"შვილს თვალწინ მიკლავენ, დამეხმარეთ" - სააკაშვილის დედა ზელენსკის მიმართავს

“მე მიხეილ სააკაშვილის დედა ვარ. ჩვენ სასოწარკვეთილ მდგომარეობაში ვართ. ჩემს შვილს თვალწინ მიკლავენ”, – საქართველოს მესამე პრეზიდენტის, მიხეილ სააკაშვილის დედა გიული ალასანია უკრაინის პრეზიდენტს, ვოლოდიმირ ზელენსკის მიმართავს.

ვიდეომიმართვა ფეისბუქზე დღეს გავრცელდა. გიული ალასანიას თქმით, უნდა მოინახოს გზა, რომ სააკაშვილი უკრაინაში გადაიყვანონ და სათანადოდ უმკურნალონ. 

“ჩვენ როგორმე უნდა მოვაწყოთ მისი გადმოყვანა აქ, უკრაინაში, რათა შესაბამისი მკურნალობით იქნეს უზრუნველყოფილი და რამენაირად გადარჩეს. 

35-ე დღეა რაც შიმშილობს, წარმოგიდგენიათ? ნებისმიერ დროს შეიძლება რამე მოხდეს, მაგრამ ეს არავის ადარდებს. ერთადერთი რასაც მას სთავაზობენ – ციხის კლინიკაა, სადაც არ არიან შესაბამისი სპეციალისტები, სადაც არაა არანაირი პირობა ასეთი პაციენტების მკურნალობისთვის.

ერთადერთი, თქვენი დახმარების იმედი მაქვს. ყველას იმედი მაქვს – უკრაინის ხალხის, დეპუტატების. მივმართავ უკრაინის ხელისუფლებას და რა თქმა უნდა, პირველ რიგში, ბატონ ზელენსკის.  მე თქვენი ძალიან დიდი იმედი მაქვს, ყველა თქვენგანის – უკრაინის ხალხის, დეპუტატების. და მე მივმართავ უკრაინის მთავრობას, რა თქმა უნდა, პირველ რიგში, ბატონ ზელენსკის”, – ამბობს გიული ალასანია.

დღეს “მთავარი არხის” დირექტორი და მიხეილ სააკაშვილის ადვოკატი ნიკა გვარამია რუსთავის ციხესთან მიმდინარე აქციაზე სიტყვით გამოვიდა.

ნიკა გვარამიამ განაცხადა, რომ ექსპრეზიდენტი ცუდად არის და სახელებს ვეღარ იხსენებს. მისივე თქმით,  ანტიჰუმანურად იქცევა სასამართლოც და საპატრიარქოც.

“მე ტყუილს განვიხილავ როგორც ფაქტს, ამიტომ შემიძლია ვუპასუხო, რომ საქართველოს საპატრიარქოს წლების განმავლობაში, მათ შორის ამ ხელისუფლების დროს, ყოველგვარი მიმართვების, ყოველგვარი განსჯების, მეტსაც გეტყვით, შეწყალების კომისიის გვერდის ავლითაც, შეჰქონდა განცხადებები შეწყალებაზე. ბევრია ასეთი, ამოვიღებ ყველას”, – განაცხადა გვარამიამ.

ამის მაგალითად გვარამიამ მოიყვანა ირაკლი ბათიაშვილის მაგალითი, რომელიც სააკაშვილის პრეზიდენტობის პირველ წლებში, სასჯელს სამშობლოს ღალატისთვის იხდიდა. ბათიაშვილს მაშინ ბრალი არ უღიარებია და არც შეწყალება უთხოვია ვინმესთვის, თუმცა საპატრიარქომ თავისი ინიციატივით მიიღო ეს გადაწყვეტილება და მიმართა საქართველოს პრეზიდენტს შეწყალებისთვის, რომელმაც ირაკლი ბათიაშვილი მაშინ შეიწყალა.

“დღეს ორმა ინსტანციამ გვითხრა უარი სააკაშვილის საქმის განხილვაზე. ერთია საპატრიარქო, რომელმაც თქვა, რომ შემოიტანეთ განაცხადი და განვიხილავთ. ეტყობა სამშობლოს ღალატი არ არის მძიმე დანაშაული, ასევე საპატრიარქოსგან ბევრი სხვა მძიმე დანაშაული შესულა პრეზიდენტთან, მათ შორის ნარკოტიკებთან დაკავშირებით, ამის სტატისტიკა არსებობს.

მეორე – სასამართლო სისტემა, სადაც შევიტანეთ სააკაშვილის ჯანმრთელობის მდგომარეობასთან დაკავშირებით დაუყოვნებლივ აღსრულების გამოცემა, მაგრამ ხარვეზით გამოგვაბრუნა უკან. სასამართლომ მისდია ფორმალიზმს და მშრალ განსჯას“, – ამბობს გვარამია.

მისივე განმარტებით, ყოველი საათი არის ამ ადამიანისთვის მნიშვნელოვანი. ერთიც და მეორეც, სასამართლოც და საპატრიარქოც იქცევა იდენტურად და ამ მოქცევას ჰქვია ანტიჰუმანურობა. 

● თითქმის ერთი თვეა სააკაშვილი შიმშილობს. რა ელის და რა ვიცით მის ჯანმრთელობის მდგომარეობაზე
● რატომ ჩამოვიდა სააკაშვილი და იქნება თუ არა ქართული მაიდანი – გია ნოდიას თვალსაზრისი
● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?

მიხეილ სააკაშვილი თბილისში 1 ოქტომბერს დააკავეს, მას შემდეგ, რაც იგი ფარულად დაბრუნდა სამშობლოში.

მესამე პრეზიდენტის წინააღმდეგ საქართველოში რამდენიმე სისხლის სამართლის საქმეა აღძრული. ორ საქმეზე იგი მსჯავრდებულია, ორ საქმეზე კი ბრალდებული.

ძებნილის სტატუსის მქონე ექს-პრეზიდენტი დაკავებისთანავე რუსთავის N12 საპყრობილეში გადაიყვანეს. იმავე საღამოს მან შიმშილობა დაიწყო.

ადვოკატები ითხოვენ, რომ მოშიმშილე პრეზიდენტი, რომლის ჯანმრთელობის მდგომარეობა დამძიმებულია, სამოქალაქო კლინიკაში გადაიყვანონ. სასჯელაღსრულების სამინისტროში კი აცხადებენ, რომ საჭიროების შემთხვევაში ექს-პრეზიდენტს ციხის საავადმყოფოში გადაიყვანენ.

საქართველოს სახალხო დამცველის დასკვნით, ციხის საავადმყოფოში არც მკურნალობისთვის საჭირო აღჭურვილობა არსებობს და არც უსაფრთხო გარემო ყოფილი პრეზიდენტისთვის, რომელსაც ბევრი მტერი ჰყავს დანაშაულებრივი სამყაროს წარმომადგენლებს შორის.

ციხის საავადმყოფოში გადასვლას არც თავად სააკაშვილი თანხმდება. ამ დრომდე, იგი კატეგორიულ უარს ამბობს შიმშილობის შეწყვეტაზეც.