საქართველოში ბავშვთა პირველი ჰოსპისი გაიხსნა

თბილისში  ბავშვთა პირველი ჰოსპისი გაიხსნა – პალიატიური მზრუნველობის დაწესებულება, სადაც ქრონიკული და განუკურნებელი დაავადებების მქონე ბავშვებს უფასოდ მოემსახურებიან.

ბავშვთა ჰოსპისი სამი ძირითადი მიმართულებით იმუშავებს: 24 საათიანი მომსახურება ერთდროულად 10 ბავშვისთვის, დღის ცენტრი, სადაც ბავშვები და მათი მშობლები დღის განმავლობაში მიიღებენ საჭირო მომსახურებას და შინ ზრუნვის სამსახური, რომელიც  ბავშვებს ბინაზე მოემსახურება.

ჰოსპისი სახელწოდებით „ციცინათელების ქვეყანა“ ფონდ „ღია საზოგადოება – საქართველოს“ თაოსნობით, ამ ორგანიზაციისა და სხვა დონორების დაფინანსებით შეიქმნა.

ჰოსპისის გახსნისას, საქართველოს პირველმა ლედიმ მაკა ჩიჩუამ „უპრეცედენტო“ უწოდა ბიზნესსექტორის, სახელმწიფოსა და ინდივიდუალური დონორების გაერთიანებას ასეთ „საქველომოქმედო და ღირსეულ საქმეში“ მონაწილეობის მისაღებად.

ბავშვთა ჰოსპისის მშენებლობა 2015 წლის ოქტომბერში, ფონდ „ღია საზოგადოება-საქართველოს“ ინიციატივით, სამედიცინო კორპორაცია „ევექსის“ პირველი ფინანსური შენატანით და საქართველოს პრეზიდენტის სარეზერვო ფონდის დახმარებით დაიწყო. მას შემდეგ, ჰოსპისს ასობით დონორი გამოუჩნდა რიგითი მოქალაქეების და ბიზნესკომპანიების სახით. ერთი წლის მანძილზე ჰოსპისის მშენელობისთვის 1 მილიონ ლარზე მეტი შეგროვდა.

ბავშვთა ჰოსპისის აშენების იდეა 2013 წელს ჩატარებული კვლევის შემდეგ გაჩნდა, რომლის მიზანი ბავშვებისთვის პალიატიური მზრუნველობის საჭიროების შესწავლა იყო. როგორც კვლევამ აჩვენა, საქართველოში პალიატიური მზრუნველობა ყოველწლიურად 0-დან 18 წლამდე 839 ბავშვს ესაჭიროება.