უკვე ორი დღეა, რაც ხელისუფლება ელექტროსადგურზე მომხდარი ავარიის შედეგების „ლიკვიდაციას“ ვერ ახერხებს" />

ენერგეტიკული აპოკალიფსი აზერბაიჯანში – ფოტოები, ისტორიები და კომენტარები

უკვე ორი დღეა, რაც ხელისუფლება ელექტროსადგურზე მომხდარი ავარიის შედეგების „ლიკვიდაციას“ ვერ ახერხებს

მინგეჩაურის თბოელექტროსადგურზე ხანძარი 2-3 ივლისის ღამით გაჩნდა. მიუხედავად ჩინოვნიკების განცხადებებისა იმის შესახებ, რომ ყველაფერი კონტროლს ექვემდებარება და „ამჟამად აღდგენითი სამუშაოები“ მიმდინარეობს, მომდევნო ორი დღის მანძილზე ქვეყანაში ქაოსი სუფევდა – ხან ელექტროენერგია არ იყო, და ხან წყალი. მეტრო გაჩერდა და შუქნიშნებიც აღარ მუშაობდა.

მოდით, ქალაქში გავიაროთ –  ვნახოთ, თუ როგორ გამოიყურება ბაქო ენერგეტიკული აპოკალიფსიდან ორი დღის შემდეგ და მოვისმინოთ, თუ რას ამბობს ხალხი ქუჩებსა და სოციალურ ქსელებში.

Facebook:

«აპოკალიფსი გრძელდება მეტრო არ მუშაობს. გაჩერებებზე ძალიან ბევრი ხალხი დგას. ადამიანები სამსახურებში ვერ მიდიან. ავტობუსები უფასოა (ავტობუსების უმრავლესობა), მაგრამ ამ მუნიციპალური ავტოტრანსპორტით მგზავრობა უბრალოდ შეუძლებელია. ტაქსის მძღოლებს ზეიმი აქვთ. ისინი სიხარულით, თვალის დაუხამხამებლად წევენ ფასებს და, როგორც ჩანს, ვერც კი ხვდებიან, თუ რას აშავებენ». 

 

დღის მეორე ნახევარში მეტროპოლიტენი ჩართეს, მაგრამ გუშინ მიწისქვეშა ტრანსპორტის ელექტროსისტემა მოულოდნელად გაითიშა და საბოლოოდ თითოეული მგზავრი იძულებული გახდა, მატარებლებიდან გადმოსულიყო და ფეხით გაეგრძელებინა გზა უახლოეს სადგურამდე.

ტურნიკეტთან რვა წლის გოგონა დგას და დედამისის ხელს ეკიდება. ბავშვი ტირილით ამბობს, რომ მეტროში ჩასვლის ეშინია. ქალი ერთხანს ფიქრობს, შემდეგ კი შვილის მუდარას ითვალისწინებს და ბავშვთან ერთად ტოვებს მეტროსადგურის შენობას.

დარნაგიულის ხაზის მატარებლის ვაგონში თავისუფალი ადგილებიც კი დარჩა. თუმცა, როგორც წესი, დღის ამ ნაწილში ეს ხაზი ყველაზე უფრო მეტადაა ხოლმე გადატვირთული.

Facebook:

«წებოვანი და საზიზღარი ოფლის მოშორება ვერ შევძელით,  იმიტომ რომ შუქიც არ იყო.

ბაქოური საზომებითაც კი ჯოჯოხეთური სიცხეა, რაც არსებულ სიტუაციას კიდევ უფრო ამძიმებს და უნებლიეთ თავს ფანტასტიკური რომანის გმირად გრძნობ – თითქოს იმ სამყაროში მოხვდი, სადაც სულ ცოტა ხანში სხვადასხვა ტიპის კატაკლიზმები დაიწყება».

უკვე ერთი კვირაა, რაც არაადამიანური სიცხე მძვინვარებს. ქვეყანაში საშუალო ტემპერატურა 43 გრადუსს აღწევს. ასეთ დღეებში ბაქოელები სახლებიდან გამოსვლას ერიდებიან და თავებს კონდიციონერების საშუალებით იცავენ. იმიტომ რომ ქუჩაში ყოფნა სახიფათოა.

თავიდან გაურკვეველი იყო, თუ რატომ რატომ მოჰყვა 3 ივლისს ელექტროენერგიის გათიშვას წყლის მიწოდების შეწყვეტა. მოგვიანებით განმარტეს, რომ  ჯეირან-ბათანის ტბის გამწმენდი ნაგებობების მუშაობა შეფერხდა.

აზადლიგის პროსპექტზე მდებარე ავტოსამრეცხაო მუშაობას არ წყვეტს. მრეცხავ ბიჭს ვეკითხები, თუ როდის ჩართეს წყალი. „არ ჩაურთავთ, – მპასუხობს იგი, – ავზის წყალია. ვცდილობთ, ეკონომიურად მოვიხმაროთ».

Facebook:

«უკვე მესამე დღეა, რაც შუქი და წყალი გამორთეს. მადლობა რომ დღეს ავტობუსები უფასო გახადეს. მთავრობის ასეთი გულისხმიერების გამო ცრემლი მომეძალა».

