თბილისი: "მზად ვართ არაფორმალური დიალოგისთვის". სოხუმი: "დიალოგი არ შედგება"
“საქართველო მზად არის აფხაზურ და ოსურ საზოგადოებებთან საერთო ინტერესებზე არაფორმალური დიალოგისა და თანამშრომლობისთვის” – განაცხადა შერიგებისა და სამოქალაქო თანასწორობის საკითხებში სახელმწიფო მინისტრობის კანდიდატმა, თეა ახვლედიანმა პარლამენტში, სიტყვით გამოსვლისა.
თეა ახვლედიანის თქმით, თბილისის სამშვიდობო პოლიტიკა ეყრდნობა “ერთი მხრივ, დეოკუპაციას, ხოლო მეორე მხრივ, ომით გაყოფილ საზოგადოებებს შორის შერიგებას”.
სოხუმის პასუხი ქართველ ჩინოვნიკს
მინისტრობის კანდიდატის ამ განცხადებას გამოეხმაურა აფხაზეთის დე ფაქტო საგარეო უწყება.
აფხაზური უწყების თქმით, “თბილისი აფხაზეთს აღიქვამს, როგორც “თემს”, “დე ფაქტო რეჟიმს”, “ოკუპირებულ ტერიტორიას” და ა.შ. აქედან გამომდინარე, ქართველი მინისტრის წარმოდგენაში აფხაზეთსა და საქართველოს შორის დიალოგი მხოლოდ არაფორმალური შეიძლება იყოს.
უწყება ხაზგასმით აღნიშნავს, რომ ასეთი მიდგომით, როგორც არ უნდა აფართოებდეს “დიალოგის პლატფორმას”, თბილისი კონსტრუქციულს ვერაფერს მიაღწევს.
“აფხაზეთსა და საქართველოს შორის მოლაპარაკებების შესაძლებლობაზე მხოლოდ იმ შემთხვევაში შეგვიძლია ვისაუბროთ, თუ თბილისი რადიკალურად გადახედავს საკუთარ კურსს აფხაზეთის მიმართ”
მათი თქმით, მოლაპარაკება შესაძლებელი იქნება მაშინ, როცა საქართველო აფხაზეთის საერთაშორისო იზოლაციის პოლიტიკაზე იტყვის უარს.
“მხოლოდ ამის შემდეგ შეიძლება ჩამოყალიბდეს ორ სახელმწიფოს შორის ურთიერთობების ნორმალიზების პირობები”, – წერია განცხადებაში.
________________________
● გახარია: ჩვენ აღვადგენთ ნდობას ჩვენს აფხაზ და ოს ძმებთან
● ორი წლით გახანგრძლივდა საქართველოში ევროკავშირის სადამკვირვებლო მისიის მანდატი
● ჟენევის მოლაპარაკებები: რა საკითხებზე გაამახვილა ყურადღება საქართველომ
