თუშეთის გზაზე მეწყერმა ორი ადამიანი მოიყოლა, ერთ-ერთს ამ დრომდე ეძებენ

ფშაველი-აბანო-ომალოს გზაზე, გზის გაწმენდითი სამუშაოების დროს ჩამოწოლილმა მეწყერმა ორი ადამიანი მოიყოლა. ერთი მათგანი ამოიყვანეს, მას მოტეხილობები აქვს. მეორეს ამ დრომდე ეძებენ. 

მეწყერში მოყოლილი ადამიანები ტრაქტორის მძღოლები არიან. ისინი გზის გაწმენდაზე მუშაობდნენ.

დაშავებული მძღოლი თელავის რეფერალურ საავადმყოფოში გადაჰყავთ. მას, სავარაუდოდ, ფეხი აქვს მოტეხილი.

მეწყერმა ხევში ჩაიტანა 2 ავტომობილი და ტრაქტორი, რომლითაც გზას წმენდდნენ. 

ფშაველი-აბანო-ომალოს გზაზე მეწყერი დაახლოებით 17:00 საათზე ჩამოწვა 

მეორე მძღოლის ძებნა ამ დრომდე გრძელდება. შემთხვევის ადგილზე მაშველთა 5 ჯგუფი მუშაობს.

თუშეთთან დამაკავშირებელი საავტომობილო გზა თელავის რაიონის სოფელ ფშაველიდან იწყება. ფშაველიდან თუშეთის ადმინისტრაციულ ცენტრამდე, სოფელ ომალომდე 72 კილომეტრია და მანქანით მის გავლას დაახლოებით 4 საათი სჭირდება. აბანოს უღელტეხილზე, რომელიც ზღვის დონიდან 2950 მეტრზეა, დიდთოვლობის გამო გზა 6 თვის განმავლობაში, ოქტომბრიდან მაისამდე იკეტება. ამ პერიოდში თუშეთში მოხვედრა მხოლოდ ვერტმფრენით შეიძლება.

თუშეთის საავტომობილო გზა ერთ-ერთი ყველაზე რთული გზაა საქართველოში. BBC–მ 2013 წელს ეს გზა ევროპის ყველაზე ექსტრემალური გზების ჩამონათვალში შეიყვანა.