მოსაზრება: ევროპის სტრუქტურებმა საქართველოს ხელისუფლებას ვერდიქტი გამოუტანეს
იაგო კაჭკაჭიშვილის მოსაზრება
სოციოლოგ იაგო კაჭკაჭიშვილის განცხადებით, ევროკომისიამ ანგარიშით თქვა, რომ ვიდრე “ქართული ოცნება“ ხელისუფლებაშია, საქართველოს ევროკავშირში ინტეგრაცია გამორიცხულია.
ექსპერტის შეფასებით, მმართველი პარტია წლების განმავლობაში ცდილობდა, საკუთარი ამომრჩევლისთვის ეჩვენებინა, თითქოს ევროკავშირში გაწევრიანება მხოლოდ დროის საკითხია, თუმცა რეალურად “ქართული ოცნება“ ამ პროცესს აჩერებდა და დასავლეთის მიმართ ნდობას ანგრევდა.
მისივე თქმით, ამ რიტორიკის პარალელურად, ხელისუფლება შიდა პოლიტიკაში ოპოზიციის დევნისა და პოლიტიკური ველის გაწმენდის ტაქტიკას იყენებს.
ევროკომისიის 2025 წლის გაფართოების ანგარიშის მიხედვით, საქართველოს ევროკავშირთან ინტეგრაციის პროცესის საფუძვლები ბოლო წლის განმავლობაში მნიშვნელოვნად დასუსტდა. ანგარიშში აღნიშნულია, რომ მთავრობის გადაწყვეტილებამ პრაქტიკულად შეაჩერა გაწევრიანების პროცესი.
გაფართოების საკითხებში ევროკავშირის უმაღლესი კომისრის, მარტა კოსის განცხადებით, გაერთიანების წევრობის კანდიდატების ისტორიაში საქართველოს ყველაზე ცუდი ანგარიშის დასკვნა ჰქონდა.
იაგო კაჭკაჭიშვილი: “ასეთი მკაცრი და ხისტი შეფასება საქართველოს ხელისუფლებას ევროკავშირის გაფართოების კონტექსტში არ მიუღია. ეს შეფასება იმდენად ხისტია, რომ ფაქტობრივად მათ თქვეს, რომ ვიდრე “ქართული ოცნება“ იქნება ხელისუფლებაში საქართველოს ევროკავშირში ინტეგრაცია გამორიცხულია. ფაქტობრივად ეს არის ვერდიქტი, რომელიც ევროპის სტრუქტურებმა საქართველოს ხელისუფლებას გამოუტანეს.
“ქართულ ოცნებას“ მუდმივად ჰქონდა პოზიცია, რომ ისინი აჩერებდნენ ევროკავშირთან გაწევრიანების მოლაპარაკებების პროცესს, მაგრამ პროცესი განახლდება 2028 წელს და 2030 წელს “დიდი ალბათობით შევალთ ევროკავშირში“. ამ შემთხვევაში “ქართული ოცნების“ ლოგიკას ასეთი შინაარსი ჰქონდა, რომ ევროკავშირში გავლენას კარგავენ ლიბერალური ძალები, ძლიერდებიან კონსერვატორები. ეს იყო სატყუარა, რომელსაც “ქართული ოცნება“ საკუთარ ამომრჩეველს აწვდიდა.
“ქართული ოცნება“ გადაერთო მესიჯზე, რომ სულერთია ევროკავშირი ლიბერალური იქნება თუ კონსერვატიული, საქართველოს მტერია და საქართველომ უარი უნდა თქვას ევროკავშირში გაწევრიანებაზე. ის შიდა პოლიტიკა, რასაც “ქართული ოცნება“ მიმართავს – პოლიტიკური ველიდან ოპოზიციის გაწმენდა ემსახურება იმას, რომ პროდასავლურ ძალებს ეკრძალება არჩევნებში მონაწილეობა, პარტიები უქმდებიან, ამ დროს დიდი ალბათობით ჩატარდება ვადამდელი არჩევები იმისათვის, რომ “ქართულმა ოცნებამ“ მოიპოვოს კონსტიტუციური უმრავლესობა.
ის, რაც “ქართულმა ოცნებამ“ ჯერ ვერ მოახერხა, ცდილობს, მაგრამ ვერ მოახერხა, არის საზოგადოების უმრავლესობის თანხმობა ავტორიტარულ მართვაზე. ამას ვერ მიაღწია “ქართული ოცნების” ხელისუფლებამ. იმისთვის, რომ ავტორიტარულმა ხელისუფლებამ თავი მშვიდად იგრძნოს, მას არ ყოფნის არც ინსტიტუტების მიტაცება, არც პროპაგანდა, არც ავტორიტარიზმის სამართლებრივი გამყარება – თუ საზოგადოების უმრავლესობა არ გახადე ლოიალური შენი ძალაუფლების მიმართ, ისე ეს ძალაუფლება იქნება მყიფე.
ვფიქრობ, რომ “ქართულ ოცნებას“ რეფერენდუმის ჩატარებას ურჩევნია, ჩაატაროს რიგგარეშე არჩევნები მას შემდეგ, რაც პარტიებს აკრძალავს და ასპარეზზე შემოიყვანს იმ პარტიებს, რომლებიც 78-მუხლის ამოღებას ხმას მისცემენ. მას ურჩევნია შექმნას იმიტაცია მრავალპარტიული არჩევნების და ამ გზით მიაღწიოს კონსტიტუციიდან 78-ე მუხლის ამოღებას, ვიდრე რეფერენდუმის გზით.“
