აჭარის მთავრობის ყოფილმა თავმჯდომარემ, თორნიკე რიჟვაძემ თვითმკვლელობა სცადა. მისი მდგომარეობა მძიმეა
თორნიკე რიჟვაძემ თვითმკვლელობა სცადა
შინაგან საქმეთა სამინისტროს ინფორმაციით, 7 ივლისს, აჭარით მთავრობის ყოფილი თავმჯდომარე თორნიკე რიჟვაძე გულმკერდის არეში ცეცხლნასროლი ჭრილობით შეიყვანეს საგარეჯოს საავადმყოფოში. მას ადგილზე ჩაუტარდა გადაუდებელი ოპერაცია — დაზიანებულია ფილტვი, თუმცა ექიმების განცხადებით, მდგომარეობა სტაბილურად მძიმეა.
გამოძიება დაწყებულია სისხლის სამართლის კოდექსის 115-ე მუხლით, რაც თვითმკვლელობამდე მიყვანას გულისხმობს. შსს-ს ცნობით, საქმეზე ტარდება ინტენსიური საგამოძიებო მოქმედებები.
შსს-ს ინფორმაციით, ცეცხლსასროლი იარაღის დაუდევარი შენახვის ფაქტზე, სისხლის სამართლის კოდექსის 238-ე მუხლით, ერთი პირი დაკავებულია ბრალდებულის სახით. მედიის ინფორმაციით, ის საქართველოს საზღვაო ტრანსპორტის სააგენტოს დირექტორი ალექსი ახვლედიანია.
პირველი საუნივერსიტეტო კლინიკის კლინიკური დირექტორის ლალი ტურძელაძის ინფორმაციით, აჭარის მთავრობის ყოფილი თავმჯდომარე მართვით სუნთქვაზე იმყოფება და მისი მდგომარეობა კვლავ მძიმეა. როგორც მან მედიას განუცხადა, პაციენტს ყველა საჭირო სამედიცინო პროცედურა უტარდება.
“ყველაფერი უტარდება, რაც სჭირდება. მდგომარეობა მძიმეა. [ქირურგიული ჩარევა] ჩვენთან არ დასჭირვებია. იმყოფება მართვით სუნთქვაზე“, – განაცხადა ლალი ტურძელაძემ.
რას ამბობს შსს
“2025 წლის 7 ივლისს, საგარეჯოს „ჯეოჰოსპიტალსში“, შეყვანილი იქნა თორნიკე რიჟვაძე, რომელსაც გულმკერდის არეში ცეცხლნასროლი ჭრილობა აღენიშნებოდა.
შინაგან საქმეთა სამინისტროში გამოძიება სისხლის სამართლის კოდექსის 115-ე მუხლით არის დაწყებული, რაც თვითმკვლელობამდე მიყვანას გულისხმობს.ფაქტთან დაკავშირებით მიმდინარეობს ინტენსიური საგამოძიებო მოქმედებები.
თორნიკე რიჟვაძეს ჩაუტარდა გადაუდებელი სამედიცინო დახმარება. ექიმების განმარტებით, მას ფილტვი აქვს დაზიანებული და მისი ჯანმრთელობის მდგომარეობა სტაბილურად მძიმეა.
ასევე, ცეცხლსასროლი იარაღის დაუდევრად შენახვისთვის, საქართველოს სისხლის სამართლის კოდექსის 238-ე მუხლით, ბრალდებულის სახით ერთი პირია დაკავებული.”, – წერია უწყების განცხადებაში.
წერილი თვითმკვლელობის მცდელობამდე?
პროსამთავრობო ტელეკომპანია “იმედი” ავრცელებს ტექსტს, რომელიც, მათი მტკიცებით, რიჟვაძემ თვითმკვლელობის მცდელობამდე დაწერა.
„ალეკო არაფერ შუაშია, ჩუმად ავიღე. ეს კაცი ძმობის მაგალითია. მიზეზი ერთია, მაბრალებენ იმას ( კორუფციას და ბარიგების მფარველობას ) რასაც მთელი ცხოვრება ვებრძოდით მეც და მამაჩემიც. დავიღალე – დიდი გამარჯვებაც ვნახე და წარუმატებლობაც. პატიებას ვთხოვ ოჯახს, პატრიარქს. მამა შენ ნომერი პირველი კაცი იქნები ჩემთვის ღირსებაში.
დათა კაცური კაცი გაიზარდე, მიხედე ელის. დედა მიყვარხარ. მაპატიეთ ძმებო, ვერ გიტოვებთ მილიონებს, მაგრამ მიყვარხართ. ბატონ ბიძინას და პრემიერის იმედი მაქვს, რომ დაიცავთ ჩემს ოჯახს.
