18 მაისიდან ბოლნისში შეზღუდვები მკაცრდება

მთავრობის გადაწყვეტილებით,  ბოლნისის მუნიციპალიტეტში 18 მაისიდან შეზღუდვები მკაცრდება. იკრძალება შიდა გადაადგილებაც. 

შეზღუდვები საგანგებო მდგომარეობის ვადით, ანუ 22 მაისის ჩათვლით იმოქმედებს. 

15 მაისის მონაცემებით, საქართველოში კორონავირუსით ინფიცირების 671  შემთხვევაა დადასტურებული. კარანტინის რეჟიმშია 3873 ადამიანი, ხოლო სტაციონარში მეთვალყურეობის ქვეშ – 404 პირი. კორონავირუსით ინფიცირებულთაგან 393 გამოჯანმრთელდა და 12  გარდაიცვალა. 

აქამდე კარანტინი ბოლნისის მხოლოდ ორ სოფელში, გეტასა და მუშევანში იყო დაწესებული. 

მთავრობის დადგენილებით, 18 მაისიდან იკრძალება: 

● ბოლნისის მუნიციპალიტეტის ტერიტორიაზე შესვლა. ეს შეზღუდვა არ ვრცელდება იმ ადამიანებზე, რომლებიც ბოლნისის მუნიციპალიტეტში არიან ჩაწერილები და იქ ცხოვრობენ;

● იკრძალება ბოლნისის მუნიციპალიტეტიდან გასვლა.

● იკრძალება ბოლნისის მუნიციპალიტეტის ტერიტორიაზე გადაადგილება.

● იკრძალება ბოლნისის მუნიციპალიტეტის ტერიტორიაზე საზოგადოებრივი ტრანსპორტის მოძრაობაც. 

მუნიციპალიტეტის ტერიტორიის შიგნით იკრძალება გადაადგილება იმ შემთხვევების გარდა, როცა ადგილობრივებს საკვები პროდუქტების, მედიკამენტების შეძენა ან სამედიცინო მომსახურების მიღება სჭირდებათ.

მთავრობამ დაუშვა გამონაკლისი და ბოლნისის მოსახლეობა სასოფლო-სამეურნეო სამუშაოების ჩატარებას შეძლებს.

• მთავრობის ანტიკრიზისული გეგმა – ვინ რა დახმარებას მიიღებს
• როგორ აპირებს საქართველოს ხელისუფლება სოფლის მეურნეობის გადარჩენას
• თბილისი გაიხსნა, კიდევ რა ამუშავდა 11 მაისიდან. დეტალურად
• ონლაინ-სწავლება – ჩავარდნა თუ გარღვევა? როგორ მოერგო ქართული სკოლა ახალ რეალობას

15 მაისს, ბოლნისის მუნიციპალიტეტის ორ სოფელში – გეტასა და მუშევანში, კორონავირუსით ინფიცირების 17 ახალი შემთხვევა დადასტურდა. ბოლნისში ზომების გამკაცრება სწორედ ამ ფაქტს უკავშირდება. 

ამ დროისთვის ბოლნისის მუნიციპალიტეტში ახალი კორონავირუსით 139 ადამიანია დაინფიცირებული.

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.