პარლამენტმა 49 ოპოზიციონერ დეპუტატს უფლებამოსილება შეუწყვიტა
49 ოპოზიციონერ დეპუტატს უფლებამოსილება შეუწყდა
საქართველოს ერთპარტიული პარლამენტის პლენარულ სხდომაზე უფლებამოსილება შეუწყვიტეს 49 ოპოზიციონერ დეპუტატს. პლენარულ სხდომამდე საკითხს საპროცედურო საკითხთა კომიტეტმა დაუჭირა მხარი. ქართული ოცნების დეპუტატები ამ გადაწყვეტილებას ტაშით შეხვდნენ.
შესაბამისად, პარლამენტი, რომელიც 150 წევრით უნდა იყოს წარმოდგენილი, 101 წევრიანი გახდა.
განიხილებოდა ერთიანობა – ნაციონალური მოძრაობის, კოალიცია ცვლილებებისთვის და ძლიერი საქართველოს წევრებისთვის მანდატების შეჩერების საკითხი. პარლამენტში 12 მანდატით რჩება პარტია „გახარია საქართველოსთვის“. გახარიას პოლიტიკური გაერთიანება სხვა პარტიების მსგავსად, 26 ოქტომბრის არჩევნებს არალეგიტიმურად აცხადებს და საპარლამენტო საქმიანობაში არ მონაწილეობს, თუმცა უფლებამოსილების შეწყვეტის თაობაზე მათ განცხადება არ დაუწერიათ.
ოპოზიციონერები აცხადებენ, რომ ისინი 2024 წლის 26 ოქტომბრის საპარლამენტო არჩევნების შედეგებს არ აღიარებენ, შესაბამისად, არ ცნობენ პარლამენტის ლეგიტიმაციას და სადეპუტატო მანდატის შეწყვეტა პირადი განცხადების საფუძველზე მოითხოვეს.
ცესკოს შემაჯამებელი ოქმის თანახმად, 2024 წლის 26 ოქტომბრის არჩევნების შედეგად „ძლიერმა საქართველომ“ 14 მანდატი მიიღო, „კოალიციამ ცვლილებისთვის“ პარლამენტში 19 წევრი გაიყვანა, ხოლო „ერთიანობა -ნაციონალურმა მოძრაობამ“ 16 მანდატი მოიპოვა.
რა თქვა შალვა პაპუაშვილმა
“ჩემი მხრიდანაც დავამატებ, ის ვინც ცდილობს დემოკრატიის და საქართველოს მოსახლეობის შანტაჟს, რა თქმა უნდა, მიიღებს ყოველთვის სამართლიან, კონსტიტუციურ, კანონიერ პასუხს ამაზე”, – ერთპარტიული პარლამენტის თავმჯდომარემ, შალვა პაპუაშვილმა.
პაპუაშვილის თქმით, ოპოზიციის წარმომადგენლებს, რომლებიც წინა მოწვევის პარლამენტში იმყოფებოდნენ, რეალურად, პარლამენტში “არცერთი დღე” არ უმუშავიათ.
დეპუტატები, რომლებსაც უფლებამოსილება შეუწყდათ:
მარიკა არევაძე, ლაშა ბაქრაძე, თინა ბოკუჩავა, საბა ბუაძე, გიორგი ბუტიკაშვილი, გრიგოლ გეგელია, ანა გოგოლაძე, სოფია გოლეთიანი, ანა დოლიძე, გიორგი ვაშაძე, თენგიზ თევზაძე, ქეთევან თურაზაშვილი, გიორგი იმედაშვილი, გიორგი კირთაძე, ცოტნე კობერიძე, მაია კოპალეიშვილი, თამარ კორძაია, ირაკლი კუპრაძე, თამარ ლალიაშვილი, გიორგი ლემონჯავა, ნანა მალაშხია, ნიკა მელია, კობა ნაყოფია, ანა ნაცვლიშვილი, რამაზ ნიკოლაიშვილი, კახა ოქრიაშვილი, დათუნა რაქვიაშვილი, სალომე სამადაშვილი, ხათუნა სამნიძე, ლევან სამუშია, ირაკლი ფავლენიშვილი, ანი ქავთარაძე, ოქტაი ქაზუმოვი, ბორის ყურუა, ფიქრია ჩიხრაძე, პეტრე ცისკარიშვილი, ლევან ცუცქირიძე, გიგი წერეთელი, ანა წითლიძე, ივანე ჭყონია, ლევან ხაბეიშვილი, მამუკა ხაზარაძე, ეკა ხერხეულიძე, ირაკლი ხვადაგიანი, ელენე ხოშტარია, ბადრი ჯაფარიძე, გაიოზ ჯაფარიძე, ზურაბ გირჩი ჯაფარიძე და სოფიო ჯაფარიძე.
