სერგეი შოიგუ: საქართველოს ხელისუფლების გამძლეობა დასაფასებელია - დაიცვეს საქართველოს ინტერესები
სერგეი შოიგუ საქართველოზე
რუსეთის უშიშროების საბჭოს მდივანი, სერგეი შოიგუ “ქართულ ოცნებას” აქებს და მათ “გამძლეობას” უფასებს. მისი თქმით, საქართველოს ხელისუფლებამ ქვეყნისა და ხალხის ინტერესები დაიცვა. ამის შესახებ მან დსთ-ს ქვეყნების უშიშროების მდივნების შეხვედრის შემდეგ გამართულ პრესკონფერენციაზე ისაუბრა.
“არ შემიძლია არ აღვნიშნო, რომ საქართველოს ხელისუფლებამ შეძლო წინააღმდეგობა გაეწია ერთი თუ მეორე არჩევნების დროს საქართველოში ვითარების დესტაბილიზაციისკენ მიმართული დესტრუქციული ქმედებებისთვის. აქ, რა თქმა უნდა, უნდა დავაფასოთ ხელისუფლების გამძლეობა, ნამდვილად დაიცვეს საქართველოსა და ქართველი ხალხის ინტერესები.” – თქვა შოიგუმ.
შოიგუმ საქართველო შეხვედრის გახსნის დროსაც ახსენა. მან გაიმეორა “ქართული ოცნების” მტკიცება, თითქოს დასავლეთი ქვეყანაში სახელმწიფო გადატრიალებას უჭერდა მხარს და დაამატა, რომ მთლიანობაში სამხრეთ კავკასიის მიმართულებით ვითარება “უმჯობესდება”.
“პოსტსაბჭოთა სივრცეში გავლენის გამყარების მიზნით დასავლეთის ქვეყნები თავს, ფაქტობრივად, არაფრისგან იკავებენ. მათი უშუალო თანამშრომლობით გაყალბდა საპრეზიდენტო და საპარლამენტო არჩევნები მოლდოვაში, როცა ამ ქვეყნის მოქალაქეებს, რომლებიც რუსეთში ცხოვრობენ, ფაქტობრივად ჩამოართვეს ხმის მიცემის უფლება. საქართველოს ხელისუფლებამ განაცხადა საშინაო საქმეებში დაუფარავ ჩარევასა და სახელმწიფო გადატრიალების პროვოკაციებზე. ამავდროულად, მთლიანობაში, სამხრეთ კავკასიაში სიტუაციას გაუმჯობესების ტენდენცია გააჩნია. ამასთან ერთად, გამოვმდინარეობთ იქიდან, რომ სამშვიდობო პროცესს, პირველ რიგში, რეგიონული განზომილება უნდა ჰქონდეს. ამ კონტექსტში, აუცილებელია საკონსულტაციო რეგიონული ჯგუფის, პლატფორმა 3+3-ის მუშაობის განახლება. დიდი მნიშვნელობა აქვს რეგიონში სატრანსპორტო კომუნიკაციების განბლოკვას, რომელზე შეთანხმებაც ჯერ კიდევ სამმხრივი სამუშაო ჯგუფის ფარგლებში მოხდა.” – თქვა სერგეი შოიგუმ.
აღსანიშნავია, რომ გუშინ რუსეთის ფედერაციის უშიშროების საბჭოს მდივნის მოადგილემ, ალექსეი შევცოვმა განაცხადა, რომ დსთ-სა და კოლექტიური უსაფრთხოების ხელშეკრულების ორგანიზაციის (ОДКБ) წევრი ქვეყნები იზიარებენ რუსეთის მისწრაფებას, დაიცვან “ტრადიციული სულიერ-ზნეობრივი ღირებულებები”. რუსეთის თანამოაზრეებზე საუბრის დროს შევცოვმა ახსენა საქართველოც.
მისივე თქმით, რუსეთის პრიორიტეტია, რომ “ტრადიციული ღირებულებების” მცველის იმიჯი განავითაროს.
“საქართველოში ხელისუფლებამ გამონახა შესაძლებლობა და ძალა, უკუექცია ტრადიციულ წესრიგზე თავდასხმა, კავკასიელი ხალხებისთვის აბსოლუტურად შეუთავსებელი ფსევდოღირებულებების, როგორიცაა ლგბტ, ჩანერგვა. აზერბაიჯანში ოჯახის ინსტიტუტი გახლავთ ეროვნული მენტალიტეტის ოფიციალური იდეოლოგიის ერთ-ერთი უმთავრესი ელემენტი. ერთნაირსქესიანთა ქორწინება არ რეგისტრირდება, არ არის აღიარებული კანონის მიერ.” – თქვა შევცოვმა.
