Վրաստանում կորոնավիրուսից երրորդ մարդն է մահացել
86-ամյա կինը, որը բուժվում էր Թբիլիսիի ինֆեկցիոն հիվանդանոցում, COVID-19 վարակի երրորդ զոհն է դարձել։
Ապրիլի 7–ի տվյալներով՝ Վրաստանում գրանցվել է կորոնավիրուսով վարակման 195 դեպք։ Կարանտինի մեջ է 4735 մարդ, ստացիոնար վերահսկողության տակ՝ 383 մարդ։ 39 հիվանդ ապաքինվել է, երեքը՝ մահացել։
«Նա նյարդաբանական հիվանդություն, երկկողմ թոքաբորբ ուներ։ Այդ ամենը կյանքի հետ անհամատեղելի էր», — հայտարարել է ինֆեկցիոն հիվանդանոցի ղեկավար Թենգիզ Ծերծվաձեն։ Նրա խոսքով՝ բժիշկներն արել են հնարավոր ամեն ինչ, սակայն տարեց կնոջը փրկել չի հաջողվել։
Պանդեմիային հակազդելու համար Վրաստանում մարտի 21–ից արտակարգ դրություն է գործում։ Մարտի 23–ից վարակի ներքին տարածման պատճառով փակ են Քվեմո Քարթլի շրջանի Բոլնիս և Մառնեուլ քաղաքները։ Մարտի 31–ից երկրի ողջ տարածքում համընդհանուր կարանտին և պարետային ժամ է հայտարարվել։