აფხაზეთში მცხოვრები უკრაინის მოქალაქეებისთვის სოხუმის დატოვების და სხვაგან წასვლის – მათ შორის თავად უკრაინაში – მხოლოდ ერთი ლეგალური გზა არსებობს: ეს მარშრუტი გადის რუსეთზე და ეს გზა დაიხურა მას შემდეგ, რაც რუსეთის მთავრობამ 2023 წლის ოქტომბრის დასაწყისში დააწესა სპეციალური პროცედურა უკრაინის მოქალაქეებისთვის, რომლებიც რუსეთის ფედერაციაში შედიან მესამე ქვეყნებიდან.
შედეგად, ისინი ფაქტობრივად ვეღარ ახერხებენ მოგზაურობას.
ამ პრობლემის ნაწილობრივ მაინც გადაჭრის მიზნით, აფხაზეთის ხელისუფლებამ გადაწყვიტა გაეშვათ უკრაინის მოქალაქეები მდინარე ენგურზე მდებარე საგუშაგოდან, მაგრამ ეს ვარიანტი ხელმისაწვდომია მხოლოდ მაშინ, “თუ არსებობს ჰუმანიტარული მიზეზები”.
ამჟამად აფხაზეთში რამდენიმე ასეული უკრაინის მოქალაქე მუდმივად ცხოვრობს. ეს ძირითადად დონბასის ან ყირიმის მცხოვრებლები არიან, რომლებმაც აღნიშნული ტერიტორიები 2014 წლის სამხედრო მოქმედებების დროს დატოვეს.
მათ ჯერ კიდევ აქვთ უკრაინული პასპორტები, რის გამოც ისინი ფაქტობრივად აფხაზეთის ხაფანგში არიან მოქცეული.
უკრაინის მოქალაქეებს, რომლებსაც სურთ აფხაზეთის დატოვება, უნდა მიმართონ საგარეო საქმეთა სამინისტროს საკონსულო დეპარტამენტს ან აფხაზეთის სახელმწიფო უსაფრთხოების სამსახურის სასაზღვრო რაზმის ქვედანაყოფს. ამის შემდეგ ისინი მოლაპარაკებას აწარმოებენ რუს კოლეგებთან, რათა საკითხი ინდივიდუალურად და ყოველგვარი გარანტიის გარეშე გადაწყდეს.
ანუ, მოსკოვს შეუძლია ნებართვა გასცეს ან უარი თქვას და თავად დამტკიცების პროცედურას დასჭირდება რამდენიმე დღიდან რამდენიმე კვირამდე.
რაც შეეხება მდინარე ენგურზე მდებარე საგუშაგოს, წესების მიხედვით, იქ გავლა მხოლოდ აფხაზეთის მოქალაქეებს შეუძლიათ – მხოლოდ აფხაზეთის სახელმწიფო უსაფრთხოების სამსახურის ნებართვის მიღების შემდეგ.
სხვა ქვეყნების მოქალაქეებს ამ საგუშაგოზე არ უშვებენ.
თუმცა, ახლა უკრაინის მოქალაქეებსაც შეეძლებათ ამ „გასასვლელით“ სარგებლობა. მაგრამ კიდევ ერთხელ: არა ყველას, არამედ მხოლოდ მათ, ვისაც ამის “ჰუმანიტარული საფუძველი” აქვს.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
