ვლადიმირ პოზნერის თბილისში ვიზიტს მწვავე პროტესტი მოჰყვა

რუსი ჟურნალისტის, ვლადიმირ პოზნერის თბილისში ვიზიტს მოქალაქეების მხრიდან პროტესტი მოჰყვა.

პოზნერი დღეს, 31 მარტს ჩარტერული რეისით ჩამოფრინდა და პირველ აპრილს საკუთარი დაბადების დღის აღნიშვნას სწორედ თბილისში აპირებდა.

მასთან ერთად მოსკოვიდან თბილისში შოუ ბიზნესისა და მედიის წარმომადგენლები ჩამოვიდნენ – სულ 50 ადამიანი.

აქტივისტების თქმით, ისინი პოზნერს დროსტარების საშუალებას არ მისცემენ, რადგან ის პუტინის პროპაგანდისტია და აფხაზეთს საქართველოს ნაწილად არ მიიჩნევს.

აქტივისტები პოლიციას მოუწოდებენ, რომ აღკვეთონ დანაშაული, რომელიც 50 კაცის მიერ კომენდანტის საათის დარღვევაში გამოიხატება. აქტივისტებმა რესტორანში, სადაც პოზნერი სტუმრებთან ერთად ვახშმობდა, შუქი გამორთეს.

“პუტინ ხუ*ლო” – სკანდირებენ აქტივისტები.

შინაგან საქმეთა სამინისტროში აცხადებენ, რომ ვლადიმირ პოზნერს საქართველოში ჩამოსვლით ოკუპაციის შესახებ კანონი არ დაურღვევია და მის ჩამოსვლას ვერ შეაფერხებდნენ.

“აღნიშნულ პირს, რომელიც არის ამერიკის მოქალაქე, არ დაურღვევია კანონი ოკუპაციის შესახებ. იგი არაერთხელ არის ნამყოფი საქართველოში.
რაც შეეხება მათ ქვეყანაში შემოსვლას, მთავრობის დადგენილების შესაბამისად, ნაწილს ჰქონდა კოვიდ პასპორტი- ხოლო ნაწილს PCR ტესტის ცნობა”, – წერია შსს-ს განცხადებაში.

სამოქალაქო მოძრაობის “დროას” დამფუძნებელი ელენე ხოშტარია ამბობს, რომ საქართველოში არ უნდა შემოუშვან ადამიანი, რომელიც ამბობს, რომ აფხაზეთი საქართველოსი ვერასდროს ვერ იქნება. ხოშტარიას თქმით, პოზნერის დაბადების დღეს საქართველოში საზეიმოდ ვერ აღნიშნავენ:

“ყველა ნორმალურ სახელმწიფოში ადამიანი, პუტინის სისტემის ნაწილი, რომელიც ამბობს კონკრეტულად, რომ საქართველოს ტერიტორიული მთლიანობა არ არსებობს და აფხაზეთი საქართველოსი არ იქნება, არ უნდა შემოუშვან საქართველოში და მით უმეტეს, პანდემიის დროს, კომენდანტის საათის დროს, ვერ უნდა ბედავდეს საქეიფოდ სიარულს.”

“ვინოტელთან”, სადაც პოზნერი სტუმრებთან ერთად იმყოფება, ვითარება ამ დრომდე დაძაბულია.