მდინარე ენგურთან მამა-შვილი გაიტაცეს

ენგურის ხიდთან რუსმა მესაზღვრეებმა ზუგდიდის რიონის  სოფელ რიყეში მცხოვრები მამა-შვილი გაიტაცეს.

ამ ინფორმაციას საქართველოს  სახელმწიფო უსაფრთხოების სამსახურში ადასტურებენ და ამბობენ, რომ მამა-შვილი ე.წ. საზღვრის უკანონოდ კვეთის ბრალდებით დააკავეს.

ოჯახის წევრებმა ეს ამბავი მაშინ შეიტყვეს, როდესაც პაატა და არჩილ როგავებთან ტელეფონით დაკავშირებას ცდილობდნენ და მათ ტელეფონზე რუსმა მესაზღვრემ უპასუხა, რომ ისინი დაპატიმრებულები იყვნენ.

ტელეკომპანია “რუსთავი2”-ის ინფორმაციით, მამა-შვილი ენგურთან დაკარგული ცხენის მოსაძებნად იყვნენ წასულები, როდესაც რუსმა მესაზღვრეებმა ჯერ ჰაერში გამაფრთხილებლად გაისროლეს, შემდეგ ქართული მხარის მიერ კონტროლირებად ტერიტორიაზე გადმოვიდნენ და როგავებს მდინარის მეორე მხარეს გადასვლა იარაღის მუქარით მოსთხოვეს.

ოჯახის წევრების განცხადებით, მათ აფხაზეთის მხარეს მცხოვრები მამაკაცი დაუკავშირდა. უცნობის თქმით, ის მთელი ღამის განმავლობაში არჩილ როგავასთან ერთად იმყოფებოდა საპატიმროში. როგავამ მას ოჯახთან დაკავშირება სთხოვა. მამაკაცის განცხადებით, როგავას სასტიკად ეპყრობიან და სცემენ.

ასევე ოჯახისთვის ცნობილი გახდა, რომ მამა-შვილი სხვადასხვა საპატიმროში ჰყავთ. პაატა როგავამ ტელეფონით ოჯახთან დაკავშირება და მხოლოდ იმის თქმა შეძლო, რომ ის სამხედროებს სოხუმში გადაჰყავდათ და სასწრაფოდ სჭირდებოდა საბუთები.

საქართველოს  სახელმწიფო უსაფრთხოების სამსახურში აცხადებენ, რომ ფაქტთან დაკავშირებით უკვე ინფორმირებულია ევროკავშირის სადამკვირვებლო მისია, ამოქმედებულია ცხელი ხაზი და დაკავებულების გასათავისუფლებლად მიმდინარეობს მუშაობა.