ლარი გაუფასურდა - პროდუქტები გაძვირდა

ეროვნული ბანკის მონაცემებით, 1 აშშ დოლარი 3.0118 ლარი ღირს.

გაძვირდა ევროც. დღეს ერთი ევროს ფასი 3.3684 ლარია.

ბოლო ათ დღეში ლარი დოლართან მიმართებით 23 თეთრით, ხოლო ევროსთან – 26 თეთრით გაუფასურდა.

ეროვნული ბანკის გაცხადებით, კორონავირუსის პანდემიით გამოწვეული გაურკვევლობა “მოლოდინების არხით გადაეცემა ფინანსურ ბაზრებს და მათ შორის, სავალუტო კურსს, რისი შედეგიც, გამყარების ერთთვიანი პერიოდის შემდეგ, ლარის ბოლოდროინდელი გაუფასურებაა”.

სებ-მა ლარის გასამყარებლად 13 მარტს სავალუტო აუქციონზე 20 მლნ დოლარი გაყიდა.

• რამდენად რეალისტურია საქართველოს მთავრობის ეკონომიკური გეგმა? განვიხილავთ პუნქტობრივად

• სესხების გადავადება დაიწყო – საშეღავათო პერიოდის დასრულების შემდეგ გადასახდელი თანხა გაგეზრდებათ

• საქართველოს მთავრობა აქვეყნებს კონკრეტულ გეგმას ეკონომიკის გადასარჩენად. რა წერია გეგმაში

ლარის გაუფასურების და კორონავირუსის გავრცელებით გამოწვეული აჟიოტაჟის გამო  სურსათზე  ფასები გაიზარდა.

სავაჭრო ცენტრებში, სადაც განსაკუთრებული ხალხმრავლობაა, ხალხი დიდი რაოდენობით კარტოფილს, ფქვილს და შაქარს ყიდულობს.

ბოლო რამდენიმე დღეში შაქარი  40 თეთრით გაძვირდა. ახლა ერთი კილოგრამი შაქრის ფასი 2 ლარია.

2 ლარამდე, თითქმის 80 თეთრით გაძვირდა 1 კგ კარტოფილიც. ერთი ტომარა ფქვილი, რომელიც აქამდე 26 ლარი ღირდა, ახლა 28 ლარი ღირს.

განსაკუთრებული ხალხმრავლობაა ჰიპერმარკეტებში. ლარის გაუფასურების გამო მოსალოდნელი გაძვირების და კორონავირუსის გავრცელების საშიშროების ფონზე, მოსახლეობა  ცდილობს, რაც შეიძლება ბევრი პროდუქტი მოიმარაგოს.

საქართველოს ეკონომიკისა და მდგრადი განვითარების მინისტრის, ნათია თურნავას თქმით ქვეყანაში სურსათის დეფიციტის შექმნის საფრთხე არ არსებობს, რადგან ტვირთები საქართველოში ისევ ჩვეულებრივ  შემოდის:

“მინდა ვუთხრა ჩვენს მოსახლეობას, რომ სურსათის მარაგი არ შეწყდება. მარაგი ყოველდღიურად ახლდება. მომარაგების თვალსაზრისით არანაირი პრობლემა არ არის. ჩვენ შევზღუდეთ მგზავრების შემოსვლა ქვეყანაში, მაგრამ, რაც შეეხება სასაქონლო მარაგების და ტვირთების შემოსვლას, წუხილის რაიმე საფუძველი არ არსებობს”, – განაცხადა თურნავამ.

პრემიერ-მინისტრის დავალებით, ქვეყანაში შექმნილია სურსათის მარაგებისა და ფასების რეგულაციის სამუშაო ჯგუფი, რომელსაც ვიცე-პრემიერი მაია ცქიტიშვილი ხელმძღვანელობს.