განათლებისა და მეცნიერების სამინისტრო საქართველოში რუსულ-ქართული უნივერსიტეტის შესაძლო გახსნას ეხმიანება და აღნიშნავს, რომ ინფორმაცია სიმართლეს არ შეესაბამება. სამინისტროს მტკიცებით, რუსულ-ქართული სასწავლებლის გახსნის მოთხოვნით უწყებაში განცხადება არ შესულა.
საქართველოში პრიმაკოვის ცენტრის ხელმძღვანელმა, დიმიტრი ლორთქიფანიძემ განაცხადა, რომ თბილისში ქართულ-რუსული უნივერსიტეტი გაიხსნება. ასევე, ლორთქიფანიძის თქმით, იგეგმება სანქტ-პეტერბურგთან პირდაპირ ავიამიმოსვლას დაწყებაც. ამის შესახებ მან საქართველოში დაფუძნებულ რუსულენოვან მედიასთან ისაუბრა.
კრემლისტური ორგანიზაციის ხელმძღვანელი ამბობს, რომ ამ ეტაპზე მიმდინარეობს უნივერსიტეტის განსათავსებელი შენობის ძებნა. მისივე თქმით, სწავლა უფასო იქნება და ხარჯებს რუსეთის ფედერაცია დაფარავს.
ამას გარდა, ლორთქიფანიძის თქმით, მიმდინარეობს ქართულ-რუსული ურთიერთობის “რეანიმაცია”. მისივე მტკიცებით, რუსეთის ბევრ მოქალაქეს საქართველოში ბიზნესის გადმოტანის სურვილი აქვს.
“როგორც მოგეხსენებათ, განათლების ხარისხის განვითარების ეროვნული ცენტრის მიერ ავტორიზაციის მინიჭების გარეშე არც ერთ სასწავლებელს არ აქვს საქართველოში საგანმანათლებლო საქმიანობის წარმოების უფლება.” – წერია სამინისტროს მიერ გავრცელებულ განცხადებაში.
მათივე განმარტებით, საგანმანათლებლო დაწესებულების სტატუსის მოპოვებისთვის დაწესებულებამ უნდა გაიაროს ავტორიზაცია, რომლის მიზანია სახელმწიფოს მიერ აღიარებული განათლების დამადასტურებელი დოკუმენტის გასაცემად შესაბამისი საქმიანობის განხორციელებისათვის აუცილებელი სტანდარტების დაკმაყოფილების უზრუნველყოფა. სამინისტროს ცნობით, ავტორიზაციის გავლა სავალდებულოა როგორც საჯარო, ასევე კერძო სუბიექტისთვის.
“სრული პასუხისმგებლობით ვაცხადებთ, რომ მსგავსი სასწავლებლის გახსნასთან დაკავშირებით საქართველოს საგანმანათლებლო სისტემაში არანაირი პროცედურა არ მიმდინარეობს. გავრცელებული ინფორმაცია აღნიშნულთან დაკავშირებით არის დეზინფორმაცია, რომელიც ემსახურება საზოგადოების შეცდომაში შეყვანას, განათლების სისტემისა და ხელისუფლების მიზანმიმართულ დისკრედიტაციას”. – ვკითხულობთ განცხადებაში.
