რუსეთის პრეზიდენტთან არსებული ადამიანის უფლებათა საბჭო სკოლებში ჰიჯაბის ტარების შესახებ კანონის მიღების წინადადებით გამოდის

რუსეთის პრეზიდენტის ადმინისტრაციასთან არსებული ადამიანის უფლებათა საბჭო სახელმწიფოს მეთაურისთვის წარსადგენ  მოხსენებას ამზადებს წინადადებებით, რომლებიც სკოლებში ჰიჯაბის ტარებას ეხება.

კერძოდ, საბჭოს წევრები გამოდიან წინადადებით სკოლის მოსწავლეების გარეგნული იერისა და მათი მიერ რელიგიური ატრიბუტიკის ტარების კანონმდებლობით დარეგულირების  შესახებ.

„საკითხავია, რამდენად ღიად უნდა შეძლოთ სკოლის მოსაწავლეებს თავიანთი აღმსარებლობის დემონსტრირება და ხომ არ დაარღვევს ეს სახელმწიფოს საერო ხასიათსა და განათლების უფლებას“, – უთხრა „იზვესტიას“  საბჭოს წევრმა ევგენი ბობროვმა.

მისი თქმით, საბჭო ამ საკითხის შესახებ იმსჯელებს სხდომაზე, რომელიც თვის ბოლომდე შედგება.

მოქმედი კანონმდებლობით, მოსწავლეების ტანსაცმლის ფორმას თავად სკოლები ადგენენ.

სკოლებში ჰიჯაბის ტარების საკითხი რუსეთში მწვავე დისკუსიების საგნად რამდენჯერმე უკვე იქცა: 

•  24 იანვარს რუსეთის განათლებისა და მეცნიერების მინისტრმა  ოლგა ვასილიევამ მორდოვეთში ჩასვლისას განაცხადა, რომ რუსული სკოლების მოსწავლეებმა თავიანთი ატრიბუტიკით ხაზი არ უნდა გაუსვან საკუთარ აღმსარებლობას. მან ასევე აღნიშნა, რომ „საკითხი უკვე გადაწყვეტილია საკონსტიტუციო სასამართლოს მიერ“ და „ჰიჯაბის, როგორც ეროვნული კუთვნილების აღმნიშვნელი ატრიბუტის, ადგილი სკოლაში არ არის“.

• 28 იანვარს ჩეჩნეთის ხელმძღვანელმა რამზან კადიროვმა ოლგა ვასილიევა მისი განცხადების გამო გააკრიტიკა. „გაკვირვებას იწვევს, რომ მინისტრი, იმის ნაცვლად, რომ ადგილობრივ ხელმძღვანელობას უსწორებდეს, მილიონობით მოქალქეს თავის „პირად მოსაზრებას“ ახვევს თავს. ჩემი სამი ქალიშვილი სკოლაში სწავლობს და ჰიჯაბს ატარებს, თან საუკეთესო ნიშნები აქვთ. რას მოითხოვს ოლგა ვასილიევა, რომ მათ თავსაბურავები მოიხსნან? გოგონები ამას არასდროს გააკეთებენ“, – დაწერა კადიროვმა ინსტაგრამზე.

• 2015 წელს რუსეთის უზენესმა სასამართლომ მორდოვეთის სკოლებში ჰიჯაბისა და სხვა რელიგიური ატრიბუტიკის, ასევე  მინი კაბების, ჯინსების, ღრმა დეკოლტეიანი სამოსის და პირსინგის ტარების აკრძალვა კანონიერად მიიჩნია. 

• მანამდე , 2012 წელს ჰიჯაბის ტარებასთან დაკავშირებით კონფლიქტი სტავროპოლში წარმოიშვა – ამ მხარის ზოგიერთი რაიონის სკოლებში მუსლიმ გოგონებს ჰიჯაბით არ უშვებდნენ, რამაც მუსლიმების აღშფოთება გამოიწვია. მაშინ კონფლიქტში რუსეთის პრეზიდენტი ვლადიმირ პუტინი ჩაერია, რომელმაც განაცხადა, რომ სკოლებში ჰიჯაბებით სიარულში კარგი არაფერია. მისი თქმით, ამგვარი ტრადიცია რუსეთის მუსლიმურ რეგიონებშიც კი არ ყოფილა. კონფლიქტის შედეგი ის იყო, რომ სტავროპოლის მხარის ყველა სკოლაში   აუცილებელ სამოსად  კლასიკური ნიმუშის  ფორმა შემოიღეს. მოსწავლეებს ოფიციალურად აუკრძალეს თავზე რაიმეს დახურვა, მათ შორის ჰიჯაბის, ასევე – რელიგიური სიმბოლიკის მატარებელი ტანსაცმლით სიარული.

• 2013 წლის ზაფხულში რუსეთის უზენაესმა სასამართლომ  სტავროპოლის ზოგადსაგანმანათლებლო სკოლებში ჰიჯაბის ტარების აკრძალვა კანონიერად ცნო.