ქალბატონო პრეზიდენტო, დამეხმარეთ, რეალითი შოუდ აქციეს ჩემი განადგურება - თათია სამხარაძე ზურაბიშვილს მიმართავს

თათია სამხარაძე ზურაბიშვილს მიმართავს

ყოფილი ტელეწამყვანი და უფლებადამცველი თათია სამხარაძე ფეისბუკზე პოსტს აქვეყნებს, სადაც პრეზიდენტ ზურაბიშვილს მიმართავს. ის წერს, რომ უკვე მესამე დღეა ფაქტობრივ ტყვეობაშია – მას დაჰყვებიან სამთავრობო-პროპაგანდისტული ტელეკომპანია POSTV-ის ჟურნალისტები, რის გამოც ის სახლიდან ვერ გამოდის. ტელეწამყვანი შველას პრეზიდენტს თხოვს.

______________________________

24 მარტს, გვიან საღამოს, პოლიციის ცხელ ხაზზე შევიდა ზარი – რეკავდა POSTV-ის ჟურნალისტი ნათია ბერიძე.

112-ს მან უთხრა, რომ ჰქონდა ინფორმაცია იმის შესახებ, რომ ოპოზიციური პარტიის, “ნაციონალური მოძრაობის” წევრმა დიმიტრი ჩიქოვანმა, რომელიც ამავდროულად ტელეკომპანია “ფორმულას” დამფუძნებლის, დავით კეზერაშვილის ცოლის ძმაა, ჟურნალისტი თათია სამხარაძე გაიტაცა.

ამ შეტყობინების შემდეგ სამართალდამცავები წერეთლის გამზირზე, დიმა ჩიქოვანის საცხოვრებელ სახლში მივიდნენ და საგამოძიებო მოქმედებები ჩაატარა.

ჩიქოვანის სახლთან იდგნენ ასევე POSTV-ს, იმედის და რუსთავი 2-ის გადამღები ჯგუფები. სამივე ამ არხს ხელისუფლება აკონტროლებს. ჟურნალისტები ორი დღის განმავლობაში გაუსვლელად იდგნენ ჩიქოვანის კართან.

სამხარაძე ამბობს, რომ ჩიქოვანის სახლში მართლაც იმყოფებოდა, თუმცა არა ტყვედ, არამედ მეგობრის სტატუსით. მისი თქმით, “ჰიბრიდული სპეცოპერაციის” და პატრულში ცრუ ზარის უკან ხელისუფლება დგას.

“ჰიბრიდულ სპეცოპერაციებს დგამენ და ცრუ დასმენით, თითქოს მე გატაცებული ვიყო სახლში უვარდებიან ოპოზიციური პარტიის წევრს, დიმიტრი ჩიქოვანს. აი ასე, პროვოკაციულად უდანაშაულო ადამიანს აბრალებენ სისხლის სამართლის უმძიმეს დანაშაულს,” – აღნიშნა სამხარაძემ.

მიუხედავად იმისა, რომ სამხარაძე ამბობს, რომ არავის გაუტაცია, სამართალდამცავებმა მისი გატაცების ფაქტზე გამოძიება მაინც დაიწყეს.

პოსტვ ავრცელებს ინფორმაციას, რომ მას სხეულის დაზიანებები აქვს, რაც სამხარაძის თქმით, სიცრუეა. სამხარაძე ვიდეო აქვეყნებს სახლიდან, სადაც ამბობს, არანაირი დაზიანება არ აქვს:

ყოფილი ტელეწამყვანი შველას POSTV-ს ჟურნალისტებისგან ითხოვს, რომლებიც, მისი თქმით, მის თავისუფლებას ზღუდავენ – მის სახლთან დგანან კამერებით და უთვალთვალებენ.

