სერგეი ლავროვი: საქართველოს NATO-ში ძალით შეყვანას ცდილობენ
რუსეთის საგარეო საქმეთა მინისტრის, სერგეი ლავროვის თქმით, საქართველოს NATO-ში “ძალით შეყვანას” ცდილობენ. ამის შესახებ მან აფხაზეთისა და ცხინვალის დე ფაქტო საგარეო საქმეთა მინისტრებთან შეხვედრის შემდეგ, პრესკონფერენციაზე განაცხადა.
ლავროვის განმარტებით, დე ფაქტო მინისტრებთან შეხვედრის დროს არ განუხილავთ ჰიპოთეტური სცენარები, “მათ შორის მოსახლეობის დიდი ნაწილის ნების საწინააღმდეგოდ, NATO-ში საქართველოს ძალით შეყვანასთან დაკავშირებული სცენარები”.
“ჩვენი პოზიცია NATO-ს გაფართოებასთან დაკავშირებით ცნობილია: წითელი ხაზი იქნება, თუ ალიანსი გააგრძელებს რუსეთის ფედერაციის საზღვრებთან უფრო და უფრო ახლოს გადაადგილებას”, – ამბობს ლავროვი.
დღესვე კომენტარი გააკეთა აშშ-ს სახელმწიფო დეპარტამენტის სპიკერმა ნედ პრაისმაც. NATO-ს საკითხზე საუბრისას პრაისმა განაცხადა, რომ არც ერთ ქვეყანას არ აქვს უფლება დაადგინოს სხვა სახელმწიფოს საზღვრები.
“საერთაშორისო სამართლის ფუნდამენტური პრინციპია, რომ არც ერთ ქვეყანას, როგორი დიდი და გავლენიანიც არ უნდა იყოს, რამდენად ძლიერი სამხედრო შეიარაღებაც არ უნდა ჰქონდეს, თუნდაც ჰქონდეს ბირთვული იარაღი, არ აქვს უფლება, განსაზღვროს სხვა ქვეყნის საზღვრები, შეავიწროოს, დააშინოს პატარა სახელმწიფოები, რათა იძულების გზით მიაღწიოს საკუთარ მიზნებს. ეს არაა ის, რასაც აშშ, ჩვენი პარტნიორები, ჩვენი მოკავშირეები მხარს მოითმენენ, იქნება ეს ევროპის, ინდო-წყნარი ოკეანის თუ სხვა კონტექსტში”, – აღნიშნავს ნედ პრაისი.
● „მსოფლიომ დემოკრატია გადაიყვარა და დიქტატურისკენ გადაიხარა“ – რუსი ნობელიანტის სიტყვა
● საქართველო, უკრაინა და მოლდოვა მოუწოდებენ ევროკავშირს, აღიაროს მათი ევროპული პერსპექტივა
● გაიმართა აბაშიძე კარასინის ონლაინ შეხვედრა. საქართველო 3+3 ფორმატში მონაწილეობას არ განიხილავს
NATO-ს 2008 წლის ბუქარესტის სამიტზე მხარი დაუჭირეს გადაწყვეტილებას, რომ საქართველო და უკრაინა გახდებიან NATO-ს წევრები.
2021 წლის 9 დეკემბერს რუსეთის საგარეო საქმეთა სამინისტრომ ნატოსგან მოითხოვა, გააუქმოს გადაწყვეტილება ჩრდილოატლანტიკურ ალიანსში საქართველოსა და უკრაინის შესვლაზე.
“ევროპული უსაფრთხოების საფუძვლიან ინტერესში უნდა იყოს, რომ დაუყოვნებლივ გაუქმდეს ბუქარესტის სამიტის 2008 წლის გადაწყვეტილება, რომ საქართველო და უკრაინა ნატოს წევრები გახდებიან, რაც წინააღმდეგობაში მოდის ეუთოს წევრი ქვეყნების ვალდებულებასთან არ გააძლიერონ თავიანთი უსაფრთხოება, სხვათა უსაფრთხოების ხარჯზე” – ნათქვამია რუსეთის საგარეო სამინისტროს განცხადებაში.
როგორც საქართველოს საგარეო უწყებაში აღნიშნავენ, NATO-ში გაწევრიანების მიზანი ასახულია საქართველოს კონსტიტუციაშიც. მათივე თქმით, ბუქარესტის სამიტზე მიღებული გადაწყვეტილება გამეორებულ იქნა 2008 წლის შემდგომ გამართულ ნატო-ს ყველა სამიტზე. 2021 წელს ბრიუსელში ნატო-ს სამიტზე მიღებული კომუნიკე კი ხაზს უსვამს, რომ მოკავშირეები დაუშვებლად მიიჩნევენ ქვეყნების საგარეო პრიორიტეტების განსაზღვრაში ნებისმიერი მესამე მხარის ჩარევას.
