უბნების თითქმის 100 % დათვლილია - "ქართული ოცნების" ხმები 54 %- მდე გაიზარდა
26 ოქტომბრის არჩევნების შედეგები
11 საათისთვის, ცენტრალური საარჩევნო კომისია 3 111 საარჩევნო უბნიდან 3100 უბნის (99.646%) წინასწარ შედეგებს აქვეყნებს.
წინასწარი მონაცემებით, საპარლამენტო არჩევნებში მმართველი პარტია „ქართული ოცნება“ ლიდერობს. ოპოზიციიდან ხმების ყველაზე მეტი რაოდენობა მოიპოვა „კოალიციამ ცვლილებისთვის“.
პარტიების მონაცემები ასეთია:
- „ქართული ოცნება“ – 54,234%;
- „კოალიცია ცვლილებისთვის“ – 10,822%;
- „ერთიანობა – ნაციონალური მოძრაობა“ – 10,105%;
- „ძლიერი საქართველო“ – 8,758%;
- „გახარია საქართველოსთვის“ – 7,753%;
- „გირჩი“ – 3,004%;
- „პატრიოტთა ალიანსი“ – 2,45%
- „ლეიბორისტული პარტია“ – 0,728%
აპარატების დათვლის გარდა, საარჩევნო უბნებში მიმდინარეობს ხმების ხელით გადათვლის პროცედურები. ასევე ბიულეტენებს ითვლიან იმ საარჩევნო უბნებში, სადაც არჩევნები ტრადიციული წესით ჩატარდა.
3 111 საარჩევნო უბნიდან 2 263 უბანი მოდერნიზებულია, რომელიც აღჭურვილია თანამედროვე ტექნოლოგიური საშუალებებით.
ცესკოს ცნობით, წინასწარი მონაცემებით, არჩევნებზე აქტივობამ 58,94% შეადგინა, არჩევნებში მონაწილეობა 2 060 412-მა ამომრჩეველმა მიიღო.
“ქართულმა ოცნებამ”, რომლის სათავეში საქართველოს ყველაზე მდიდარი და ძლევამოსილი ადამიანი – ბიძინა ივანიშვილია, წინასწარი მონაცემებიოთ, 26 ოქტომბრის საპარლამენტო არჩევნებში გაიმარჯვა. “ოცნება” უკვე 12 წელია, რაც საქართველოს ხელისუფლებაშია. ეს ამ პოლიტიკური ძალის მეოთხე ვადაა.
თუმცა, ოპოზიცია შედეგების აღიარებაზე უარს ამბობს და აცხადებს, რომ არჩევნები გაყალბდა. დამკვირვებელთა კოალიცია იტყობინება საარჩევნო დარღვევებზე, მათ შორის ამომრჩეველთა დაშინებასა და მოსყიდვაზე.
„ქართულმა ოცნების” გამარჯვება საქართველოს ევროინტეგრაციის მხარდამჭერების შეშფოთებას იწვევს. სხვადასხვა ეგზიტპოლის მიხედვით, მონაცემები განსხვავებულია: „ქართული ოცნების“ მხარდამჭერმა არხმა მმართველ პარტიას ხმების 56% აჩვენა, ოპოზიციურმა არხებმა კი ოპოზიციის წარმატებები. ივანიშვილმა მიულოცა მხარდამჭერებს და თქვა, რომ მისი პარტიის წარმატება ასახავს “ქართველი ხალხის სიბრძნეს”.
