სოხუმის აეროპორტი 30 წლიანი უმოქმედობის შემდეგ გაიხსნება. ჭორების თანახმად, მას რუსი ოლიგარქი აღადგენს
სოხუმის აეროპორტი გაიხსნება
პეტერბურგში, საერთაშორისო ეკონომიკურ ფორუმზე, ხელი მოეწერა რუსეთ-აფხაზურ შეთანხმებას სოხუმის აეროპორტის აღდგენის შესახებ, რომელიც 30 წელი დაკეტილი იყო. აეროპორტი ორ ეტაპად აღდგება კერძო რუსი ინვესტორის ხარჯზე, ფედერალური ბიუჯეტიდან თანხების მოზიდვის გარეშე.
ინვესტორის ვინაობა უცნობია, თუმცა, ჭორების თანახმად, აეროპორტს მომავალში აღადგენს და ოპერირებას გაუკეთებს ცნობილი ოლიგარქი ოლეგ დერიპასკა. სხვათა შორის, ის ამერიკის შეერთებული შტატების, ევროკავშირის და რიგი სხვა ქვეყნების სანქციების ქვეშ იმყოფება.
აფხაზური მხრიდან დოკუმენტს ხელი მოაწერა ვიცე-პრემიერმა, ეკონომიკის მინისტრმა ქრისტინა ოზგანმა, ხოლო რუსული მხრიდან ეკონომიკური განვითარების მინისტრმა მაქსიმ რეშეტნიკოვმა.
„შემიძლია ვთქვა, რომ ეს არის ძალიან მნიშვნელოვანი მოვლენა ჩვენი ქვეყნისთვის. ამ საინვესტიციო პროექტის განხორციელება მნიშვნელოვან გავლენას მოახდენს აფხაზეთის ეკონომიკის განვითარებაზე“, – ამბობს კრისტინა ოზგანი.
- რა ტერიტორიების და ობიექტების მიღება სურს რუსეთს აფხაზეთისგან. კომენტარი
- ტესტი ერთგულებასა და ალკოჰოლზე – როგორ გრძელდება ტურისტული სეზონი აფხაზეთში
- ახალი „კანონი ბინების შესახებ“ აფხაზეთში – რას ნიშნავს და რა საფრთხეებს შეიცავს
სოხუმის აეროპორტი უმოქმედოა აფხაზეთის ომის დასრულების შემდეგ. მისგან რეგულარული ფრენები არ სრულდება, რადგან სამოქალაქო ავიაციის საერთაშორისო ორგანიზაცია უარს ამბობს აეროპორტის ლიცენზირებაზე საქართველოს მთავრობის ნებართვის გარეშე.
ამავდროულად, მდებარეობიდან გამომდინარე, ეს აეროპორტი რეგიონში ფრენებისთვის ერთ-ერთ ყველაზე ხელსაყრელად ითვლება. საბჭოთა კავშირის დაშლამდე მისი მგზავრთა ბრუნვა ზაფხულში დღეში ხუთ ათასამდე მგზავრი იყო, ზამთარში კი ათასამდე.
ოფიციალურად არა მხოლოდ ინვესტორის ვინაობა, არამედ ტრანზაქციის პირობებიც – კერძოდ, საკუთრებასთან დაკავშირებული საკითხები არ სახელდება. ერთი წლით ადრე აფხაზეთის პრეზიდენტმა ასლან ბჟანიამ ხაზგასმით აღნიშნა, რომ წინასწარი შეთანხმებების თანახმად, ასაფრენი ბილიკის საკუთრება აფხაზეთს დარჩება, ხოლო ინვესტორი აეროპორტის კომპლექსს იყიდის. მაგრამ უცნობია, დარჩა თუ არა ეს პირობები ძალაში.
წინასწარი შეფასებით, რეკონსტრუქციის პირველი ეტაპის ღირებულება 6,5 მილიარდი რუბლი (დაახლოებით 79 მილიონი დოლარი) იქნება. ამ ეტაპზე ასაფრენი ბილიკის 3.6 კმ-დან 2.4-ის რეკონსტრუქცია იგეგმება.
მოსალოდნელია, რომ რეკონსტრუქციის პირველ ეტაპზე ტრაფიკის წლიური მოცულობა 375,8 ათასი მგზავრი იქნება.
აღდგენითი სამუშაოების მეორე ეტაპი დაიწყება წელიწადში მილიონი მგზავრის მიღწევის შემდეგ.
აეროპორტის გახსნა 2024 წლის ბოლოს იგეგმება.
აფხაზეთის ხელისუფლება იმედოვნებს, რომ აეროპორტის გახსნა მნიშვნელოვნად გაზრდის ტურისტულ ნაკადს, განსაკუთრებით კი აფხაზეთის აღმოსავლეთ ნაწილში, რომელიც მოუხერხებელი ლოჯისტიკის გამო და ამჟამად არც თუ ისე პოპულარულია რუს ტურისტებში.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