სამხარაძე პრეზიდენტ სალომე ზურაბიშვილს მიმართავს:

“პროვოკატორი ნათია ბერიძე ისევ მომივარდა სახლთან… ახლაც რამდენიმე ჯგუფი მყარაულობს სადარბაზოსთან! ხალხო, როდემდე უნდა მამყოფონ ამ ტყვეობაში? ქალბატონო პრეზიდენტო, დამეხმარეთ, რეალითი შოუდ აქციეს ჩემი განადგურება.”

ვინ და რატომ ებრძვის თათია სამხარაძეს?

2016 წელს ტელეწამყვანმა თათია სამხარაძემ ცნობილი პროპაგანდისტი და შოუმენი შალვა რამიშვილი სექსუალურ შევიწროებაში ამხილა. იმ პერიოდში სამხარაძე ტელეკომპანია “იმედში” მუშაობდა, რამიშვილი კი მისი უფროსი იყო. სამხარაძემ საჩივარი სასამართლოში შეიტანა და საბოლოოდ საქმე მოიგო. სასამართლომ შალვა რამიშვილს სექსუალური შევიწროების საქმეზე საქალაქო სასამართლომ მორალური ზიანის ასანაზღაურებლად 2 000-ლარიანი ჯარიმა დააკისრა. რამიშვილმა პირველი ინსტანციის გადაწყვეტილება სააპელაციო სასამართლოში გაასაჩივრა, თუმცა მოსამართლემ საქალაქო სასამართლოს გადაწყვეტილება ძალაში დატოვა. ორი ინსტანციის გადაწყვეტილება რამიშვილს უზენაეს სასამართლოში აღარ გაუსაჩივრებია.

თუმცა, განსხვავებით სხვა ქვეყნებისგან, სადაც metoo-ს კამპანიის ფარგლებში, კაცის ძალადობაში მხილება მისი სოციალური აქტივობის დასრულებასაც ნიშნავდა, რამიშვილის შემთხვევაში ასე არ მოხდა.

პირიქით, მართალია, რამიშვილთან კონტაქტი შეწყვიტა “იმედმა”, მაგრამ სასამართლოს მიერ ძალადობაში მხილებულმა პიროვნებამ ახალი ტელე და ინტერნეტ პროექტი POSTV წამოიწყო. ეს არხი პროსახელისუფლებო მესიჯების ერთ-ერთი მთავარი გამავრცელებელია. არხის ერთ-ერთი მთავარი ფუნქციაა ოპოზიციის, არასამთავრობო სექტორის და დასავლელი პოლიტიკოსებისა “გაშავება”, ასევე რუსული ნარატივების გავრცელება. ეს არხი ის მედიაპლატფორმაა, რომელიც აქტიურად ლობირებდა ე.წ. რუსულ კანონს აგენტების შესახებ. POSTV ე.წ. აგენტების კანონის ინიციატორი პრორუსული მოძრაობის, “ხალხის ძალის” ოფიციალური საინფორმაციო რესურსია.

შალვა რამიშვილი ერთ-ერთი ყველაზე ოდიოზური და სკანდალური ფიგურაა ქართულ ტელესივრცეში. “ნაციონალური მმართველობის” დროს რამიშვილი დეპუტატ კობა ბექაურისთვის ფულის გამოძალვის ფაქტზე დააკავეს, მან ოთხწლიანი სასჯელი მოიხადა. “ქართული ოცნების” ხელისუფლებაში მოსვლის შემდეგ კი ამ გუნდის მთავარ პროპაგანდისტად იქცა.

შალვა რამიშვილი წლების განმავლობაში “ქართული ოცნების” აქტიური მხარდამჭერი და პროპაგანდისტია. 2013 წლის საპრეზიდენტო არჩევნების დროს ის გიორგი მარგველაშვილის საარჩევნო შტაბის პიარს ხელმძღვანელობდა, შემდეგ კი პრეზიდენტის ადმინისტრაციაში მუშაობდა.

