საქართველოს პარლამენტმა "უკრაინის მხარდამჭერი" რეზოლუცია მიიღო. რუსეთი ნახსენები არ არის
უკრაინის მხარდამჭერი რეზოლუცია
74 ხმით საქართველოს პარლამენტმა “უკრაინის მხარდამჭერი” რეზოლუცია მიიღო, სადაც რუსეთი ნახსენები არ არის.
“რეზოლუციით საქართველოს პარლამენტი გამოხატავს ღრმა შეშფოთებას უკრაინაში შესაძლო სამხედრო ესკალაციის გამო და გმობს ყოველგვარ განზრახვას, რომელიც სუვერენული სახელმწიფოს სუვერენიტეტისა და ტერიტორიული მთლიანობის წინააღმდეგ შეიძლება იყოს მიმართული, რაც ახალ საფრთხეს უქმნის არამხოლოდ უკრაინის, არამედ რეგიონულ მშვიდობასა და უსაფრთხოებას.” – აღნიშნულია პარლამენტის პრესსამსახურის მიერ გავრცელებულ რელიზში.
საგარეო კომიტეტის სხდომა მთელი დღის განმავლობაში ხმაურით მიმდინარეობდა. პარლამენტის წევრები ოპოზიციიდან კატეგორიულად მოითხოვდნენ რეზოლუციის ტექსტში რუსეთის ჩაწერას, თუმცა უშედეგოდ.
“დღეს საქართველოს სახელმწიფო ჰიმნის ფონზე მათ [ენმ-მ] პარლამენტის სხდომათა დარბაზში გაშალეს სააკაშვილის, ამ პათოლოგიური კაცის ბანერი. ამით ყველაფერი არის ნათქვამი. მათთვის ქვეყანაც, სახელმწიფოც, სამშობლოც არის ეს ავადმყოფი კაცი და ასეთი პოლიტიკური ძალისგან და ადამიანებისგან, ბუნებრივია, სიკეთეს არ უნდა მოელოდე”, – განაცხადა “ქართული ოცნების” თავმჯდომარემ, ირაკლი კობახიძემ.
“ნაციონალური მოძრაობის” ფრაქციის თავმჯდომარის, ხატია დეკანოიძის თქმით, დღეს ამ პარლამენტის დარბაზში სრული ლუსტრაცია მოხდა:
“როგორც პარლამენტის წევრი და მოქალაქე, შინაგანად დამცირებულიც ვარ. მე ნამდვილად არ მიმაჩნია, რომ მთელი ამ დღეების განმავლობაში მოლაპარაკებები იყო რაიმე სახის სიფრთხილიდან გამომდინარე. ყველაფერი იყო ძალიან მიზანმიმართული. ამას აქვს მხოლოდ და მხოლოდ ერთი სახელი. ეს არის, რა თქმა უნდა, რუსეთის მიმართ განსაკუთრებული მაამებლური და კეკლუცი დამოკიდებულება ქართული ოცნების მხრიდან.” – თქვა დეკანოიძემ.
● მოსკოვს „მოთმინება ამოეწურა“: როგორ მოიქცევა დასავლეთი უკრაინასთან და საქართველოსთან?
● პოლიტიკური კრიზისი და პრორუსული განწყობები. როგორ ხედავენ საქართველოს უკრაინელი ჟურნალისტები
● სერგეი ლავროვი: საქართველოს NATO-ში ძალით შეყვანას ცდილობენ
26 იანვარს მმართველი პარტიის წარმომადგენლებსა და ოპოზიციონერ დეპუტატებს შორის, უკრაინის მხარდასაჭერი რეზოლუციის შედგენის მიზნით, შეხვედრა გაიმართა, თუმცა ის უშედეგოდ დასრულდა – დეპუტატები რეზოლუციის ტექსტზე ვერ შეთანხმდნენ. ამის მიზეზი კი გახდა ის, რომ “ქართული ოცნების” მიერ შედგენილ ტექსტში რუსეთი არსადაა ნახსენები.
ოპოზიციონერების თქმით, სადავოა ტექსტის ფორმულირება რუსეთისა და NATO-ს შესახებ, და ასევე, ტექსტის სათაურიც.
პარტია “დროამ” უკრაინის მხარდამჭერი ალტერნატიული პეტიცია შექმნა, რომელიც სოციალურ ქსელებში უკვე გავრცელდა და მასზე ხელმოწერა ნებისმიერ ადამიანს შეუძლია. პარტიის ლიდერის, ელენე ხოშტარიას თქმით, ხელმოწერები ქუჩაშიც შეგროვდება.
● რა იქნება შემდეგ, ომი? მოკლედ იმის შესახებ, თუ რას ითხოვს მოსკოვი
● უკრაინის სოლიდარობის აქცია თბილისში: “საქართველოს ხელისუფლებისგან უკრაინის მხარდაჭერას ვერ ვხედავთ”
უკრაინის თავდაცვის სამინისტროს მთავარი სადაზვერვო სამმართველოს ხელმძღვანელმა კირილ ბუდანოვმა 2021 წლის 21 ნოემბერს განაცხადა, რომ რუსეთი 2022 წლის იანვარ-თებერვალში უკრაინის აღმოსავლეთსა და სამხრეთზე შესაძლო თავდასხმისთვის ემზადებოდა. დაზვერვის მონაცემებით, უკრაინის საზღვრებთან 92 ათასი რუსი სამხედროა განლაგებული.
რუსეთის პრეზიდენტის პრესმდივანმა დიმიტრი პესკოვმა უკრაინაზე თავდასხმის საფრთხის შესახებ ინფორმაციას ხელოვნურად შექმნილი ისტერია უწოდა. მისი ვარაუდით, სწორედ კიევს სურს საომარი მოქმედებების დაწყება ოკუპირებული ტერიტორიების გასათავისუფლებლად.
თუმცა, უკვე 18 დეკემბერს მოსკოვმა რიტორიკა შეცვალა. საგარეო საქმეთა მინისტრის მოადგილე ალექსანდრ გრუშკომ განაცხადა, რომ თუ დასავლეთი სერიოზულად არ მიიღებს მოსკოვის მიერ შეთავაზებულ „უსაფრთხოების გარანტიებს“, რომლებიც ითვალისწინებს უარს უკრაინის ნატო-ში შესვლაზე, მაშინ რუსეთი „სამხედრო-ტექნიკურ ალტერნატივას“ გამოიყენებს.
