საქართველოში რუსეთთან დაკავშირებულმა, სანქცირებულმა Wildberries-მა ონლაინ გაყიდვა დაიწყო
Wildberries-მა საქართველოში ონლაინ გაყიდვა დაიწყო
საქართველოში კრემლთან დაკავშირებულმა და უკრაინის წინააღმდეგ ომის მხარდაჭერის გამო სანქცირებულმა რუსულმა უმსხვილესმა ონლაინ სავაჭრო კომპანია Wildberries-მა საქონლის გაყიდვა და მიწოდება დაიწყო. პროდუქტის მიწოდება ფრანჩიზის მქონე ქართული პარტნიორი კომპანიის მეშვეობით განხორციელდება.
Wildberries არის ონლაინ ჰიპერმარკეტი, რომელიც დაარსდა რუსეთში 2004 წელს ვლადისლავ და ტატიანა ბაკალჩუკების მიერ. ეს უნივერსალური საცალო ქსელი ყიდის თითქმის ყველაფერს – მათ შორის ტანსაცმელს, კოსმეტიკას, საკვებს, საყოფაცხოვრებო ტექნიკას, ალკოჰოლს და წიგნებს.
ახლა კომპანია მუშაობს რუსეთში, სომხეთში, ბელარუსში, ყაზახეთში, უზბეკეთში, ყირგიზეთსა და ისრაელში.
რუსული საინფორმაციო სააგენტო ინტერფაქსის ცნობით, კომპანიის მეშვეობით, რომელიც Amazon-ის ანალოგად მოიაზრება, ქართველი მომხმარებლები მიიღებენ წვდომას “საქონლის ფართო ასორტიმენტზე”.
კომპანია Wildberries და მისი დირექტორი, უკრაინისა და ევროკავშირის წევრი ქვეყნის, პოლონეთის შავ სიაში არიან.
კიევისა და ვარშავის სანქციების სიაშია კომპანიის პრეზიდენტი, ტატიანა ბაკალჩუკიც, რომელიც Bloomberg-ის ცნობით, გადახდის ახალ, რუსულ ონლაინ სისტემაზე მუშაობს – ის რუსულ ბანკებს სვიფტიდან გათიშვით გამოწვეული პრობლემების შემსუბუქებაში დაეხმარება.
კომპანია, რომელიც საქართველოში შემოდის რუსეთის ბიუჯეტში გადასახადების ერთ-ერთი უმსხვილესი გადამხდელია.
მანამდე, 10 სექტემბერს ცნობილი გახდა, რომ მსხვილმა რუსულმა ონლაინმაღაზია Ozon-მა საქართველოში ოპერირება დაიწყო.
2022 წლის აპრილში Ozon-ის გენერალური დირექტორი ალექსანდრ შულგინი ევროპული სანქციების სიაში შეიყვანეს, რის შემდეგაც ის თანამდებობიდან გადადგა. 2023 წლის სექტემბერში ცნობილი გახდა, რომ ლუქსემბურგში ევროკავშირის სასამართლომ მიიღო გადაწყვეტილება შულგინის წინააღმდეგ სანქციები მოხსნილიყო.
