მოსაზრება: ფაშინიანი მართალია, სომხეთის ევროკავშირისკენ სვლა გართულდება, თუ საქართველო დარჩება არსებულ მდგომარეობაში
ფაშინიანის განცხადება საქართველოზე
“სტრატეგიული ანალიზის ცენტრის“ დამფუძნებელმა გიორგი რუხაძემ შეაფასა სომხეთის პრემიერმინისტრის, ნიკოლ ფაშინიანის განცხადება, რომლის თანახმად, ევროკავშირში სომხეთის ინტეგრაციის გზაზე ერთ-ერთი ყველაზე დიდი დაბრკოლება ევროკავშირსა და საქართველოს შორის პოლიტიკური დიალოგის გაყინვაა. ექსპერტი მიიჩნევს, რომ ფაშინიანის განცხადება სომხეთის ეროვნული ინტერესებიდან გამომდინარეობს და რეალობას ასახავს.
“თუმცა, გულწრფელად რომ ვთქვა, უდიდესი პრობლემა სომხეთის ევროინტეგრაციის გზაზე ამჟამად არის ევროკავშირსა და საქართველოს შორის გაყინული პოლიტიკური დიალოგი. საქართველო ჩვენთვის არის გზა ევროკავშირისკენ. ჩვენ ევროკავშირში გაწევრიანების დაწყების პროცესის კანონი მივიღეთ მას შემდეგ, რაც საქართველომ ევროკავშირის წევრობის კანდიდატის სტატუსი მიიღო. ამან სომხეთის ევროკავშირის წევრობის პერსპექტივა ხელშესახები გახადა და ველით და ვითხოვთ ევროკავშირსა და საქართველოს შორის კონსტრუქციული პროცესის განვითარებას. ეს მნიშვნელოვანია სომხეთისთვის. ეს იმდენადვე მნიშვნელოვანია, რამდენადაც საქართველოსთვის.” – თქვა სომხეთის პრემიერმინისტმრა, ნიკოლ ფაშინიანმა ევროპარლამენტში სიტყვით გამოსვლის დროს.
გიორგი რუხაძე: “სომხეთის პრემიერმინისტრ ფაშინიანის განცხადება გამომდინარეობს სომხეთის ეროვნული ინტერესებიდან. რასაც ფაშინიანი ამბობს, მართალია. სომხეთის ევროკავშირისკენ სვლა სერიოზულად გართულდება, თუ საქართველო დარჩება იმ მდგომარეობაში, როგორშიც არის. პრემიერმინისტრ ფაშინიანს განმარტებები არ გაუკეთებია, თუ რატომ არის გაჩერებული, მაგრამ სინამდვილეში ხომ ვიცით?!
ყველაფერი სხვანაირად იქნებოდა, საქართველოს რომ არ მართავდეს რუსი ოლიგარქი. ივანიშვილი, იგივე ქართველი აიათოლა დღეს მართავს საქართველოს
ამის გამო არის ევროკავშირთან გაჩერებული მოლაპარაკებები, საფრთხეშია უვიზო მიმოსვლაც, სხვათა შორის ასოცირების ხელშეკრულებაც საფრთხეშია.
ამ ვითარებას ვერანაირი დიალოგი ვერ უშველის. მიზეზი რის გამოც საქართველო ამ მდგომარეობაშია, როგორც სახელმწიფო, ამას მხოლოდ ერთი მიზეზი აქვს: ეს არის ივანიშვილის რუსული და არალეგიტიმური ხელისუფლება.
მოლაპარაკებების აუცილებლობა მას შემდეგ გაჩნდება, რაც დადგება მომენტი, როდესაც ივანიშვილის რეჟიმი დაინახავს, რომ კარგავს ხელისუფლებას. მხოლოდ ამ შემთხვევაში წავა მოლაპარაკებებზე. ბოლო 2 წლის განმავლობაში გინახავთ “ქართულ ოცნებას“ რამეზე დაეხიოს უკან?
დღეს სალაპარაკო არაფერი არ არის. ვის უნდა ელაპარაკო, რუსებს? რაზე უნდა ელაპარაკო რუს ოკუპანტებს, რომ პოლიტიკაში რაღაც ადგილი გამოგიყონ? სამწუხაროდ, სალაპარაკო არაფერი არ არის.
ერთადერთი გამოსავალი არის ერთიანობა. ამ ერთიანობის გაფართოება. გაფართოებული ერთიანობით “ქართული ოცნებისთვის“ კიდე უფრო მეტი პრობლემის შექმნა. ამას დაემატება გარე ფაქტორები, რომლებიც “ქართული ოცნების“ სასარგებლოდ აღარ მუშაობს.“