ჩემი მეგობრები, თანამშრომლები, ოჯახის წევრები – ყველა ჩემი დავალებით და მითითებით მოქმედებდა. ყველა უდანაშაულოა. ჩემი სიცოცხლით ვაგებ პასუხს. გთხოვთ არ გამკვეთოთ და არც არავინ დაადანაშაულოთ. ჩემი დაწერილია. ღმერთი ფარავდეს ჩემს საყვარელ აჭარას და საქართველოს“, – აღნიშნულია “იმედის” მიერ გავრცელებულ წერილში.
როგორც “ბათუმელებს“ სანდო წყაროებმა განუცხადეს, საგარეჯოს “ჯეოჰოსპიტალსის“ მედპერსონალს ჟურნალისტებისთვის არავითარი წერილი არ გადაუცია. აღნიშნულ საკითხზე ჯერჯერობით საგარეჯოს კლინიკას კომენტარი არ გაუკეთებია.
თბილისის პირველ საუნივერსიტეტო კლინიკაში, სადაც თორნიკე რიჟვაძე მძიმე მდგომარეობით იმყოფება, ასევე უარყოფენ, რომ მედიისთვის რაიმე წერილი მიეწოდათ.
მნიშვნელოვანია, რომ პაციენტის შესახებ მსგავსი ინფორმაციის გავრცელება საქართველოს კანონმდებლობით აკრძალულია და განიხილება როგორც პირადი სამედიცინო მონაცემების უკანონო გამჟღავნება.
გამოხმაურება
გია ნოდია, პოლიტოლოგი: “ქართულ ოცნებაში“ მიმდინარე “რაზბორკები“ ადასტურებს, რომ ის თავისი ბუნებით მაფიოზური წარმონაქმნია. ბოსს, ბიძინას, აშკარად აეჭრა სიტუაცია, თუმცა იმედი აქვს (სავარაუდოდ), რომ ერთგული კონსილიერეს, ირაკლი კობახიძის, დახმარებით დაალაგებს.
ვინ ვისკენაა და ვინ ვის ურტყამს თუ ესვრის, ან ბიძინას ნამდვილი სტრატეგია რა არის, ამის გარკვევას მაინც ვერ შევძლებ და არც ვცდილობ. მაგრამ შთაბეჭდილება მრჩება, რომ ბიძინამ მაფიის ბოსადაც ვერ ივარგა.
ოპოზიციაშიც რაზბორკებია, თუმცა მაფიოზურს ვერ დავარქმევ. სიტუაცია რომ აქეთაც ფუნდამენტურად აჭრილია, ვხედავთ.
ჩვენ, ხალხი, ვუყურებთ.”
გურამ იმნაძე, იურისტი: “მოკლედ, იმედი და პოს-ტვ იმას ამტკიცებენ, რომ სტუმრად მყოფმა რიჟვაძემ უცებ, მოულოდნელად მიაგნო მასპინძლის იარაღს და იქიდან გასროლით სცადა თვითმკვლელობა. ოღონდ, სანამ ამ სპონტანურ გადაწყვეტილებას მიიღებდა, მანამდე წერილიც დაწერა, სადაც იარაღის პატრონს მადლობას უხდის, ხოლო ივანიშვილს და კობახიძეს შველას თხობს, რომ ვიღაცები ბარიგების მფარველობას და კორუფციას აბრალებენ (ეს ვიღაცები ალბათ უნდა ვივარაუდოთ, რომ გეკა გელაძე და სანდრო დარახველიძეა).
მერე, ამ წერილს პოულობს მედდა, რომელიც ამის თაობაზე საგამოძიებო უწყებას კიარ აფრთხილებს, რომელიღაცა ჭ კლასის პროპაგანდისტულ მედიას აწვდის ინფორმაციას (ჩვენთან მედდებმა ხომ ზეპირად იციან ყველა ჟურნალისტის და პროდიუსერის ნომერი). ოღონდ, ეს მედია დაწერილი წერილის ფოტოს კიარ აქვეყნებს, არამედ მხოლოდ ტექსტს. როგორც ჩანს, მედდამ, რომელსაც უამრავი საქმე უნდა ჰქონდეს წესით, წერილისთვის ფოტოს გადაღების ნაცვლად, ასო-ასო და წერტილ-მძიმე აკრიფა რიჟვაძის წერილი.
“არაფერია ნამდვილი და ყველაფერია შესაძლებელი.”