სამხარაძის ისტორიას წინ უძღოდა ის ფაქტი, რომ ბოლო დღეების განმავლობაში რამიშვილი სექსუალურ შევიწროებაში კიდევ რამდენიმე ქალმა ამხილა. მათი ისტორიები მსგავსია. როგორც ქალები ამბობენ, ისინი POSTV-ში გასაუბრებაზე მიდიოდნენ, რა დროსაც არხის ხელმძღვანელის მხრიდან სექსუალური შევიწროების ობიექტები ხდებოდნენ.

გასულ კვირას ტელეკომპანია “ფორმულამ” რამიშვილის ერთ-ერთი მსხვერპლის, ანანია გაგეჩილაძის მიერ 2018 წელს გაკეთებული აუდიო ჩანაწერი გამოაქვეყნა. მოქმედება რამიშვილის კაბინეტში ხდება, გაჩეჩილაძე სამსახურებრივ გასაუბრებაზეა დაბარებული. ჩანაწერში მკაფიოდ ისმის, როგორ ავიწროებს რამიშვილი გაჩეჩილაძეს.

ბევრი მიიჩნევს, რომ სწორედ ეს ჩანაწერი გახდა თათია სამხარაძის და დიმიტრი ჩიქოვანის წინააღმდეგ დევნის მიზეზი (შეგახსენებთ, რომ ჩიქოვანი “ფორმულას მფლობელის, დავით კეზერაშვილის ცოლის ძმაა).

თავად რამიშვილი სექსუალური შევიწროების ბრალდებებს უარყოფს და აცხადებს, რომ ამ ბრალდებებს უკან კეზერაშვილი დგას – უხდის ფულს ქალებს რამიშვილის წინააღმდეგ გამოსვლის სანაცვლოდ.

● “მშობლებმა არ იციან როგორ ელაპარაკონ შვილებს”. ანიმაციური გმირები სექსუალური განათლებისთვის
● “ქალთა მოძრაობა” გაუპატიურების მუხლში შესწორებას ითხოვს
● სექსუალური შევიწროება საქართველოში დასჯადი ხდება

“ფორმულას”ეთერში ანანია გაჩეჩილაძის ჩანაწერის გასვლის შემდეგ მან მუქარის შემცველი პოსტი დაწერა ფეისბუკზე:

“დიდ პრობლემას შეგიქმნით ასეთი საუბრების გამოქვეყნება თავად თქვენ, ფაშისტებო. დღეს ბრბოს წყურვილი დააკმაყოფილეთ, მაგრამ ვერც კი ხვდებით, რომ ჯინი ამოუშვით ბოთლიდან. თქვენ რა… მხოლოდ პეპლებზე და ყვავილებზე საუბრობთ არასაჯაროდ? რა თქმა უნდა –  არა. ასეთ სიბინძურეს მიჩვეული ბრბო კიდევ მოგთხოვთ მსგავს სალაფავს. და გაიხსნება პანდორას ყუთივით თქვენი წარსულის კარადა. ამ კარადაში კი ძირითადად სულ თქვენი ჩონჩხები იმალება. აგერ სამხარაძეც ხო იქაა. მე ფეხებზე მკიდია თქვენი ეს კამპანია. ერთი კი ალალი ბოდიში მაქვს მოსახდელი ოჯახთან… თქვენს ჯოჯოხეთს კი დაველოდები “წმინდანებო”, ოღონდ მშვიდად… თან რომ საქმის კეთებას გავაგრძელებ ისე.” – მიმართავს რამიშვილი ძალადობის მსხვერპლ ქალებს.

პოლიტიკოსების რეაქცია

სამხარაძეს სოლიდარობას უცხადებენ უფლებადამცველები, არასამთავრობო ორგანიზაციები და ასევე ოპოზიცია.

