ლავროვი: საქართველოსთან დიპლომატიური ურთიერთობების არარსებობის პირობებში, ვიზების გაუქმებაზე მუშაობა არარეალურია

ქვეყნებს შორის დიპლომატიური ურთიერთობების არარსებობის პირობებში, საქართველოს მოქალაქეებისთვის სავიზო რეჟიმის გაუქმებაზე მუშაობა არარეალურია, – განაცხადა რუსეთის საგარეო საქმეთა მინისტრმა სერგეი ლავროვმა გაზეთ „იზვესტიასთან“ ინტერვიუში.

პასუხად კითხვაზე, მზად არის თუ არა მოსკოვი საქართველოს მოქალაქეებისთვის  ვიზების გასაუქმებლად, ლავროვმა მაგალითად მოიყვანა ევროკავშირის მიერ საქართველოსთვის ვიზების გაუქმება და აღნიშნა, რომ ბრიუსელმა და თბილისმა საამისოდ დიდი შრომა გასწიეს. თუმცა, ლავროვმა აღნიშნა, რომ „ამგვარი მასშტაბური სამუშაოს ჩატარება რუსეთსა და საქართველოს შორის არალეალურია, სააკაშვილის რეჟიმის მიერ გაწყვეტილი დიპლომატიური ურთიერთობების გამო“.

მან ასევე გაიხსენა, რომ რუსეთის პრეზიდენტმა ვლადიმირ პუტინმა არ გამორიცხა, საქართველოსთან უვიზო რეჟიმის შემოღება ორმხრივი შეთანხმების საფუძველზე.

„ჩვენ ისევ გახსნილი ვართ ამ საკითხზე ყოველმხრივი და  ერთობლივი მუშაობისთვის“, – განაცხადა სერგეი ლავროვმა და გაიხსენა, რომ  2015 წლის დეკემბერში რუსეთმა არსებითად ლიბერალური გახადა საქართველოს მოქალაქეებისთვის რუსეთში შესვლის წესი. დღეს მათ შეუზღუდავად შეუძლიათ  კერძო პირის, ორგანიზაციის ან ქვეყანაში მუდმივად მცხოვრები უცხოელის მიწვევით რუსეთში ჩასვლა.

ლავროვის თქმით, გასული წლის განმავლობაში თბილისში მდებარე შვეიცარიის საელჩოს რუსეთის ინტერესების სექციის მიერ გაცემული ვიზების რაოდენობა თითქმის გაორმაგდა. ამჟამად მზადდება სავიზო გამარტივება იმ თვითმფრინავების ეკიპაჟებისთვის, რომლებიც ამ ორ ქვეყანას შორის რეისებს ახორციელებენ.

• 2001 წელს რუსეთმა, უსაფრთხოების მოტივით, საქართველოსთან სავიზო რეჟიმი შემოიღო. სავიზო რეჟიმი არ შეხებიათ აფხაზეთისა და სამხრეთი ოსეთის მაცხოვრებლებს (ცოტა ხნით 2004 წელს – აჭარისაც). რუსეთის ფედერაციის მოქალაქეებისთვის გამარტივებული სავიზო რეჟიმი საქართველომ დააწესა.

• 2002 წლიდან რუსეთმა დაიწყო აფხაზეთისა და ცხინვალის (სამხრეთი ოსეთი) მოსახლეობისთვის  რუსეთის მოქალქეობის შეთავაზება. დღეისთვის ორივე რეგიონის მოსახლეობის 90%  – რუსეთის მოქალაქეა.

• 2008 წელს  მოსკოვის მიერ აფხაზეთისა და სამხრეთი ოსეთის დამოუკიდებლობის აღიარების საპასუხოდ, საქართველომ რუსეთის ფედერაციასთან დიპლომატიური  ურთიერთობა გაწყვიტა.

• 2010 წელს საქართველომ რუსეთი ჩრდილოკავკასიელი მოსახლეობისთვის საქართველოში 90 დღით უვიზო შესვლა დააწესა.  რუსეთის დანარჩენ მოქალაქეებს ვიზების მიღება საქართველოში შესვლისას შეეძლოთ.

• 2012 წლის თებერვალში საქართველომ რუსეთის ფედერაციის მოქალაქეებისთვის სავიზო რეჟიმი გააუქმა.

• 2015 წლის დეკემბერში რუსეთმა საქართველოსთან სავიზო რეჟიმი გაამარტივა. ახალი წესების თანახმად, საქრთველოს ნებისმიერ მოქალქეს, რომელსაც რუსეთის ფედერაციის საიმიგრაციო ორგანოებში გაფორმებული  მიწვევა აქვს რუსეთის ნებისმიერი მოქალაქისგან (და არა მხოლოდ ახლო ნათესავისგან, როგორც მანამდე), შეუძლია ნებისმიერი სახის ვიზის მიღება, ტურისტულის გარდა.

• გასული წლის დეკემბერში გამართულ პრესკონფერენციაზე რუსეთის პრეზიდენტმა ვლადიმირ პუტინმა არ გამორიცხა საქართველოს მოქალაქეებისთვის სავიზო რეჟიმის გაუქმება.