სომხეთში ადამიანის უფლებები მთელი წლის განმავლობაში უხეშად ირღვეოდა

სომხეთში ყოველდღიურად ირღვევა ადამიანის უფლებების ყველა სახე. ასეთი აზრი გამოთქვეს უფლებადამცველებმა, ადამიანის ძირითადი უფლებებისა და თავისუფლებების დაცვის თვალსაზრისით, 2017 წლის შედეგების შეჯამებისას.

„სომხეთში ადამიანის უფლებების სფეროში არსებული ვითარების შეჯამებისას სწორი იქნებოდა გვეთქვა, თუ რომელი უფლებები არ დარღვეულა. როგორც ჩანს, არ არის არც ერთი სახის უფლება, რომელიც არ დარღვეულა. თუკი ჩვენს მთელ რესურსს ადამიანის უფლებების დაცვისკენ მივმართავთ, ამ სამუშაოს შესრულებას მაინც ვერ შევძლებთ. ადამიანის უფლებების დრღვევის არდაშვება უფრო მარტივია, ვიდრე უფლებების დარღვევის შედეგებთან ბრძოლა“, – განაცხადა უფლებადამცველმა, ეროვნული საკრებულოს ფრაქცია „ელკის“ დეპუტატმა არტაკ ზაკარიანმა.

მისი თქმით, ადამიანის უფლებების დაცვა შეუძლებელია, როდესაც სამართლიანი სასამართლო განხილვა არ არსებობს.

 „თუკი ადამიანს სასამართლოსგან დაცვის უფლება ესაჭიროება, ეს უკვე იმას ნიშნავს, რომ მისთვის  სომხეთში სამართლიანი სასამართლო განხილვის უფლება ირღვევა, რადგან აქ არ არის შექმნილი ამ უფლების დაცვის ეფექტური მექანიზმები. რაც უნდა გავაკეთოთ, ის დარღვეულია. ცოტა მოსამართლე გვყავს და ისინი ყველა საქმის განხილვას ვერ ასწრებენ, რაც ასევე დიდი პრობლემაა“, – ამბობს არტაკ ზაკარიანი.

სომხეთში გასული წელი საარჩევნო იყო: ეროვნულ საკრებულოში არჩევნები ჩატარდა. დეპუტატის აზრით, დაირღვა თავისუფალი არჩევნების ჩატარების მთავარი პირობა –  თავისუფალი ნების გამოხატვის უფლება.

სომხეთში ჰელსინკის კომიტეტის თავმჯდომარემ, უფლებადამცველმა ავეტიკ იშხანიანმა აღნიშნა, რომ მთლიანობაში ადამიანის უფლებების მდგომარეობა სომხეთში არ შეცვლილა და არც შეიცვლება:

 „ადამიანის უფლებების დაცვა დემოკრატიის მდგომარეობაზეა დამოკიდებული, კანონის უზენაესობაზე. იმისთვის, რომ სახელმწიფოში ადამიანის უფლებებს პატივს სცემდნენ და არ არღვევდნენ, ჯერ მოქალაქეებმა ხელისუფლება უნდა აირჩიონ, შემდეგ კი დამოუკიდებელი სასამართლო უნდა არსებობდეს. ეს ანბანია. ამ დროს სომხეთში არჩევნები არ არსებობს და ამ წელსაც ეს ხმის მიცემა იყო, და არა არჩევნები. სასამართლო თავისუფალი არ არის, პრეზიდენტი ყოველდღიურად აწერს ხელს ბრძანებულებებს – ერთ მოსამართლეს თანამდებობიდან ათავისუფლებს და მეორეს ნიშნავს. ამით ყველაფერი ნათქვამია“.

უფლებადამცველს მიაჩნია, რომ წელს მშვიდობიანი მიგრანტების მიმართ ან საპროტესტო აქციების დროს ადამიანის უფლებები არ დარღვეულა, რადგან მიგრანტები და აქციები საერთოდ არ იყო.

ექსპერტები აღნიშნავენ, რომ ადამიანის უფლებების დამრღვევი დამნაშავეები დაუსჯელები რჩებიან.

უფლებადამცველი არტურ საკუნცი, კერძოდ, იმით არის შეშფოთებული, რომ ქვეყანაში შერჩევითი სამართალი მოქმედებს: ხელისუფლებასთან დაახლოებული პირების მიმართ კანონი არ ვრცელდება, არადა, მაგალითად, ოპოზიციონერები მკაცრად ისჯებიან.