გამომდინარე იქიდან, რომ ხალხს მეტროპოლიტენის ეშინია, პიკის საათებში „უფასო“ ავტობუსებში წარმოუდგენელი ჭყლეტვაა. ქალაქის ცენტრიდან მეტროსადგურ ქეროღლუმდე (ეს კი დაახლოებით ნახევარი საათის სავალი გზაა) ყველა  ბოლო გაჩერებამდე მგზავრობდა, ამიტომ შუალედურ გაჩერებებზე ავტობუსში მხოლოდ ორი-სამი ადამიანი ახერხებდა ამოსვლას.

მგზავრები სიცხესა და წყლის დეფიციტს განიხილავდნენ– «ძალიან მინდა შხაპის მიღება. უკვე სამი დღეა, არ მიბანავია». ამას გარდა, ვრცელდებოდა სხვადასხვა ჭორები – მ.შ.  იმის შესახებ, თუ რამდენი ადამიანი ემსხვერპლა სიცხეს და რამდენი ადამიანი დაიღუპა იმ საავადმყოფოებში, რომლებსაც ელექტროგენერატორები არ აღმოაჩნდათ (ჯანდაცვის სამინისტრო ჯერ კიდევ გუშინ საღამოს აცხადებდა, რომ   მსგავსი არაფერი მომხდარა და თითოეული საავადმყოფო ვარგისი გენერატორითაა აღჭურვილი).

ხანდაზმულ ქალს ხელში ცხვირსახოცი უჭირავს და ძალიან ხშირად იწმენდს სახეს. იგი მის გვერდით მდგარ გოგონას ეკითხება: „ხელსახოცი გინდა? ნუ გეშინია, უფასოდ გთავაზობ“.

Facebook, ჯგუფი „განცხადებების დაფა“:

«გამომდინარე იქიდან, რომ დღეს მეტრო არ მუშაობს, „უკრაინის წრიდან“ მეტროსადგურ „28 მაისამდე“  ორ მგზავრს უფასოდ გავიყვან. სასურველია, ქალები დამემგზავრონ».

არსებობს შეთქმულების თეორიაზე დაფუძნებული კიდევ ერთი ვერსია, რომლის მიხედვითაც თბოელექტროსადგურში ხანძარი სომეხმა დივერსანტებმა გააჩაღეს. ეს მოსაზრება იმ ფოტა და ვიდეომასალის საფუძველზე შეიმნა, რომელზეც ჩანს, რომ შუქის ჩართვისას Flame Towers-ის კედლებზე აზერბაიჯანულთან ერთად სომხური დროშაც ჩნდება. აღნიშნული ვერსია მხოლოდ ჭორებს ეფუძნება და ვერაფრით მტკიცდება.

ფორუმი disput.az:

«ნახევარ ქალაქს შორტები და „მინიკაბები“ ეცვა. ამიტომაც დაგვსაჯა ალაჰმა და შუქისა და წყლის გარეშე დაგვტოვა. მაგრამ ეს არაფერია – უარესი გველოდება. ადამიანმა ყურანი უნდა იკითხოს და გრძელი ქვედაბოლო უნდა ეცვას».

თალეჰ შაჰსუვარლი, ჟურნალისტი

«მეგობრებო, გვესმის, რომ ცხელა. გვესმის, რომ ელექტროენერგიის გათიშვა მნიშვნელოვან გავლენას ახდენს სოციალურ ცხოვრებაზე. ჩვენს სახლშიც არ არის შუქი. მაგრამ უნდა გვესმოდეს, რომ ამის მიზეზი ავარიაა. ავარია მოხდა და ამჟამად  ინციდენტის შედეგების აღმოსაფხვრელად შესაბამისი სამუშაოები ტარდება».

აპოკალიფსი, პირველი დღე, სამი ივნისი. ელექტროენერგია გაითიშა, მეტრო დაიხურა, ადამიანები მეტროსადგურის წინ მდებარე მოედანზე გამოვიდნენ და ტრანსპორტს ეძებენ. ორჰან აბასოვის ფოტო

Facebook:

«შესაძლოა, ხვალ ცხელ გვირაბში აღმოჩნდეთ, ან ისეთ საავადმყოფოში მოხვდეთ, სადაც გენერატორი არ არის. არა მგონია, რომ მაშინაც გექნებათ სურვილი, გაამართლოთ ის ადამიანები, რომლებმაც ფული მოიპარეს და თქვენი სიცოცხლე საფრთხის ქვეშ დააყენეს. კმარა ტოტალიტარული საზოგადოების წესებით ცხოვრება».

გოგონა, რომელიც სოციალურ ქსელებში არ არის დარეგისტრირებული:

«გამოდის, რომ მხოლოდ ერთი  აფეთქების ორგანიზებაც კი საკმარისი იქნება იმისთვის, ვისაც სურვილი გაუჩნდება, თავს დაგვესხას»

Facebook:

«თბილისი: მეტრო მემანქანეების გაფიცვის გამო არ მუშაობდა.
ბაქო: მეტრო ქვეყნის ენერგეტიკული სისტემის  არაერთგვაროვანი მდგომარეობის გამო არ მუშაობს
პ.ს. ამ ორ პუნქტს სულ რაღაც 500 კილომეტრი აშორებს, მაგრამ რამხელა განსხვავებაა! კარგ დღეს გისურვებთ»

Facebook,  ჯგუფი „განცხადებების დაფა“:

«ამ მომენტისათვის ჩემთვის ცნობილი ყველა სიტყვით ვიხსენებ ყველა იმ ფიზიკურ და იურიდიულ პირს, რომელმაც ბაქო შუქისა და წყლის გარეშე დატოვა»


ასევე წაიკითხეთ