"აიკრძალოს პიროტექნიკის თავისუფალი გაყიდვა" - სომხეთის ყოფილი ვიცე-პრემიერი
აიკრძალოს პიროტექნიკის თავისუფალი გაყიდვა
„სურმალუს” სავაჭრო ცენტრში მომხდარი ტრაგედია გამოსაფხიზლებელი და მტკივნეული იყო. დროა უფრო მკაცრი ზომები მივიღოთ, რათა ფეიერვერკები მხოლოდ სახელმწიფო და საზოგადოებრივ ღონისძიებებზე ვიხილოთ“, – განაცხადა პარტია „სამოქალაქო შეთანხმების“ გამგეობის წევრმა, მერობის კანდიდატმა მმართველი პარტიიდან ტიგრან ავინიანმა.
საქმე იმაშია, რომ 14 აგვისტოს სომხეთში, ერევანში მომხდარი ტრაგედიის მიზეზი სავაჭრო ცენტრის პიროტექნიკის საწყობში გაჩენილი ხანძარი გახდა.
ტიგრან ავინიანი ვიცე პრემიერ-მინისტრის პოსტს 2018-2020 წლებში იკავებდა. 2022 წლის აპრილში ცნობილი გახდა, რომ მმართველი პარტია მის წარდგენას მერობის კანდიდატად აპირებს. არჩევნები მომავალ წელს გაიმართება.
მმართველი პოლიტიკური ძალის წარმომადგენლის თქმით, უნდა აიკრძალოს ფეიერვერკების გამოყენება კერძო ღონისძიებებზე. მისი განცხადებით, ის დასაშვები მხოლოდ საზოგადოებრივ დღესასწაულებზე უნდა იყოს.
ყოფილმა ვიცე-პრემიერმა ჟურნალისტებს განუცხადა, რომ კანონპროექტს ფეიერვერკების მოწყობის პროცედურის გამკაცრებაზე, პარლამენტი შემოდგომით განიხილავს.
14 აგვისტოს ერევანში, “სურმალუს” სავაჭრო ცენტრში, აფეთქება მოხდა, რამაც ხანძარი გამოიწვია. უკვე ნაპოვნია 16 გარდაცვლილის ცხედარი, ორი ადამიანი ამ დრომდე დაკარგულად ითვლება. სამედიცინო დაწესებულებებს 62-მა ადამიანმა მიმართა, მათგან ხუთი მკურნალობას აგრძელებს.
ხანძარი 16 აგვისტოს, საღამოს ჩააქრეს. სამძებრო სამუშაოები ჯერ ისევ გრძელდება. დაღუპულთა ხსოვნის პატივსაცემად, სომხეთსა და მთიან ყარაბაღში, 17 და 18 აგვისტო გლოვის დღეებადაა გამოცხადებული.
ავინიანმა, რომელიც სავაჭრო ცენტრს 17 აგვისტოს ესტუმრა, განაცხადა, რომ ტრაგედიის მიზეზს გამოძიება დაადგენს, ტერაქტის ვერსია გამოირიცხულია.
ტიგრან ავინიანი ერთ-ერთი პირველი იყო, ვინც სავაჭრო ცენტრში მომხდარს გამოეხმაურა. შემთხვევის ადგილის მონახულებამდეც მან Facebook-ის საკუთარ გვერდზე დაწერა, რომ უნდა აიკრძალოს პიროტექნიკის უფასო გაყიდვა და ფეიერვერკის უკონტროლო მოწყობა.
„მოვუწოდებ ჩვენს კოლეგებს ეროვნულ ასამბლეაში, დაიწყონ ამ ინიციატივის განხორციელება“, – წერს ის.
“ტერორისტული თავდასხმის ვერსია გამორიცხულია”
ხანძრისა და აფეთქების შესაძლო მიზეზებზე საუბრისას, მმართველი პარტიის წევრმა ტერაქტის ვერსია გამორიცხა. მისი თქმით, დარჩენილ „კითხვებს პასუხი გაეცემა“ აღძრული სისხლის სამართლის საქმის ფარგლებში:
„ოთხი ტონა ასაფეთქებელი ნივთიერების ერთ ადგილას შენახვა დიდი საფრთხეა. მცირე ნაპერწკალმა შეიძლება გამოიწვიოს ასეთი შედეგები“.
ავინიანი ამდენი აალებადი მასალის შენახვას დიდ რისკად მიიჩნევს. იგი დარწმუნებულია, რომ საუკეთესო გაგრილების სისტემებიც კი ვერ იქნება ეფექტური ამ სიტუაციაში.
“ფეიერვერკის ტრადიციაზე უარი უნდა ვთქვათ”
ყოფილი ვიცე-პრემიერის თქმით, “სურმალუს” სავაჭრო ცენტრში მომხდარმა იგი კერძო ღონისძიებებზე მსგავსი მასალისა და ტრადიციული ფეიერვერკის გამოყენებაზე დააფიქრა.
ავინიანს მიაჩნია, რომ კერძო წვეულების დროს ფეიერვერკის გამოყენება დასაშვები არ უნდა იყოს. მისი თქმით, ისინი დიდ საფრთხეს ქმნიან და ირგვლივ მცხოვრებთა სიმშვიდეს არღვევენ:
„ჩვენ უნდა გვესმოდეს, რომ ათი კილომეტრის რადიუსში მცხოვრები მოქალაქეები არ არიან ვალდებული, მიიღონ მონაწილეობა ჩვენს პირად ღონისძიებებში. მით უმეტეს, რომ მათ შორის არიან მოხუცები და მცირეწლოვანი ბავშვები. 23:00 საათამდეც რომ იყოს ფეიერვერკები, ამ ხალხის სიმშვიდეს არღვევს. დროა უფრო გამკაცრდეთ ამ საკითხში.”
პარლამენტი ფეიერვერკების ორგანიზების პროცედურის გამკაცრებას განიხილავს
ავინიანის თქმით, შემოდგომით იგეგმება პარლამენტში კანონპროექტის განხილვა ფეიერვერკების მოწყობის პროცედურის გამკაცრების შესახებ.
„ჯერ კიდევ 2021 წელს, მთავრობამ დაამტკიცა პროექტი, რომელიც პრაქტიკულად ზღუდავდა პიროტექნიკის გამოყენებას კერძო ღონისძიებების დროს. პროექტის მიხედვით, ასეთი საშუალებებით სარგებლობა დაიშვებოდა მხოლოდ სახელმწიფო და საზოგადოებრივი დღესასწაულების დროს“.
ყოფილი ვიცე-პრემიერი მიიჩნევს, რომ ეს გადაწყვეტილება საბოლოოდ უნდა იქნას მიღებული. სახიფათო მასალების შენახვის საკითხიც მთავრობამ უნდა მოაგვაროს.
აიკრძალოს პიროტექნიკის თავისუფალი გაყიდვა
