თბილისში 32 ველოგაჩერება და 2 ველობილიკი უნდა გაკეთდეს

თბილისის მერიამ ველოგაჩერებების მოსაწყობად 50 ათასი ლარი გამოყო. შესაბამისი ტენდერი უწყებამ 10 მაისს გამოაცხადა. პროექტის მიხედვით ველოგაჩერების ბოძები დედაქალაქის სხვადასხვა უბანში, სულ 32 ლოკაციაზე უნდა დამონტაჟდეს.

2017 წლის ბოლომდე კი დედაქალაქში 2 ველოტრასის მშენებლობა უნდა დასრულდეს. პირველი 8-კილომეტრიანი ველობილიკი დედა ენის ბაღიდან მარჯვენა სანაპიროს გავლით ვახუშტის ხიდამდე გაკეთდება, ხიდიდან მარცხენა სანაპიროს გავლით კი კვალ დედა ენის ბაღთან მივა. შედარებით პატარა 1.2 კილომეტრიანი ბილიკი მოეწყობა დიღომში, მირიან მეფის ქუჩაზე.

აღნიშნულ მონაკვეთებზე ველობილიკები ტროტუარზე მოეწყობა. უნდა მოწესრიგდეს სანიაღვრე ჭები, დაიდგას შუქნიშნები, დამონტაჟდეს პანდუსები და შეკეთდეს ასფალტის საფარი.

სხვა ველობილიკების მშენებლობა ჯერ გეგმაში არ არის. თბილისის მერიაში აცხადებენ, რომ მოთხოვნის შესაბამისად ველობილიკების მოწყობაზე სხვა ადგილებშიც იფიქრებენ.

პროექტს თბილისის მერიასთან ერთად სპორტისა და ახალგაზრდობის სამინისტროც ახორციელებს.