სამხრეთი ოსეთის არმია რუსეთიას არმიად გადაქცევას იწყებს

ფოტო: ნელი გარაბაევა

სამხრეთი ოსეთის შეაიარაღებული ძალები ნაწილობრივ რუსეთის არმიის შემადგენლობაში შევა. რუსეთის ფედერაციის პრეზიდენტმა შესაბამის დოკუმენტს მოაწერა ხელი.

დოკუმენტის სახელწოდებაა „შეთანხმება სამხრეთი ოსეთის ცალკეული ქვედანაყოფების რუსეთის შეიარაღებულ ძალთა რიგებში შესვლის წესების შესახებ“ და გამოქვეყნებულია რუსეთის ხელისუფლების ოფიციალურ ინტერნეტ-პორტალზე.

შეთანხმებაში ნათქვამია, რომ ვლადიმირ პუტინმა რუსეთის თავდაცვის სამინისტროს დაავალა, სამხრეთი ოსეთთან ყველა წვრილმანის შესახებ გამართოს მოლაპარაკებები.

მოცემული მომენტისთვის ცნობილი დეტალები

შეთანხმება იქცა იმ დებულებების  დამატებით დამაზუსტებელ დოკუმენტად, რომლებიც უკვე იყო ჩადებული სამხრეთი ოსეთის რუსეთთან მოკავშირეობისა და ინტეგრაციის შესახებ შეთანხმებაში, რომელსაც 2014 წლის ნოემბერში მოეწერა ხელი.

სამართლებრივი ინფორმაციისთვის განკუთვნილ იმავე ოფიციალურ პორტალზე გამოქვეყნებულია რუსეთის თავდაცვის სამინისტროს პროექტი სამხრეთი ოსეთის მოქალაქეებისთვის რუსეთის შეიარაღებულ ძალებში სამსახურის უფლების მინიჭების შესახებ.

მისი ტექსტის თანახმად, სამხრეთელ ოს მოქალაქეებს   კონტრაქტით სამსახურის უფლება მიენიჭებათ თავდაცვის სამინისტროს მე-4 ბაზის ნაწილებში, რომელიც სამხრეთ ოსეთშია განლაგებული. ეს სამხედრო მოსამსახურეები მიიღებენ ფულად ანაზღაურებას და რუსული ნორმების შესაბამის ყველა ყველა სამხედრო დამსახურებას.

ოღონდ მანამდე სამხედრო მოსამსახურე სამხრეთი ოსეთის სამხედრო სამსახურიდან უნდა დაეთხოვოს. ანუ, როგორც პროექტში ხაზგასმით არის აღნიშნული, საკუთრივ სამხრეთი ოსეთის შეიარაღებული ძალების შემადგენლობა იმ რაოდენობის წევრით უნდა შემცირდეს, რამდენიც მე-4 სამხედრო ბაზაზე შეუდგება სამსახურს.

წინასწარ პროექტზე დაყრდნობით, სამხრეთი ოსეთი ირწმუნება, რომ „სამხრეთი ოსეთის ცალკეული ქვედანაყოფების რუსეთის შეიარაღებულ ძალთა რიგებში შესვლის წესების შესახებ“ შეთანხმების ხელმოწერის შემდეგაც შეინარჩუნებს საკუთარ ჯარზე კონტროლს.

„ხელშეკრულების ხელმოწერის შემდეგ საორგანიზაციო-საშტატო სტრუქტურაში ნებისმიერ ცვლილებას რესპუბლიკის სამხედროები განახორციელებენ. ამგვარად, თავდაცვის სამინისტრო შეინარჩუნებს საბრძოლო ქვედანაყოფებს. ეს ჩვენი მტკიცე პოზიციაა“, – უთხრა 2017 წლის მარტის დასაწყისში იბრაჰიმ გასეევმა სააგენტო „РЕС“-ს.

არც რუსეთის თავდაცვის სამინისტროს პროექტში და არც პრეზიდენტის მიერ ახლახან ხელმოწერილ შეთანხმებაში არ ფიგურირებს სხვა, სამხრეთი ოსეთისთვის ძალიან მნიშვნელოვანი მოთხოვნა:

რომ რუსულმა მხარემ აღიაროს სამხრეთი ოსეთის შეიარაღებული ძალების რიგებში გავლილი სამხედრო სამსახური და სამხრეთ ოსური სამხედრო ბილეთები.

როგორ გარკვეული დროის წინ სამხრეთი ოსეთის საინფორმაციო სააგენტო „Рес“, სამხრეთი ოსეთის თავდაცვის მინისტრ იბრაჰიმ გასეევზე დაყრდნობით, იუწყებოდა, „სამხრეთი ოსეთის ხელმძღვანელობა იმის  მიღწევას ცდილობს, რომ რუსეთის არმიის სამსახურში ჩადგომისას ოს სამხედროებს ეროვნულ არმიაში მიღწეული წარმატებები და წოდებები შეუნარჩუნდეთ“.

მოსკოვური გაზეთი „ვედომოსტი“ წერს, რომ მალე ხელი მოეწერება ანალოგიურ შეთანხმებას  სამხრეთი ოსეთის КГБ-ს თანამშრომლების რუსეთის ФСБ-ში სამსახურის შესახებ. გამოცემის წყარო, რომელიც რუსულ სპეცსამსახურებთან დაახლოებული პირია, იტყობინება, რომ ამ შეთანხმების პროექტი ასევე შემუშავებულია.

• სამხრეთი ოსეთის სუვერენიტეტს დღეისთვის აღიარებენ  – რუსეთი, ვენესუელა, ნიკარაგუა, ნაურუ და ტუვალუ.

დამოუკიდებლობა თუ რუსეთის შემადგენლობაში შესვლა – სამხრეთი ოსეთისთვის მთავარი საკითხია. JAMnews-ის პოლიტიკური ანალიზი

 სტატიაში გამოთქმული მოსაზრებები, ტერმინები და პოზიცია მთლიანად ავტორს ეკუთვნის და, შესაძლოა, რედაქციის აზრს არ ემთხვეოდეს