ევროპარლამენტმა საქართველოში მედიის თავისუფლებასა და მზია ამაღლობელზე რეზოლუცია მიიღო
რეზოლუცია მზია ამაღლობელზე
ევროპარლამენტმა საქართველოში მედიის თავისუფლებისა და მზია ამაღლობელის გათავისუფლების მოთხოვნით რეზოლუცია მიიღო. რეზოლუციას მხარი 324-მა დეპუტატმა დაუჭირა, წინააღმდეგი 25 იყო.
რეზოლუცია ხელისუფლებას ყველა პოლიტპატიმრის და უკანონოდ დაკავებულის, მათ შორის, მათე დევიძის, ნიკა გვარამიას, ზურაბ გირჩი ჯაფარიძისა და მიხეილ სააკაშვილის გათავისუფლებისკენ მოუწოდებს და ყველა რეპრესიული კანონის უკან გაწვევას მოითხოვს.
ასევე, ევროპარლამენტი გმობს ჟურნალისტის, მზია ამაღლობელის წინააღმდეგ პოლიტიკურად მოტივირებულ დაკავებას და გასამართლებას და მოუწოდებს ხელისუფლებას, დაუყოვნებლივ გაათავისუფლოს ამაღლობელი და მის წინააღმდეგ ყველა ბრალდება უკან გაიწვიოს.
“ევროპარლამენტი გამოხატავს ღრმა შეშფოთებას ჟურნალისტების მიმართ საქართველოში განხორციელებული თვითნებური დაკავებების, ძალადობისა და შევიწროების ფაქტების გამო, მათ შორის დისკრედიტაციის კამპანიების, სამართლებრივი დევნის, ძალადობისა და დაკავებისას გენდერზე დაფუძნებული ძალადობის გამო; მოუწოდებს ჩატარდეს დამოუკიდებელი გამოძიებები და მოუწოდებს ხელისუფლებას, დაუყოვნებლივ შეწყვიტოს დაშინება და უზრუნველყოს ჟურნალისტების უსაფრთხოება და თავისუფლება.” – წერია ერთ-ერთ პუნქტში.
რეზოლუციის მიხედვით, ევროპარლამენტი:
- მკაცრად გმობს “ქართული ოცნების“ რეჟიმის სისტემურ თავდასხმას დემოკრატიულ ინსტიტუტებზე, პოლიტიკურ ოპოზიციაზე, დამოუკიდებელ მედიაზე, სამოქალაქო საზოგადოებაზე და სასამართლოს დამოუკიდებლობაზე;
- ღრმა შეშფოთებას გამოთქვამს საქართველოში ჟურნალისტების თვითნებური დაკავებების, ძალადობისა და შევიწროების გამო, მათ შორის, ცილისწამების კამპანიების, სამართლებრივი დევნის, გენდერული ძალადობის შემთხვევების გამო; მოუწოდებს ხელისუფლებას, დაუყოვნებლივ შეწყვიტოს დაშინება და უზრუნველყოს ჟურნალისტების უსაფრთხოება და თავისუფლება; ჩატარდეს დამოუკიდებელი გამოძიება;
- მოუწოდებს საქართველოს ხელისუფლებას, დაუყოვნებლივ გაათავისუფლოს ყველა პოლიტიკური პატიმარი და სხვა უკანონოდ დაკავებული პირები, როგორიცაა აქტივისტი მათე დევიძე, ოპოზიციის ლიდერები: ზურაბ ჯაფარიძე, ნიკა მელია, ნიკა გვარამია და საქართველოს ყოფილი პრეზიდენტი მიხეილ სააკაშვილი; გმობს “ნაციონალური მოძრაობის“ თავმჯდომარის, თინა ბოკუჩავას მეუღლის ძალადობრივ გატაცებას და ინფორმაციას მისი შვილების უსაფრთხოებაზე მუქარის შესახებ;
- მოითხოვს ყველა რეპრესიული კანონმდებლობის დაუყოვნებლივ გაუქმებას, დემოკრატიის აღდგენას და მედიის თავისუფლებისა და სამოქალაქო თავისუფლებების სრულ დაცვას;
მოუწოდებს ევროკავშირს, უცხოური აგენტების კანონის ამოქმედების შემდეგ გააძლიეროს მხარდაჭერა საქართველოს დამოუკიდებელი მედიისა და სამოქალაქო საზოგადოებისადმი და აკონტროლოს მიმდინარე სასამართლო პროცესები; - გამოხატავს სინანულს საბჭოს, წევრი სახელმწიფოებისა და კომისიის მუდმივი უმოქმედობის გამო და კიდევ ერთხელ მოუწოდებს წევრ სახელმწიფოებს, დაუწესონ ორმხრივი სანქციები „ქართული ოცნების“ იმ ლიდერებსა და ოფიციალურ პირებს, რომლებიც დემოკრატიულ უკუსვლაზე არიან პასუხისმგებელნი;
- გამოთქვამს შეშფოთებას არასამთავრობო ორგანიზაციებზე განხორციელებული ბოლო შეტევების ტალღის გამო, რაც გამოიხატება იმაში, რომ ზოგიერთი სახელმწიფო უწყება, მაგალითად, ანტიკორუფციული ბიურო მათგან ითხოვს ბოლო წელიწად-ნახევრის პერიოდის დეტალურ ფინანსურ, იურიდიულ და ოპერატიულ ინფორმაციას და ამას მოითხოვს მხოლოდ სამ სამუშაო დღეში; ხაზს უსვამს, რომ ეს მოთხოვნა თავიდანვე არარეალურია და ქმნის რისკს, რომ მიზანში ამოღებული ორგანიზაციები პარალიზებული აღმოჩნდნენ და მათი საქმიანობა შეჩერდეს.
