"შემიძლია ფიცი დავდო, რომ თქვენთან ერთად ვიქნები ბოლომდე ამ ევროპულ გზაზე", - სალომე ზურაბიშვილი

“თქვენ არ წაგიგიათ არჩევნები. თქვენი ხმა მოიპარეს”, – ასე დაიწყო თავისი სიტყვა საქართველოს პრეზიდენტმა. ის ოპოზიციის ლიდერებთან ერთად რუსთაველის გამზირზე მიმდინარე საპროტესტო აქციაზე სიტყვით გამოვიდა და მოქალაქეებს დაჰპირდა, რომ მათთან ერთად დაიცავს საქართველოს ევროპულ გზას.

ზურაბიშვილმა მოქალაქეებს უთხრა, რომ არავინ აღიარებს ამ არჩევნებს და რომ ის გააკეთებს ყველაფერს, რათა მოხდეს არჩევნების გაყალბების გამოძიება და ამ პროცესში ჰქონდეს საქართველოს საერთაშორისო მხარდაჭერა. პრეზიდენტის სიტყვას გთავაზობთ, სრულად:

“სცადეს, რომ თქვენი მომავალიც მოიპარონ. მაგრამ ამის უფლება არავის აქვს. თქვენ ამის უფლებას არავის მისცემთ.

• თბილისში 100 ათასზე მეტი ადამიანი შეიკრიბა არჩევნების გაყალბების წინააღმდეგ აქციაზე. დასავლეთი არ ჩქარობს არჩევნების აღიარებას
• ამომრჩეველზე ზეწოლა, დაშინება, არათანაბარი საარჩევნო გარემო – როგორ აფასებენ არჩევნებს საერთაშორისო სადამკვირვებლო მისიები

აქ არის ის დროშა, რითაც საქართველომ პირველად გამოაცხადა, თანამედროვე ეპოექაში, თავისუფლება და დამოუკიდებლობა. ამ დროშის გაგრძელებაა დღევანდელი დროშა. ორივე დროშის წინაშე შემიძლია ფიცი დავდო, რომ თქვენთან ერთად ვიქნები ბოლომდე ამ ევროპულ გზაზე. სანამ არ მივაღწევთ იმ ევროპის კარებთან, რომელიც ჩვენი ნამდვილი ოცნება კი არა, რეალობაა – სხვა ალტერნატივა არ გვაქვს. არ გვინდა, რამე სხვა დავუტოვოთ ამ ქვეყნის შემდეგ თაობებს.

დამოუკიდებლობა, თავიუსფლება, ევროპულობა და ქართულ იდენტობა, რომელიც მოგვყვება და ესოდენ ძვირფასია. მინდა გითხრათ, მე რას ვაკეთებ ამ პერიოდში. დღეს მივეცი 17 ინტერვიუ უცხოურ მედიაში, რომ ავუსხნა, რა მოხდა აქ. ვესაუბრე ექვს პრეზიდენტს, მათ შორის ევროპული ქვეყნების პრეზიდენტებს. ვესაუბრე საგარეო საქმეთა მინისტრებს. თქვენ ალბათ წაიკითხავდით ყველა იმ შეფასებას და მხარდაჭერის გზავნილებს, რაც მოდის სხვადასხვა ევროპული ქვეყნიდან და აშშ-დან.

• ევრაზიული საქართველო? – გია ნოდიას თვალსაზრისი
• “რაც შეეხება მიზეზებს, ის ორია – გაყალბება და ქართველი ამომრჩეველი”, – ბექა კობახიძის მოსაზრება

ყველა გვეუბნება ერთ რამეს – არავინ, გარდა ერთი ადამიანისა [ორბანი], არავინ აღიარებს არსებულ არჩევნებს. ყველა გვეუბნება, რომ უნდა გავგრძელოთ გამოძიება და ბოლომდე მივიყვანოთ. შეიძლება, ამაში მივიღოთ საერთაშორისო მხარდაჭერა, რომ გამოძიება იყოს სრულყოფილი და არ დავტოვოთ არც ერთი კითხვა უპასუხოდ. ამაში აქტიურად არიან ჩართულნი ჩვენი სადამკვირვებლო ორგანიზაციები, არასამთავრობოები და პოლიტიკური პარტიები. ყველანი ერთად, თქვენი დახმარებით უნდა შევქმნათ სრული სურათი, თუ როგორ მოხდა ის უნახავი, უპრეცედენტო და უნიკალური წართმევა ხმების – ასე მასიურად, სისტემურად. ესაა უზარმაზარი, წინასწარ დაგეგმილი ოპერაცია.

ჯერ კიდევ უნდა ვიმუშაოთ, რომ დავდოთ ეს შედეგები და მოვითხოვოთ ამ შედეგების შესრულება. ესაა პირველი ეტაპი. დარწმუნებული ვარ, ყველა გეტყვით, როგორ აპირებენ მოქმედებას. არავინ დატოვებს უსამართლო შედეგს ამ დღეში. ერთად, ძალიან მშვიდობიანად, დავიცავთ იმას, რაც არის თქვენი და ჩვენი კონსტიტუციური უფლება. სხვა არაფერი გვაქვს, თუ არა ხმა – ხალხისა და ერისა – რომელიც უნდა აღვასრულოთ.

დრო არ არის არც პესიმიზმის, არც ხელების ჩაქნევის, არც შეგუების. დროა, ძალიან წყნარად, შემართებით, მიზანმიმართულად, დავიცვათ ჩვენი ხმა. დიასპორაშიც უზარმაზარი რაოდენობა იყო წართმეული. ის ხმები, რომლებიც მივიდა არჩევნებზე, აჩვენებს, სადაა ხალხის ნება. მაგრამ ძალიან ცოტა იყო, რომ ხელი შეეშალა აქ დაწერილი შედეგებისთვის. ისინი საბოლოო არ იქნება. ამას ერთად მივაღწევთ.

მადლობა ყველას, რაც გააკეთეთ ამ დღეებში და რასაც კიდევ გავაკეთებთ ერთად“, – განაცხადა პრეზიდენტმა.