აფხაზეთის უზენაესმა სასამართლომ დააკმაყოფილა ოპოზიციის სარჩელი გენერალური პროკურატურის წინააღმდეგ
აფხაზეთის სასამართლომ დააკმაყოფილა ოპოზიციის სარჩელი
აფხაზეთის უზენაესმა სასამართლომ დააკმაყოფილა ოპოზიციის სარჩელი, აღიარა გენერალური პროკურატურის უმოქმედობა და დაავალდებულა უწყება ანგარიში ჩააბაროს “აჩგუარას” მაღალი ძაბვის ხაზის კაპიტალური რემონტისთვის თანხების შესაძლო გაფლანგვის შესახებ.
გენერალურ პროკურატურასა და ოპოზიციის ლიდერ ადგურ არძინბას შორის დაპირისპირება 2022 წლის ნოემბერში დაიწყო, როდესაც არძინბამ პრესკონფერენციაზე წარმოადგინა დოკუმენტები, რომლებიც ადასტურებდა, რომ “აჩგუარის” ელექტრო გადამცემი ხაზის შესაკეთებელი აღჭურვილობა და მასალები გაბერილ ფასებში იყო შეძენილი. ოპოზიციონერის გათვლებით, ამ თაღლითობის შედეგად, სულ მცირე, 50 მილიონი რუბლი [დაახლოებით 510 ათასი დოლარი] საბიუჯეტო სახსრები მოიპარეს.
აფხაზეთის ე.წ. პრეზიდენტმა ასლან ბჟანიამ იმავე დღეს დაავალა გენერალურ პროკურატურას ამ ფაქტზე გამოძიების დაწყება და მას ამისთვის ორი კვირა მისცა.
მაგრამ გენერალური პროკურატურა, ცხადია, არ ჩქარობდა პრეზიდენტის დავალების შესრულებას და ხუთი თვის შემდეგ, მიმდინარე წლის აპრილში, ადგურ არძინბამ გენერალური პროკურორი და მისი მოადგილე უმოქმედობაში დაადანაშაულა.
ასე რომ, სასამართლომ ოპოზიციონერს მხარი დაუჭირა, ცნო გენერალური პროკურატურის უმოქმედობა და დაავალა მას, მიეწოდებინა “აჩგუარის” ხაზზე არსებული მასალების სრული დანახარჯები.
- თბილი საბანი და ცირკი სახლში – როგორ გადააქვთ აფხაზეთის მცხოვრებლებს უშუქობა
- აფხაზეთის ოპოზიციის ლიდერმა პრეზიდენტს რვა შეკითხვა დაუსვა და მიანიშნა, რომ მისი გადადგომის დროა
გენერალურმა პროკურატურამ შესაძლოა კვლავ სცადოს ამ განაჩენის გასაჩივრება უმაღლეს ორგანოში – უზენაესი სასამართლოს პრეზიდიუმში. თუმცა, ექსპერტების უმეტესობის აზრით, გასაჩივრების შანსი ნულის ტოლია. იმიტომ, რომ საქმე არა მხოლოდ ამ კონკრეტულ პროცესშია, არამედ იმ დაპირისპირებაშიც, რომელიც ბოლო პერიოდში წარმოიშვა გენერალურ პროკურატურასა და სასამართლოს შორის.
აგვისტოში გენერალურმა პროკურორმა სასამართლო სისტემა კორუფციული საქმეების მიჩქმალვაში დაადანაშაულა. პროკურორის თქმით, თუ არ დაისჯებიან კორუმპირებული პირები, არ გათავისუფლდებიან მოსამართლეები და პარლამენტი სისხლის სამართლის საპროცესო კოდექსში გარკვეულ ცვლილებებს არ მიიღებს, მაშინ კორუფციულ საქმეებში პროგრესი არ იქნება.
ამ განცხადებას, თავის მხრივ, მკაცრად გამოეხმაურა მოსამართლეთა კორპუსი, რომელმაც გენერალური პროკურატურა არაპროფესიონალიზმში დაადანაშაულა.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
