საქართველოში ქალები 5-ჯერ მეტ დროს ხარჯავენ სახლის საქმეებზე, ვიდრე კაცები. UN WOMEN იწყებს კამპანიას შრომის გადანაწილებაზე
გადაინაწილე ზრუნვა
საქართველოში ქალები აუნაზღაურებელი ზრუნვის შრომაზე, მაგალითად, სახლის დალაგებაზე, საჭმლის მომზადებაზე, ბავშვისა და მოხუცის მოვლაზე, 5-ჯერ მეტ დროს ხარჯავენ ვიდრე კაცები. ეს წელიწადში დაახლოებით 2,5 მილიარდი საათი და 10 მილიარდი ლარია.
“გაეროს ქალთა ორგანიზაცია” (UN WOMEN) იწყებს ახალ სოციალურ კამპანიას – „გადაინაწილე ზრუნვა“, რომლის მიზანი აუნაზღაურებელი ზრუნვის შრომის გადანაწილებაა.
“ზრუნვის შრომის გარეშე ნებისმიერი ოჯახისა თუ საზოგადოების ცხოვრება წარმოუდგენელია, თუმცა მას შრომას იშვიათად უწოდებენ. შეუმჩნეველი რჩება ქალების ძალისხმევაც, მიუხედავად იმისა, რომ დროის ასეთი არათანაბარი გადანაწილება ნეგატიურად უპირველესად მათ პროფესიულ რეალიზებაზე, განვითარებასა და ცხოვრების ხარისხზე აისახება“,- ვკითხულობთ ორგანიზაციის განცხადებაში.
კამპანია – “გადაინაწილე ზრუნვა” ძირითადად ონლაინსივრცეში იქნება. ორგანიზაციის გეგმა ასეთია – მულტიმედია მასალებითა და ინფლუენსერების მონაწილეობით, აუდოტორიამ ყურადღება უნდა მიაქციოს აუნაზღაურებელი ზრუნვის შრომის მნიშვნელობასა და მისი გადანაწილების აუცილებლობას.
კამპანიის ფარგლებში გათვალისწინებულია საინფორმაციო შეხვედრებისა და დისკუსიების მოწყობა ახალგაზრდებთან, თემატური ღონისძიებები ხუთ უნივერსიტეტში.
კამპანიას გაეროს ქალთა ორგანიზაცია კრეატიულ სააგენტო „ლივინგსტონთან“ ერთად ახორციელებს.
აუნაზღაურებელი ზრუნვის შრომის არათანაბარი გადანაწილების მიზეზი უპირველესად გენდერული სტერეოტიპებია. გაეროს ქალთა ორგანიზაციის „გენდერული თანასწორობის მიმართ დამოკიდებულების კვლევა საქართველოში“ ამბობს, რომ ჩვენს ქვეყანაში ყოველი მე-2 ადამიანის აზრით, ბავშვების დაბანა, კვება, მათთვის საფენის გამოცვლა უფრო დედის პასუხისმგებლობაა.
ამას გარდა, 71% მიიჩნევს, რომ ქალები ნაკლებს უნდა მუშაობდნენ და ოჯახზე ზრუნვას მეტ დროს უთმობდნენ. საგულისხმოა ისიც, რომ საქართველოში ყველა ოჯახს არ მიუწვდება ხელი საბავშვო ბაღებზე, დღის ცენტრებზე, გახანგრძლივებულებსა და შინ მოვლის მომსახურებებზე.
შესაბამისად, კამპანიის „გადაინაწილე ზრუნვა“ ერთ-ერთი მიზანი სტერეოტიპების ირგვლივ დისკუსიის დაწყება, ზრუნვის შრომის გადანაწილების პოპულარიზაცია და შესაბამისი პოლიტიკის დანერგვის ხელშეწყობაცაა.
