ევროპარლამენტს რეზოლუციასააკაშვილზე და ივანიშვილზე
ევროპარლამენტმა საქართველოს ყოფილი პრეზიდენტის, მიხეილ სააკაშვილის ჯანმრთელობის მდგომარეობის შესახებ რეზოლუცია მიიღო, რომელშიც საქართველოს ხელისუფლებას საზღვარგარეთ მკურნალობის მიზნით მიხეილ სააკაშვილის გადაყვანისკენ, ხოლო პრეზიდენტს შეწყალებისკენ მოუწოდებენ.
ამასთან, შესწორების ნაწილში ბიძინა ივანიშვილი მოხსენიებულია როგორც ოლიგარქი და ხაზგასმულია მისი ფუნდამენტური როლი მიხეილ სააკაშვილის პატიმრობაში. ევროპარლამენტარების თქმით, სააკაშვილის პატიმრობა არის “ივანიშვილის პირად ვენდეტის ნაწილი.” დეპუტატები საბჭოსა და დემოკრატიულ პარტნიორებს მოუწოდებენ, განიხილონ ივანიშვილისთვის პირადი სანქციების დაწესება საქართველოში პოლიტიკური პროცესის გაუარესებაში მისი როლის გამო.
ამ ტექსტს მხარი 577-მა დეპუტატმა დაუჭირა, 33 წინააღმდეგი იყო, ხოლო 26-მა თავი შეიკავა.
ევროპარლამენტმა ევროკავშირთან საქართველოს ასოცირების შეთანხმების შესრულების შესახებ ყოველწლიური რეზოლუცია 2022 წლის 14 დეკემბერს მიიღო. ევროპარლამენტმა საბოლოო რეზოლუციის მიღებამდე კენჭი უყარა ცალკეულ შესწორებებსაც, რომელთა უმეტესობასაც დეპუტატებმა მხარი დაუჭირეს. დოკუმენტში შეტანილია ნოემბერში მიღებული კომპრომისული ცვლილებებიც, რომლის თანახმადაც ევროპარლამენტი რეკომენდაციას გასცემს, ქვეყანაში ბიძინა ივანიშვილის გადაჭარბებული გავლენები აღმოიფხვრას.
რეზოლუციაში შესული ერთ-ერთი ახალი შესწორების თანახმად, ივანიშვილის გადაჭარბებული გავლენების კონტექსტში, ევროპარლამენტარები მოუწოდებენ საბჭოსა და დემოკრატიულ პარტნიორებს, „მიიღონ შესაბამისი ზომები, მათ შორის, პირადი სანქციების დაწესება ივანიშვილზე და ყველა იმ პირზე, რომლებიც პასუხისმგებელი არიან დემოკრატიული პოლიტიკური პროცესის გაუარესებაზე“.
ევროპარლამენტარები მიიჩნევენ, რომ ყოფილი პრეზიდენტის მდგომარეობის გაუმჯობესებასთან დაკავშირებით მუდმივი წარუმატებლობა საქართველოს მიერ ევროკავშირის წევრობის კანდიდატურის მიღების პერსპექტივის შეფერხების რისკს ქმნის.
ევროპარლამენტარები ასევე აღნიშნავენ, რომ ქვეყანაში ისეთი პატიმრების მიმართ მოპყრობა, როგორიცაა ყოფილი პრეზიდენტი სააკაშვილი, არის ევროპული ღირებულებებისა და მისი დეკლარირებული ევროპული მისწრაფებების, მათ შორის, ევროკავშირის კანდიდატის სტატუსისადმი საქართველოს მთავრობის ერთგულების ლაკმუსის ტესტი.
ასევე, დეპუტატები შეახსენებენ საქართველოს ხელისუფლებას, რომ მათ ეკისრებათ პასუხისმგებლობა, უზრუნველყონ სააკაშვილის ჯანმრთელობა და კეთილდღეობა, გაუწიონ მას ადეკვატური სამედიცინო დახმარება და პატივი სცენ მის ძირითად უფლებებსა და პიროვნულ ღირსებას, “ქვეყნის კონსტიტუციისა და საერთაშორისო ვალდებულებების შესაბამისად.”
„ევროპული რეფორმების მიმართულებით ქვეყნის პროგრესი პოლიტიკის ცენტრში უნდა დაბრუნდეს”, – აღნიშნულია რეზოლუციაში.
აღნიშნული რეზოლუციის მიღებამდე რამდენიმე საათით ადრე, საქართველოს საქართველოს სპეციალურმა პენიტენციურმა სამსახურმა მიხეილ სააკაშვილის ახალი ვიდეოკადრები გაავრცელა. უწყების თქმით, კადრების გავრცელების მიზანი “საზოგადოების ობიექტური ინფორმირებაა.” მათივე ცნობით, გავრცელებული მასალა ბოლო თვეებშია გადაღებული, მათ შორის უკანასკნელი ვიდეო 9 თებერვლით თარიღდება.
პენიტენციური სამსახური აცხადებს, რომ ამ კადრებში,“ნათლად ჩანს,რომ სააკაშვილის ჯანმრთელობის მდგომარეობის შესახებ გავრცელებული ამბები არ შეესაბამება სინამდვილეს.”
მესამე პრეზიდენტის ოჯახის წევრები და ადვოკატები ჯანმრთელობის მდგომარეობის გამო, სააკაშვილისთვის სასჯელის გადავადებას ან სასჯელისგან გათავისუფლებას ითხოვდნენ და ამ შუამდგომლობით სასამართლოს მიმართეს. თუმცა მიხეილ სააკაშვილს სასამართლომ სასჯელი არ გადაუვადა. გადაწყვეტილება დასკვნით სხდომაზე მოსამართლე გიორგი არევაძემ გამოაცხადა.
მას შემდეგ, რაც საქართველოს მესამე პრეზიდენტს, მიხეილ სააკაშვილს სასამართლომ სასჯელი არ გადაუვადა, “ერთიანი ნაციონალური მოძრაობა” საგანგებო რეჟიმზე გადავიდა.
საქართველოს პრეზიდენტი სალომე ზურაბიშვილი სააკაშვილთან დაკავშირებით საქალაქო სასამართლოს განაჩენზე განცხადებას ავრცელებს და ამბობს, რომ მისი შეწყალებით მიხეილ სააკაშვილი ვერ გათავისუფლდება, რადგან იგი კიდევ სამ საქმეზეა ბრალდებული. მისივე განმარტებით, სასამართლოს ამ გადაწყვეტილებით ქართველ “ხალხს მიესაჯა ჩაკეტილ წრეზე ტრიალი.”
