აფხაზეთში, 21 იანვარს ღამით, ეროვნული სამხატვრო გალერეა დაიწვა. ხანძარმა მთელი ფონდი გაანადგურა, განაცხადა კულტურის მინისტრმა დინარა სმირმა. გალერეაში ინახებოდა 4000-მდე ნამუშევარი, რომელთაგან 300 ეკუთვნოდა ალექსანდრე შერვაშიძე-ჩაჩბას, რომელიც ითვლება პირველ პროფესიონალ აფხაზ მხატვრად (1867-1968).
“შეიძლება ითქვას, რომ ყველაფერი დაიწვა. ეროვნული სამხატვრო გალერეაში 4 000-ზე მეტი ეგზემპლარი ინახებოდა, რომლებიც ცენტრალური საგამოფენო დარბაზის შენობის მეორე სართულზე იყო განთავსებული. მათ შორის, ალექსანდრე ჩაჩბა-შერვაშიძის 300-მდე ნამუშევარია. ეს აფხაზეთის ეროვნული კულტურისთვის გამოუსწორებელი დანაკარგია. ცრემლები მახრჩობს, მიჭირს საუბარი”. – ამბობს დინარა სმირი.
ხანძარი, რომლის გამომწვევი მიზეზი ამ დრომდე დგინდება, კვირას, დილის ოთხ საათზე გაჩნდა. ხანძარი იმ შენობის მეორე სართულზე გაჩნდა, სადაც საცავი იყო განთავსებული.
ხანძრის ჩაქრობაში სოხუმიდან, გულრიფშიდან და ოჩამჩირიდან გაგზავნილი 11 სახანძრო ეკიპაჟი მონაწილეობდა. საბოლოოდ, ცეცხლის ლოკალიზება დილის შვიდი საათისთვის შეძლეს.
დაიკარგა არა მხოლოდ ალექსანდრე ჩაჩბა-შერვაშიძის ნახატები, არამედ ისეთი ცნობილი აფხაზი ოსტატების, როგორებიც არიან ვარვარა ბუბნოვა, ბორის პეტროვი, ვლადიმერ კონტარევი, მარინა ეშბა, ვიტალი ლაკრბა, ვალერი გამგია, ვიტალი ძენია, ამირან ადლეიბა, ოლგა ბრენდელი და მრავალი სხვა.
ეროვნული სამხატვრო გალერეა მდებარეობდა ორსართულიან უძველეს შენობაში. ადგილობრივი ხელოვანები 1990-იანი წლებიდან რეგულარულად სთხოვდნენ მთავრობას ახალი გალერეისა და ხელოვნების ნიმუშების შესანახი საცავის აშენებას.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
