სააგენტო „ტურანის“ მიმართ დაწესებული ყველა საგადასახადო სანქცია გაუქმდება

16 სექტემბერს აზერბაიჯანის გადასახადების სამინისტრომ უძველესი საინფორმაციო სააგენტო „ტურანის“ მიმართ 37 ათასი მანათის (დაახლოებით 22 ათასი დოლარი) ოდენობის, 2014-2016 წლების საგადასახადო სანქციები გააუქმა.

გადასახადების სამინისტროს დეპარტამენტის ოფიციალურ წერილში ნათქვამია, რომ ამგვარი გადაწყვეტილება შემოწმების შედეგების მიხედვით არის მიღებული.

7 აგვისტოს გადასახადების სამინისტრომ „ტურანის“ წინააღმდეგ გადასახდების დამალვის ბრალდებით, სისხლის სამართლის საქმე აღძრა, ხოლო 15 აგვისტოს სააგენტოს ოფისში ჩატარდა ჩხრეკა და ფინანსური დოკუმენტები, ელექტრონული წერილები და ჟურნალისტების პირადი ნივთები იქნა ამოღებული.

2017 წლის 24 აგვისტოს სააგენტო „ტურანის“ დირექტორ მეჰმან ალიევს სისხლის სამართლის ერთდროულად სამი მუხლის მიხედვით დასდეს ბრალი: უკანონო მეწარმეობა, გადასახადებისთვის თავის არიდება და თანამდებობრივი უფლებამოსილების ბოროტად გამოყენება. სასამართლომ გამოძიების პერიოდის განმავლობაში ჟურნალისტის სამი თვით დაპატიმრება გადაწყვიტა.

1 სექტემბერს სააგენტომ თითქმის მთლიანად შეაჩერა თავის საქმიანობა – ვებგვერდზე მხოლოდ ყველაზე მნიშვნელოვანი სიახლეები ქვეყნდებოდა.

სააგენტო „ტურანისა“ და მისი დირექტორის დასაცავად ბევრი აზერბაიჯანელი და უცხოელი საზოგადო მოღვაწე და უფლებადამცველი ორგანიზაცია გამოვიდა.

11 სექტემბერს, პრეზიდენტ ილჰამ ალიევის დავალებით, მეჰმან ალიევისთვის, პატიმრობის ნაცვლად, ქვეყნიდან გაუსვლელობის ხელწერილის ჩამორთმევის შესაძლებლობა განიხილეს – იმავე დღეს კი იასამალსკის რაიონული სასამართლოს გადაწყვეტილებით, აღმკვეთი ღონისძიება შეიცვალა,და მეჰმან ალიევი გათავისუფლდა.

თუმცა, ჟურნალისტის დამცველები და კოლეგები მის სრულად გამართლებას ითხოვდნენ, მაგრამ დაწესებული სანქციების გაუქმებას ბევრი ამ მიმართულებით გადადგმულ მნიშვნელოვან ნაბიჯად მიიჩნევს.

„ტურანის“ თანამშრომლებმა ეს ამბავი სიხარულით მიიღეს და განაცხადეს, რომ სააგენტო მალე ძველებური რეჟიმით განაახლებს მუშაობას.