8 წლის გოგონას სასტიკი მკვლელობა გორში. ეჭვმიტანილი დაკავებულია

გუშინ საღამოს, 23 ოქტომბერს, გორის რაიონული სასამართლოს ეზოში 8 წლის გოგონას ცხედარი იპოვეს. ოჯახი აცხადებს, რომ ბავშვს ძალადობის კვალი აქვს.

• საქართველოში ამერიკელი ოჯახის მკვლელობაში ბრალდებულ 19 წლის მწყემსს უვადო პატიმრობა ემუქრება

• აფხაზეთის ჰიმნის ავტორს პედოფილიის ბრალდებით 20 წლით თავისუფლების აღკვეთა მიესაჯა

2010 წელს დაბადებული ნანა ბერიაშვილი გუშინ, დღის პირველ ნახევარში დაიკარგა.

საინფორმაციო გამოშვებებსა და სოციალურ ქსელებში საღამოსკენ გამოჩნდა პატარა გოგონას ფოტოები, რომელსაც ოჯახთან ერთად უკვე პოლიციაც ეძებდა.

ბავშვი დღის პირველ ნახევარში სახლიდან გავიდა და იმ წუთიდან მისი კვალი გაქრა. იგი ცეკვის წრეზე უნდა მისულიყო, თუმცა გაკვეთილზე არ გამოჩენილა.

გოგონას პოლიციასთან ერთად მთელი დღის განმავლობაში ადგილობრივი მოსახლეობაც ეძებდა.

მისი ცხედარი საღამოს რაიონული სასამართლოს ეზოში, მდინარე ლიახვის პირას იპოვეს.

ბავშვს ძალადობის კვალი აქვს – თვითმხილველები ამბობენ, რომ მას ფეხები მავთულით ჰქონდა შეკრული, თავზე კი, პოლიეთილენის ტომარა ჰქონდა წამოცმული.

ოჯახს მომხდართან დაკავშირებით არანაირი ვერსია არ აქვს. ისინი მკვლელობის 24 საათში გამოძიებას ითხოვენ, წინააღმდეგ შემთხვევაში ხალხმრავალი გამოსვლებით და “გორის პარალიზებით” იმუქრებიან:

შინაგან საქმეთა სამინისტრომ საქმე არასრულწლოვანის დამამძიმებელ გარემოებაში განზრახ მკვლელობის მუხლით აღძრა. საგამოძიებო პროცესს შს მინისტრის პირველი მოადგილე კახა საბანაძე ხელმძღვანელობს.

გუშინ საღამოს საბანაძემ  ჟურნალისტებს უთხრა, რომ ჯერჯერობით გამოძიება ვერსიებზე ვერ ისაუბრებს:

“ამ ეტაპისთვის ვერსიებზე კომენტარს ვერ გავაკეთებ, ვმუშაობთ ყველა მიმართულებით. გამოძიება დაწყებულია, აბსოლუტურად დეტალურად ვსწავლობთ შემთხვევის ადგილს, შესაბამისად როგორც კი რამე იქნება ცნობილი გავაკეთებთ განცხადებას,” – თქვა მან. 

მთელი ღამის განმავლობაში გოგონას ცხედარს გორის პროზექტურაში ექსპერტიზა უტარდებოდა. გორის სასამართლოს ეზოში კი, სადაც ცხედარი იპოვეს, ექსპეტ-კრიმინალისტები მუშაობდნენ.