სახალხო დამცველის კონსილიუმი: სააკაშვილი მჭიდრო სამედიცინო მეთვალყურეობას საჭიროებს

სახალხო დამცველის კონსილიუმი

საქართველოს სახალხო დამცველის მიერ შექმნილმა სპეციალისტთა ჯგუფმა მიხეილ სააკაშვილის სამედიცინო მდგომარეობის მორიგი დასკვნა გამოაქვეყნა. კონსილიუმის წევრები კლინიკა ვივამედში 19 ოქტომბერს იმყოფებოდნენ. 

ომბუდსმენის კონსილიუმის დასკვნის მიხედვით, სახეზეა გარკვეული დადებითი დინამიკა, თუმცა, ძირითადი სურათი: კუნთების ატროფია, ნეიროპათია და კოგნიტიური გაუარესება კვლავ უცვლელი რჩება. ექიმების შეფასებით, სააკაშვილი მჭიდრო სამედიცინო მეთვალყურეობას საჭიროებს.

“პაციენტი ძირითადად წევს, თავს სუსტად გრძნობს, კითხვებს უხალისოდ პასუხობს. კოგნიტიური ფუნქციები შეფასდა MOCA სკალით – 13 ქულა (N≥26), მუხლის რეფლექსები დუნეა (1 ქულა), აქილევსის ორმხრივ არ იწვევა. გაცხოველებულია ხორთუმის რეფლექსი, მუცლის კანის რეფლექსები არ იწვევა, ძალა კიდურებში დიფუზურად დაქვეითებულია სიმეტრიულად (4 ქულა), ცხვირ-თითის ტესტს დისმეტრიით ასრულებს ორმხრივ, ალტერნატიული მოძრაობის ტესტები ქვემო კიდურებში გაუარესებულია (სისუსტის გამო), მუხლქუსლის ტესტებს ასევე სისუსტის გამო, დისმეტრიით ასრულებს, რომბერგის პოზაში არამყარია, ტანდემური სიარული შეუძლებელია, გადაადგილდება მოკლე დაბალი ნაბიჯებით, ორმხრივ ქვემო კიდურებზე დისტალურად ვიბრაციული მგრძნობელობა მკვეთრად გაუარესებულია კოჭების ჩათვლით, გაუარესებულია ჩხვლეტის შეგრძნებაც წვივის ზემო მესამედიდან ქვემოთ.” – წერია კონსილიუმის დასკვნაში.

● ვახტანგ ძაბირაძის კომენტარი: ყოველთვის სამოქალაქო არეულობაზეა საუბარი, როცა ხელისუფლება გავლენას კარგავს
● თავდაცვის სამინისტრომ სააკაშვილის თვითმფრინავით მგზავრობის ხელშეკრულებების “განსაიდუმლოება” დაიწყო
● პაატა ზაქარეიშვილის მოსაზრება: „ნაციონალური მოძრაობის“ და ვაშაძის გაერთიანება ორი პარტიის ურთიერთსასარგებლო ნაბიჯია

მიმდინარე წლის 13 ივლისს 44-მა ევროპარლამენტარმა ხელისუფლებას მოუწოდა, გადაიყვანონ მიხეილ სააკაშვილი ევროკავშირის ქვეყნების ერთ-ერთ კლინიკაში, სადაც მას შეეძლება მიიღოს საჭირო და შესაბამისი სამედიცინო დახმარება.

44 ევროპარლამენტარი პრეზიდენტს, პარლამენტის თავმჯდომარე შალვა პაპუაშვილსა და პრემიერმინისტრ ირაკლი ღარიბაშვილს მიმართავს. ისინი აღნიშნავენ, რომ ევროკავშირის წევრი და წევრობის კანდიდატი ქვეყნებისგან მოელიან ევროპული ღირებულებებისადმი ერთგულებას, რომელიც “ადამიანის უნივერსალური უფლების აღიარებასაც” გულისხმობს. 

ამასთან, უკრაინის უმაღლეს რადაში მხარი დაუჭირეს მიმართვის პროექტს, რომელიც მიხეილ სააკაშვილის ჰუმანიტარული მიზნით შეწყალებასა და საზღვარგარეთ სამკურნალოდ გადაყვანას ითხოვს.

მიმართვას ხელს 87 დეპუტატი აწერს, მათ შორისაა უკრაინის რადას მმართველი პარტიის, “ხალხის მსახურის” თავმჯდომარე დავით არახამია.