ბაქოში, ერთ-ერთი რესტორნის ეზოში, სამსახურებრივი მოვალეობის შესრულების დროს სცემეს ოპოზიციური YouTube-არხის ჟურნალისტ ავაზ ჰაფიზლის. ექიმების განცხადებით, მას ხელი აქვს მოტეხილი.
28 სექტემბერს, გვიან საღამოს, ოპოზიციური YouTube-არხის, Kanal13-ის ჟურნალისტი ავაზ ჰაფიზლი ქალაქ ბაქოში, ბინაგადის რაიონში მდებარე რესტორნისკენ გაემართა. Turan-ის ინფორმაციით, იქ გახსნის საზეიმო ცერემონია მიმდინარეობდა, სადაც მაღალი რანგის ჩინოვნიკები იკრიბებოდნენ.
ჰაფიზლის თქმით, რომელიც იქ ვიდეოგადაღებას აწარმოებდა, რესტორნის კარი დაკეტილი იყო და მხოლოდ დაცვასთან სატელეფონო ზარის შემდეგ იხსნებოდა.
არსებული მონაცემებით, რესტორანი „დეირმანი“, სადაც ღონისძიება ტარდებოდა, ქალაქ ბაქოს ისამალის რაიონის აღმასრულებელი ხელისუფლების თავკაცს, ელდარ გასანოვს ეკუთვნის. ჟურნალისტმა ამის შესახებ დაწესებულების დაცვას ჰკითხა და დაინტერესდა, რატომ არ უშვებდნენ რიგით კლიენტებს შიგნით.
სოციალურ ქსელებში გავრცელებული ვიდეოდან ნათელი ხდება, რომ ხანმოკლე საუბრის შემდეგ, დაცვის თანამშრომელი ჟურნალისტის მიმართ ფიზიკურ ძალას იყენებს, რის შემდეგაც გადაღება წყდება.
ჰაფიზლი აღნიშნავს, რომ ფიზიკური ძალა მის წინააღმდეგ რესტორნიდან მიღებული ბრძანების შემდეგ გამოიყენეს. „დაცვის თანამშრომლებმა ჟურნალისტი რესტორნის გვერდით მდებარე კაზინოს ღობით გარშემორტყმულ ეზოში შეათრიეს და ერთი ტელეფონი წაართვეს, მეორე ტელეფონი კი ჟურნალისტმა ადრევე დამალა. გააფრთხილეს, რომ ტელეფონს არ დაუბრუნებდნენ, მაგრამ მის ნაცვლად შეეძლოთ ძვირადღირებული „აიფონი“ ეჩუქებინათ. შემდეგ ჟურნალისტს ქრთამი შესთავაზეს, ჰაფიზლიმ უარი უთხრა, გაშვება და მისი კუთვნილი ტელეფონის დაბრუნება მოსთხოვა. მაშინ მოლაპარაკებები მუქარამ შეცვალა, რომ გამოიყენებდნენ ბოთლსა და სხვა ნივთებს, რომელსაც შესაბამის წრეებში, ძალადობის ინსტრუმენტად იყენებენ“.
ჟურნალისტმა პოლიციაში დარეკვა მოახერხა. შემთხვევის ადგილზე მისულმა პოლიციელებმა ჰაფიზლი და რესტორნის ერთ-ერთი თანამშრომელი პოლიციის განყოფილებაში გადაიყვანეს. იქ ორივე მხარემ წერილობით მისცა ჩვენება.
დღეს დილით, ჰაფიზლის ტრავმატოლოგიის ინსტიტუტში ხელის მოტეხილობა დაუდგინეს და ექიმებმა თაბაშირი დაადეს.
ავაზ ჰაფიზლი ასევე ცნობილია, როგორც LGBTQI+ თემის წარმომადგენლების უფლებების დამცველი. ცოტა ხნის წინ მან ერთკაციანი საპროტესტო აქცია გამართა აზერბაიჯანის გენერალური პროკურატურის წინ. JAMnews-ის გვერდი სოციალურ ქსელებში ამ აქციის პირდაპირ რეპორტაჟს აწარმოებდა.
