სომხეთში წვევამდელებს ყალბ დიაგნოზს უსვამდნენ და ჯარში სამსახურიდან ათავისუფლებდნენ

2018 წელს სომხეთში, ქრთამის სანაცვლოდ, 40-ზე მეტ წვევამდელს ჯარში სამსახური გადაუვადეს ან საერთოდ გაათავისუფლეს. ეროვნული უშიშროების სამსახურმა გაარკვია, რომ დანაშაულებრივი სქემის  მთავარი მოქმედი პირი თავდაცვის სამინისტროს რესპუბლიკური შეკრების პუნქტის ყოფილი სამხედრო მოსამსახურე კოლია კოსაკიანი იყო. ის ამისთვის სამხედრო კომისარიატების თანამშრომლებთან და ექიმებთან საკუთარ კავშირებს იყენებდა.

„ახალგაზრდებს არარსებულ დიაგნოზებს უსვამდნენ, რითაც მათ სამხედრო სამსახური ან გადაუვადდებოდათ, ან საერთოდ თავისუფლდებოდნენ“, – ნათქვამია ეროვნული უშიშროების სამსახურის განცხადებაში.

14 ათასი დოლარის ოდენობის ქრთამის სანაცვლოდ, კოსაკიანი თავის ახალწვეულებისთვის სამოქალაქო საავადმყოფოებში მიმართვებს უზრუნველყოფდა, სადაც მათ ყალბ დიაგნოზებს უსვამდნენ.

კოლია კოსაკიანსა და მისი ჯგუფის წევრებს ეხმარებოდნენ სხვადასხვა სამედიცინო ცენტრში მომუშავე ექიმები, სამხედრო კომისარიატების ყოფილი და მოქმედი თანამშრომლები, რომლებიც ამ თანხის ნაწილს იღებდნენ.

აღძრულია სისიხლის სამართლის საქმე, დაკითხულია ათობით ადამიანი, ჩატარდა 20-ზე მეტი ჩხრეკა. შედეგად აღმოჩენილია წვევამდელების სამედიცინო ცნობები და გამოძიებისთვის მნიშვნელოვანი სხვა საბუთები, ასევე – გარკვეული ოდენობის თანხა.

ამჟამად დანაშაულებრივი სქემის უკვე სამ მონაწილეს წარედგინა ბრალი. ისინი დაპატიმრებულები არიან. გამოძიება გრძელდება, რათა ყველა გარემოება გაირკვეს, და საქმის ყველა თანამონაწილე გამოვლინდეს.