პარტია “დროა” აცხადებს, რომ მთელი ეს ისტორია ოცნების მთავარი პროპაგანდისტის, შალვა რამიშვილის დაცვის მიზნით შეითხზა და თათია სამხარაძის წინააღმდეგ პროპაგანდისტული მედიები, ე.წ. ექსპერტები, ტროლები და სახელმწიფო ინსტიტუტები ამოქმედდნენ.

“ის, რომ შალვა რამიშვილი გამამტყუნებელი განაჩენისა და სექსუალური შევიწროების ათობით ისტორიის შემდეგ, ტელევიზიის ეთერში ზის, ზურგს „სუსი“ უმაგრებს და აქვს ბერკეტები უსამართლო ბრძოლაში ზიანი მიაყენოს ამ ქალებს, ჩვენ, დანარჩენ საზოგადოებას გვავალდებულებს, დავდგეთ ამ ქალების გვერდით. არცერთ მოძალადეს არ უნდა ეგონოს, რომ რომელიმე ქალს მარტო დავტოვებთ.” – ვკითხულობთ განცხადებაში.

ერთობლივი განცხადება გაავრცელეს ქალმა დეპუტატებმა – ისინი კანონის სრული სიმკაცრით რეაგირებას ითხოვენ. დეპუტატები ამბობენ, რომ სახელმწიფომ მოძალადის მხარე დაიკავა, რაც მიუღებელია:

“უკანასკნელი დღეების განმავლობაში ხელისუფლება გაცდა დუმილის ფაზას, რაც გვინახავს სხვა საქმეებში, და ღია მხარდაჭერას უცხადებს შემვიწროებელს, რითიც ეუბნება ძალადობის და დისკრიმინაციის ყველა მსვერპლს, რომ დადუმდნენ და ახალისებენ მოძალადეებს.” – წერია განცხადებაში.

სახალხო დამცველის პოზიცია

საქართველოს ახლადარჩეული სახალხო დამცველი ლევან იოსელიანი მთელი ამ დღეების განმავლობაში დუმილს ინარჩუნებდა, რის გამოც სოციალურ ქსელებში საზოგადოების დიდი კრიტიკა დაიმსახურა.

სახალხო დამცველის მხრიდან პირველი განცხადება 27 მარტს გავრცელდა.

ომბუდსმენმა თანადგომა გამოუცხადა ძალადობის სავარაუდო მსხვერპლებს და გამოთქვა მზადყოფნა, რომ მათი სურვილისა და მომართვის შემთხვევაში, შეისწავლოს მათი ინდივიდუალური საქმეები.

“სამწუხაროდ, ეს არ არის პირველი შემთხვევა, როდესაც საზოგადოების და პოლიტიკოსების ნაწილი აგრესიას სავარაუდო მსხვერპლებისადმი მიმართავს – მათ მონათხრობს უაპელაციოდ ეჭვქვეშ აყენებენ, მიუთითებენ, რომ მათ სექსუალურ შევიწროებაზე საუბარი მხოლოდ წლების შემდეგ დაიწყეს, რის მიზანიც სავარაუდო შემავიწროებლის რეპუტაციის შელახვაა, სავარაუდო შემავიწროებელს კი მხარდაჭერას უცხადებენ,” – ნათქვამია ომბუდსმენის განცხადებაში.

ომბუდსმენი ყურადღებას ამახვილებს “მოვლენების მედია გაშუქების” საკითხზე.

ომბუდსმენის აპარატის ცნობით, სახალხო დამცველი დაინტერესდება სისხლის სამართლის გამოძიების მსვლელობით, რომელიც, კერძო პირის განცხადებით, ცრუ შეტყობინების საფუძველზე დაიწყო.

“სახალხო დამცველი ასევე შეახსენებს საზოგადოებას, რომ დაუშვებელია და მიუღებელია ჟურნალისტთა მიმართ ნებისმიერი სახის ძალადობა,” – ნათქვამია განცხადებაში.

