აფხაზეთის ოპოზიციის ლიდერმა პრეზიდენტს რვა შეკითხვა დაუსვა და მიანიშნა, რომ მისი გადადგომის დროა

აფხაზური ოპოზიციის ლიდერი

აფხაზური ოპოზიციის ლიდერი ადგურ არძინბა მიიჩნევს, რომ ასლან ბჟანიას ხელისუფლებაში ყოფნის სამი წელი საკმარისი პერიოდი უნდა ყოფილიყო მისი საარჩევნო დაპირებების შესასრულებლად. ეს ნარატივი არძინბამ მედიის საშუალებით პრეზიდენტისადმი მიმართვისას განავითარა, კერძოდ, მას რიტორიკული კითხვები დაუსვა.

• ვინ და რატომ აპირებს შექმნას ახალი პარტიები ცხინვალში
• სკანდალი აფხაზეთში სახელმწიფო შესყიდვებში შესაძლო ქურდობის გამო

„მე არ გავამახვილებ ყურადღებას ოპოზიციაში თქვენს საქმიანობაზე და იმ პერიოდში თქვენს განცხადებებსა და დასკვნებზე, მაგრამ მინდა შევეხო წინასაარჩევნო ეტაპს“, – წერს ადგურ არძინბა და პრეზიდენტს ეკითხება:

1. თქვენ დაგვპირდით, რომ ხელისუფლებაში ყოფნის სამი წლის თავზე, ავტოავარიების და მათ შედეგად დაღუპულთა რიცხვი განახევრდებოდა, წინააღმდეგ შემთხვევაში, თანამდებობას დატოვებდით. როდის შეიძლება ველოდოთ თქვენს გადადგომას – თუ ეს უბრალოდ ცარიელი სიტყვებია?
   
2. თქვენ თქვით, რომ ნახევარი საპრეზიდენტო ვადის გასვლის შემდეგ, სახელმწიფოს მეთაურმა უნდა ჩაატაროს რეფერენდუმი ნდობისა და მისი პოლიტიკის მხარდაჭერის შესახებ. როდის შეიძლება ველოდოთ რეფერენდუმს, თუ ეს მხოლოდ ცარიელი სიტყვებია?
   
3. თქვენ თქვით, რომ სახელმწიფო ვერ უზრუნველყოფს თანამდებობის პირების ამხელა რაოდენობას და სახელმწიფო აპარატი მნიშვნელოვნად შემცირდება. როდის შეიძლება ველოდოთ საჯარო მმართველობის რეფორმას? თუ ისევ, ესეც მხოლოდ სიტყვებია?
   
4. შეგიძლიათ ცალსახა პასუხი გასცეთ – გაუქმდება იმპორტის დღგ თუ დროთა განმავლობაში გაქრება ის ჟანგი, რომელიც ჩვენს ეკონომიკას ფარავს?
   
5. თქვენ ასე გულმოდგინედ უწევთ პარლამენტში პროპაგანდას ბიჭვინთის სახელმწიფო აგარაკის რუსეთისთვის გადაცემის შესახებ შეთანხმებას, „ენერგეტიკის შესახებ“ კანონში ცვლილებებს და არც ერთი სიტყვა არ გითქვამთ, როდის აპირებთ დააინიციიროთ „ორგანიზებულ დანაშაულთან ბრძოლის შესახებ“ კანონი? თუ ეს კითხვა თქვენთვის არარელევანტურია? გვინდა გავიგოთ ამ კანონის მიღების კონკრეტული თარიღები.
   
6. თქვენ თქვით, რომ საკვანძო თანამდებობებზე დანიშვნისას ნეპოტიზმი უნდა გამოირიცხოს, მაგრამ ახლა სწორედ თქვენი მეგობრები და ახლობლები მუშაობენ მაღალ თანამდებობებზე, რომლებიც ძალიან სწრაფად გადაიქცნენ წარმატებულ „ბიზნესმენებად“.
   
7. ერთ დროს თქვენმა მხარდამჭერებმა ლამის სამოქალაქო ომამდე მიიყვანეს ქვეყანა თქვენი სავარაუდო მოწამვლის გამო; გარშემო ყველას და ყველაფერს უმოქმედობაში ადანაშაულებდნენ – თუმცა ხელისუფლებაში მოსვლის შემდეგ, თქვენ ამ საკითხზე გამოძიება არ ჩაგიტარებიათ.
   
8. თქვენ ბევრს ლაპარაკობდით თანამდებობის პირების პირად პასუხისმგებლობაზე, მაგრამ თქვენს მთავრობაში ჯერჯერობით არავინ აპირებს პასუხი აგოს კორონავირუსთან ბრძოლაში წარუმატებლობისთვის და იმისთვის, რომ პანდემიის მწვავე პერიოდში პენსიონერები ბანკომატების წინ რიგებში იდგნენ; სამთო მოპოვების ლეგალიზაციისა და ქვეყნის ენერგეტიკული სისტემის კოლაფსისთვის მიზანმიმართულად მცდარი გადაწყვეტილების გამო; ბიჭვინთის სახელმწიფო აგარაკის რუსეთისთვის გადაცემის შესახებ დეფექტური ხელშეკრულების გაფორმებისთვის, სადაც კოორდინატებში შეცდომები აღმოჩნდა, და ბევრი სხვა გახმაურებული ინციდენტი, რომლის მონაწილეები იყვნენ მაღალი თანამდებობის პირები.

რიტორიკული კითხვები ადგურ არძინბას აფხაზური საზოგადოების მიმართაც აქვს და ეს კითხვები ასევე შეიცავს დაუფარავ მინიშნებას, რომ პრეზიდენტმა, რომელიც სიტყვას არ ასრულებს, თანამდებობა უნდა დატოვოს:

„როგორ ფიქრობთ, მრავალტანჯულ აფხაზეთს, მდიდარი ისტორიითა და კულტურით, შეიძლება სათავეში ედგას ადამიანი, რომელიც დანაპირებს არ ასრულებს?

შეუძლია თუ არა ასეთ ადამიანს ამ რთულ, არასტაბილურ დროს ჩვენი ხალხის გაძღოლა ყველა მომავალი განსაცდელის დროს?

შესაძლებელია თუ არა მას ვანდოთ ჩვენი ხალხის ბედი კრიტიკულ ისტორიულ პერიოდში, როდესაც შეიძლება კვლავ დადგეს საკითხი ჩვენი ეთნოსის გადარჩენის შესახებ?”

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო