საქართველოში არასამთავრობო ორგანიზაციების სახელმწიფო ბიუჯეტიდან დაფინანსების სააგენტო შეიქმნა
არასამთავრობოების სახელმწიფო ბიუჯეტიდან დაფინანსება
“ქართული ოცნების” მთავრობის გადაწყვეტილებით, საქართველოში არასამთავრობო ორგანიზაციების სახელმწიფო ბიუჯეტიდან დაფინანსების სააგენტო შეიქმნა. ირაკლი კობახიძის გადაწყვეტილებით, ამ სააგენტოს თამარ ზოდელავა უხელმძღვანელებს.
2003 წლიდან ზოდელავა გერმანიის საერთაშორისო თანამშრომლობის (GIZ) გუნდში მუშაობდა სხვადასხვა პროექტებსა და პოზიციებზე, ასევე იყო ევროპის საბჭოს პროექტის მრჩეველი და აღმოსავლეთ პარტნიორობის საჯარო მმართველობის რეფორმის რეგიონული ფონდის პროექტის მენეჯერი.
სააგენტოს შექმნას ქართული ოცნების პრემიერმა ირაკლი კობახიძემ 15 აპრილს მოაწერა ხელი, ხელმძღვანელად თამარ ზოდელავას დანიშვნაზე ბრძანება კი 22 აპრილს გამოქვეყნდა.
სააგენტო ადმინისტრაციის შენობაში, თბილისში, ინგოროყვას №7-ში განთავსდება.
20 თებერვალს “ქართული ოცნების” ერთპარტიულმა პარლამენტმა III მოსმენით მხარი დაუჭირა სახელმწიფო გრანტის მართვის სააგენტოს შექმნას, რომლის საქმიანობაც ე.წ. პროსამთავრობო არასამთავრობო ორგანიზაციების დაფინანსება იქნება.
განმარტებითი ბარათის მიხედვით, სახელმწიფო გრანტის მართვის სააგენტოს ბიუჯეტი 20 მილიონი ლარი იქნება და სახელმწიფო ბიუჯეტიდან დაფინანსდება. სააგენტოში 10-მდე პირი დასაქმდება.
“იმ ფაქტის გათვალისწინებით, რომ საქართველოში საზოგადოებრივი ორგანიზაციების დაფინანსების წყაროდ მეტწილად უცხოური აქტორები გვევლინება, რომლებიც ძალაუნებურად განსაზღვრავენ აღნიშნული ორგანიზაციების საქმიანობის დღის წესრიგს, საქართველოს მთავრობის ინიციატივაა, რომ შეიქმნას საქართველოს მთავრობის კონტროლს დაქვემდებარებული საჯარო სამართლის იურიდიული პირი – სახელმწიფო გრანტის მართვის სააგენტო, რომლის მიზანი იქნება საქართველოს ბიუჯეტით საქართველოში მოქმედი საზოგადოებრივი ორგანიზაციების მხარდაჭერა, რომელთა საქმიანობის მიმართულებები თანხვედრაში იქნება ქვეყნის განვითარების პრიორიტეტულ მიმართულებებთან“, – ნათქვამია განმარტებით ბარათში.
16 აპრილს საქართველოს ერთპარტიული პარლამენტის პლენარულ სხდომაზე რეჟიმის ნებართვის გარეშე უცხოური გრანტის მიღების აკრძალვას მესამე მოსმენით დაუჭირეს მხარი. კანონპროექტის მომხრე 82 დეპუტატი იყო, წინააღმდეგი კი არცერთი.
ინიცირებული ცვლილებების თანახმად, უცხოური გრანტის მიღებას მთავრობის ან მთავრობის მიერ განსაზღვრული უფლებამოსილი პირის თანხმობა დასჭირდება – თანხმობის გარეშე გაცემული გრანტის მიღება აკრძალული იქნება და პასუხისმგებლობის დაკისრებას გამოიწვევს.
მონიტორინგს ანტიკორუფციული ბიურო განახორციელებს, ხოლო დარღვევის შემთხვევაში მიმღები დაჯარიმდება ორმაგი ოდენობით.
კანონპროექტის მიხედვით, მთავრობის მიერ გრანტის გაცემის თაობაზე თანხმობის გაცხადებისთვის 10-დღიანი ვადა განისაზღვრება. მთავრობის გადაწყვეტილების გასაჩივრება მის მოქმედებას არ გააჩერებს.