უფრო თამამია შეფასებებში სახალხო დამცველის მოადგილე გიორგი ბურჯანაძე, რომელიც მომხდარს ფეისბუკზე ეხმიანება:

“რამდენჯერმე ვუყურე თათია სამხარაძის ვიდეოს. წარმოუდგენელია ის ყველაფერი რაც მის მიმართ მიმდინარეობს. უფრო სწორად, წარმოუდგენელია ამ უკანონობისა და სითავხედის მასშტაბი!“

ბურჯანაძე მომხდარს უწოდებს “სახელისუფლო პროპაგანდისტის გადასარჩენ სპეცოპერაციას” და ამავე დროს ამბობს, რომ ამ ამბავში ბევრი მძიმე კანონდარღვევა იკვეთება:

“კარგად ჩანს პირადი ცხოვრების უფლების უკანონო ხელყოფა, უფლებადამცველების შევიწროება და დისკრედიტაცია და სამართალდამცველების პოლიტიკური მიზნით გამოყენება“.

ბურჯანაძე სოლიდარობას უცხადებს თათია სამხარაძეს: “ამ ყველაფრის თანმდევი მძიმე ადამიანური ტვირთის ატანა უწევს თათიას და მის ახლობელ ადამიანებს. ძნელია ამ საშინელების მოთმენა და პირველ რიგში გამძლეობის სურვილები მას, ჩემგან როგორც თანამოქალაქისგან. ყველა მოძალადე და სექსუალურად შემვიწროებელი უნდა დაისაჯოს მაქსიმალურად და სრულად!”

● ხელისუფლების პროპაგანდისტ შალვა რამიშვილს ჟურნალისტი მაკო ჯაბუა სექსუალურ შევიწროებაში ამხელს
● სახელმწიფო დეპარტამენტის ანგარიში: დაუსჯელობა, პოლიტიკური პატიმრები და მედიის თავისუფლება

______________

სექსუალური შევიწროება საქართველოში დასჯადი 2019 წელს გახდა. ცვლილებები შევიდა ადმინისტრაციულ სამართალდარღვევათა კოდექსში, შრომის კოდექსში, სამოქალაქო საპროცესო კოდექსსა და სახალხო დამცველის შესახებ კანონში.

სექსუალური შევიწროების ცნება აქამდე საქართველოს კანონმდებლობაში არ არსებობდა. შესაბამისად, არ არსებობდა რაიმე სახის პასუხისმგებლობა ასეთი ქმედებებისთვის. სექსუალური შევიწროების დეფინიცია ყალიბდება “შრომის კოდექსით“, რომლის თანახმადაც, სექსუალურ შევიწროებად ჩაითვლება სექსუალური ხასიათის არასასურველი ქცევა, რომელიც მიზნად ისახავს და იწვევს პირის ღირსების შელახვას ან მისთვის დამამცირებელ, მტრული ან შეურაცხმყოფელი გარემოს შექმნას.

კანონის თანახმად, სექსუალური შევიწროება ადმინისტრაციული სასჯელის სახით 300 ლარიან ჯარიმას ითვალისწინებს. ხოლო აღნიშნული ქმედების ერთი წლის განმავლობაში მეორედ ჩადენისას – ჯარიმას 500 ლარის ოდენობით ან გამასწორებელ სამუშაოებს ერთ თვემდე ვადით.

ამასთან, სექსუალური შევიწროება ჩადენილი წინასწარი შეცნობით არასრულწლოვანის, ორსულის, უმწეო მდგომარეობაში მყოფის, შეზღუდული შესაძლებლობების მქონე პირის მიმართ ან არასრულწლოვანის თანდასწრებით გამოიწვევს დაჯარიმებას 500-დან 800 ლარამდე. ხოლო ამ ქმედების ერთი წლის განმავლობაში გამეორება – ჯარიმას 800-დან 1000 ლარამდე ოდენობით, გამასწორებელ სამუშაოებს ერთ თვემდე ვადით ან ადმინისტრაციულ პატიმრობას 10 დღემდე ვადით.