საქართველოში რეგულარული ფრენები ნაწილობრივ აღდგა

რეგულარული ფრენები საქართველოში ნაწილობრივ აღდგა. თბილისში უკვე ჩამოვიდნენ ტურისტები და საქართველოს მოქალაქეები გერმანიიდან, საფრანგეთიდან და ლატვიიდან. რეგულარული ფრენების აღდგენის პარალელურად კი კორონავირუსის გამო ყველაზე პოპულარული ტურისტული რეგიონი – სვანეთი ჩაიკეტა.

აგვისტოდან ფრენების განახლების უფლება რამდენიმე მსხვილმა კომპანიამ მიიღო.  

საქართველოს მიერ რეგულარული ავიამიმოსვლის ნაწილობრივ აღდგენის შემდეგ რიგა-თბილისის პირველი რეისი შეასრულა ავიაკომპანია Air Baltic-ის თვითმფრინავმა. 20 აგვისტომდე რიგიდან თბილისში და პირიქით კვირაში თითო რეისი შესრულდება, 20 აგვისტოდან კი  2-2.

პარიზიდან Air France-ის პირველი რეისი თბილისში 9 აგვისტოს ჩამოფრინდა. Air France თბილისიდან პარიზში და პარიზიდან თბილისში კვირაში ორ რეისს შეასრულებს. 

რეგულარული საჰაერო მიმოსვლა 2 აგვისტოდან აღდგა თბილისსა და მიუნხენს შორისაც. ამ მიმართულებით რეისებს ავიაკომპანია Lufthansa ასრულებს. აგვისტოში Lufthansa თბილისი-მიუნხენის რეისზე კვირაში ორჯერ იფრენს. 

სხვადასხვა მიმართულებით კომერციულ, ჩარტერულ ავიარეისებს განაგრძობს კომპანია Georgian Airways-იც.

Air France-ის, Lufthansa-ს და Air Baltic-ის რეისებზე ორმხრივი ბილეთების ფასი 500 ევროდან იწყება. 

რაც შეეხება დაბალბიუჯეტიანი ავიაკომპანიების  – Wizzairs-ის და  Ryanair-ის რეისების აღდგენას, ეკონომიკის მინისტრის,  ნათია თურნავას  განცხადებით, საქართველო ბევრი რეისის და ადამიანთა დიდი ნაკადის მისაღებად ჯერ არ არის მზად. 

კორონავირუსის პანდემიის გამო დაკეტილი საზღვარი საქართველომ უპირობოდ გაუხსნა ჯერჯერობით მხოლოდ გერმანიის, საფრანგეთის, ლატვიის, ლიეტუვის და ესტონეთის მოქალაქეებს. 

• საქართველო საზღვრებს ხსნის ევროკავშირის ხუთი ქვეყნისთვის. ოღონდ ფრენები არ არის

• PCR-ტესტი, კარანტინი და თვითიზოლაცია – რა უნდა იცოდეთ, თუ საქართველოში შემოსვლას ან საქართველოდან წასვლას აპირებთ

ამ ქვეყნის მოქალაქეებს საქართველოში  ჩამოსვლისას ორკვირიანი კრანტინის გავლა არ სჭირდებათ.

ორკვირიანი კარანტინის  გავლა სავალდებულოა საქართველოს მოქალაქისთვის, მსოფლიოს რომელი ქვეყნიდანაც არ უნდა ჩამოვიდეს ის.

ქუჩაში უკვე შეგვიძლია მონატრებული ტურისტები დავინახოთ – ეკონომიკის მინისტრი

“სიხარულით ვამბობ, რომ ქუჩაში უკვე გამოჩნდნენ უცხოელი ტურისტები. ჩამოფრენილი მგზავრების სამი მეოთხედი ტურისტები არიან. ქუჩაში უკვე შეგვიძლია მონატრებული ტურისტები დავინახოთ. ჩვენი მოქალაქეებიც მოფრინავენ, მაგრამ საქართველოს დათვალიერების მსურველებიც არიან“, – ამბობს ეკონომიკის მინისტრი, ნათია თურნავა  და დასძენს, რომ პარიზიდან და მიუნხენიდან ჩამოსულ მგზავრთა დიდი ნაწილი ტურისტია. 

სვანეთი დაიკეტა – 518 დამსვენებელი კარანტინში გადაიყვანეს

რეგულარული ფრენების აღდგენის და ტურიზმის კვლავ ამუშავების ფონზე კი საქართველოს ერთ-ერთი ყველაზე ღირსშესანიშნავი და მოთხოვნადი რეგიონი – სვანეთი დაიკეტა. 

საკარანტინო რეჟიმი ერთ-ერთ ყველაზე მოთხოვნად ტურისტულ რეგიონში 10 აგვისტოს, მას შემდეგ გამოცხადდა, რაც მესტიის მუნიციპალიტეტის სოფელ ლენჯერში 16 ადამიანს COVID -19 დაუდასტურდა. მათი ნაწილი ლენჯერში თბილისიდან ჩავიდა.

კორონავირუსის გავრცელების საფრთხის თავიდან აცილების მიზნით, მესტიაში შესვლა და იქედან გასვლა აიკრძალა. აკრძალულია სოფლებს შორის მიმოსვლაც. ყველა, ვინც მესტიიდან გამოვა, ორკვირაინი სავალდებულო კარანტინი უნდა გაიაროს. 

ტურიზმის დეპარტამენტის ინფორმაციით, შეზღუდვების გამოცხადების დროს სვანეთში 518 დამსვენებელი იმყოფებოდა. მათი დიდი უმეტესობა ადგილობრივია. 

ისინი საკარანტინე სივრცეებში გადაიყვანეს. 518 დამსვენებლიდან  343 ადგილობრივ სასტუმროში გადაიყვანეს, 171 კი  – აჭარაში.

სასტუმროების მეპატრონეები ამბობენ, რომ სვანეთს წელს ყველაზე მეტი ადგილობრივი ტურისტი სტუმრობდა, აგვისტოში დაჯავშნილი იყო ბევრი სასტუმრო.  თუმცა, ჯავშნების უმეტესობა დღეს უკვე  გააუქმდა.

კორონავირუსის პანდემიის გამო დაწესებული შეზღუდვებია მესტიაში, სავარაუდოდ, 28 დღის განმავლობაში გაგრძელდება.