანი სცემდა. თვითმხილველთა თქმით, მოძალადეებს შორის სასულიერო პირებიც იყვნენ.
ლაშქარავა საავადმყოფოში გადაიყვანეს სახის ძვლების მოტეხილობით, მას ქირურგიული ოპერაცია დასჭირდა. სამი დღის შემდეგ მან კლინიკა დატოვა. გარდაცვალებამდე ერთი დღით ადრე, 10 ივნისს, იგი ტვ პირველის შუადღის გადაცემის სტუმარი იყო, სადაც 5 ივლისის მოვლენები გაიხსენა.
ლაშქარავა 11 ივლისს დედამ საკუთარ ლოგინში გარდაცვლილი იპოვა.
ოჯახის წევრები ამბობენ, რომ ლაშქარავას ცხვირიდან სისხლი სდიოდა. ოჯახის ახლობლების ერთ-ერთი ვერსიაა, რომ იგი მიყენებული დაზიანებების შედეგად, თრომბოემბოლიით გარდაიცვალა.
ახალგაზრდა კაცის ცხედარი კრიმინალისტებმა ექსპერტიზაზე ოჯახის თანხმობის გარეშე გადაიტანეს. მამაკაცის ცხედარი ლურჯ პარკში გახვეული გამოიტანეს სახლიდან, საკაცის გარეშე და სირბილით მიიტანეს მანქანამდე. გარდაცვლილის მიმართ ასეთი მოპყრობა საზოგადოების უკმაყოფილების კიდევ ერთ მიზეზად და სოციალურ ქსელებში განხილვის თემად იქცა.
მომხდართან დაკავშირებით შსს-მ გამოძიება თვითმკვლელობამდე მიყვანის მუხლით დაიწყო. ლაშქარავას გარდაცვალებიდან ძალიან მალე, ხელისუფლებასთან ასოცირებულმა საიტებმა დაიწყეს გავრცელება ინფორმაციის, თითქოს ლაშქარავა ნარკოდამოკიდებული იყო და იგი ზედოზირებით გარდაიცვალა.
იმავე დღეს, 11 ივლისს საღამოს, შსს-მ გამართა ბრიფინგი, სადაც უწყებამ იგივე ვერსიის გავრცელება დაიწყო, რომ ლაშქარავა “არაფხიზელ მდგომარეობაში” იყო.
ბრიფინგზე გაუშვეს ქუჩის ვიდეოკამერებით გადაღებული კადრები, სადაც ჩანს, რომ წინა დღეს ლაშქარავა ფონიჭალაში აფთიაქში შედის, შემდეგ დედა ენის ბაღში მიდის.
“ფონიჭალიდან მოდის ორთაჭალაში და მოგვიანებით 19:41 წუთზე ბრუნდება ფონიჭალაში, საიდანაც გადაადგილდება დედა ენის ბაღის მიმართულებით, სადაც დაჰყო გარკვეული პერიოდი, ხოლო 00:10 საათზე ბრუნდება საბურთალოს ტერიტორიაზე საკუთარი სახლში, სავარაუდოდ არაფხიზელ მდგომარეობაში”, – თქვა ამ კადრების ბრიფინგზე ჩვენების შემდეგ კრიმინალური დეპარტამენტის უფროსმა, მაუკა ჭელიძემ.
